Read Gangte THIEMPUDANTE 8 Bible Online

THIEMPUDANTE 8 - Gangte bible

THIEMPUDANTE 8

¹Chun, LALPA’n Mosi kawmah a gen a,

²“Aron leh a chapate chuh ka umna puon-In kawtkhak lutna achun pui inla, chun, thiempu silhlechen leh thau nuh zat leh gitloh thawihna dingin bâwng tuoi, belam nih leh, chângthâk chawl sawhloh bawm chuh chawi inla,

³zie tak achun mipite chengcheng chuh sam khawm in,” a ti a.

⁴LALPA’n thu a piek bang chun Mosi chun a hih a, mipite a hung kikhawpkhawm phet u chun,

⁵a kawm u ah, “Tu a ka thilhih ding hi, LALPA’n hih dinga ei piek chuh ahi,” a ti a.

⁶Mosi chun Aron leh a chapate chuh malam ah a pui a, kisil thieng dingin a hilh a.

⁷Tichun, puonâk leh thiempu van chuh a âk sak a, kâwnggak in a kâwng uh a gâk sak a.

⁸A awmphaw chuh a belh sak a, zie chung achun Urim leh Thumim a belh sak ta a.

⁹A luchang achun dielkawp a kawp sak a, a mai lam pang achun sana kicheina a belh sak a; zie chuh kipiek thienthona etsakna ahi, tichun, LALPA’n thu a piek bang tak chun a hih ta a.

¹⁰Mosi chun kinuh ding thau chuh a la a, LALPA umna puon-In leh a sunga van chengcheng chuh nuh in, sukthienthona a bawl ta a.

¹¹Zie zawh chun thau neukhat a la a, maichâm chungah sagih vei a theh a, a matchâk chengcheng, kisilna kuong leh, a tunna cheng tawh nuh in, LALPA a dinga sukthienthona a bawl ta a.

¹²Chun, kinuh chi sathau chuh Aron lu chung ah a sunga, a namdetna dingin thau a nuh hi.

¹³Chun, LALPA’n thu a piek guol tak chun, Mosi chun Aron chapate chuh malam ah a pui a, puonâk chuol a âksak a, kâwnggak a gâk saka, a luchang uh achun lukhuk a khuk sak ta a.

¹⁴Chun, Mosi chun gitloh thawihna ding bâwngchal chuh a hun kai a, Aron leh a chapate chun a lu chung achun a khut uh a ngau a,

¹⁵Mosi chun bâwngchal chuh a that a, a thisan chuh neukhat a laa, sukthientho a hihna dingin maichâm ki achun a khut in a tât viel ta a. A dang cheng chuh maichâm bul achun a sung tha vek ta a. Zie tawbang hin, piekna leh sukthienthona chuh a bawl ta a.

¹⁶Chun, Mosi chun asungthau leh a thin a phatna pên chuh a la a, a kal leh a chunga thau bekte chu tawh maichâm achun a hâl ta a.

¹⁷Bâwngchal sa dang cheng chuh a la a, a vun tawh, a sapheh tawh, a gilzang chu tawh a la a, giehbuk pawlam achun a hâl ta a, LALPA thupiek guol tak chun a hih ta a.

¹⁸Zie zawh chun, Mosi chun hâlmang thillat ding belam chuh a kai a, tichun, Aron leh a chapate chun a chungah a khut uh a ngau a.

¹⁹Mosi chun a that a, a thisan chun maichâm ning li chuh a theh viel ta a.

²⁰Belam sa chuh a semnel a, a sunga cheng leh a malpi chuh tui in a sawp a, a luchang leh a thau cheng chuh maichâm achun a hâl ta a, zie chuh LALPA thupiek guol tak chuh ahi.

²¹Zie hâlmang kithawihna hi an thillat a kithawihna ahi a, a gim chuh LALPA dinga gimlim tak ahi.

²²Chun, Mosi’n belamchal nihna chuh a kai a, zie chuh thiempute namdetna dinga mat ding chuh ahi. Aron leh a chapate chun a lu chung achun a khut uh a ngau a,

²³zie chuh Mosi chun a that a, gan thisan chuh neukhat a la a, Aron bil changlam leh a khut changlam khutpi leh a keng changlam kengpi te chuh a nuh vek ta a.

²⁴Chun, Aron chapate chuh malam ah a pui a, a bil changlam lêkteu, a khut changlam khutpiu leh a keng changlam kengpi mûk hawu a nuh a, zie zawh chun thisan chuh maichâm ning li achun a theh viel ta a.

²⁵A thau haw, a meia thau te, asungthau te, a thin phatna laite, leh a kal nih leh a malpi chuh a la a.

²⁶Chun, LALPA masanga chângthâk chawl sawhloh bawm apat chun, chângthâk tang khat leh, sathau a kimek chângthâk tang khat leh chângthâk pêk khat a la dawka, zie chuh sathau chung haw leh sa malpi chung achun a kawih a.

²⁷Zie chengcheng chuh Aron leh a chapate khutpêk chung achun a kawih a, amau chun LALPA masang a pei thillat in a lân tau a.

²⁸Chun, Mosi chun a khut u apat chun a la a, maichâm a hâlmang thillat chung achun namdetna thillat in a hâl ta a, zie chuh mei thillat ahi a, a gim chuh LALPA dinga gimlim tak ahi.

²⁹Chuleh, Mosi chun a awmsung chuh a la a, LALPA kawma pei thillat in a pie ta a. Zie chuh namdetna sa laka Mosi chanvo chuh ahi. LALPA’n a kawma thu a piek guol chun Mosi chun a hih vek ta a.

³⁰Mosi chun thau nuh chi leh maichâm a thisan chuh neukhat gel a la a, Aron leh a chapate leh a silhlechenteu chuh a thehkhum a. Zie tawbang hin, Aron leh a chapate chuh sukthienthona a bawl ta a.

³¹Mosi chun Aron leh a chapate kawm achun, “LALPA umna puon-In kawtkhak bul ah sa chuh huon unla, zie taka chuh Aron leh a chapate chun a nek dinguh ahi ti a ka hun thupiek bangin, namdetna thillat kawihna bawm sunga chângthâk chu tawh neu in,” a ti a.

³²“Chun, sa leh chângthâk nêk mawk haw chuh meia hâl tum ding ahi.

³³Na kinamdet ziek u a, na zehchan hun ding sung uh a beih macheng chuh, puon-In kawtkhak pawtsan lo a ni sagih na um dinguh ahi.

³⁴Na gitlohnau sukthienna dinga tunia I hih u hi, LALPA’n hih dinga ei piek chuh ahi ngâl a.

³⁵Puon-In lutna kawtkhaka chuh sun le zan a ni sagih sung chu na um ngêi ngêi dinguh ahi a, LALPA thupiek chu na hih dinguh ahi. Zie chuh na hih loh u chun thi ding na hiu. LALPA’n hih dinga ei thupiek chuh ziehi ahi,” a ti a.

³⁶Tichun, LALPA’n Mosi manga hih dinga thu a piek chengcheng chuh Aron leh a chapate chun a hih tau a.