Read Gangte THIEMPUDANTE 9 Bible Online

THIEMPUDANTE 9 - Gangte bible

THIEMPUDANTE 9

¹Chun, ni giet ni chun Mosi chun Aron leh a chapate leh Israel upate chuh a sama,

²Aron kawm achun, “Gitloh thawihna dingin bâwngchal tuoi khat leh, hâlmang thillat dingin belamchal, dem umlo gel kai inla, bâwngchal chuh gitloh thawihna ding leh, belamchal chuh hâlmang kithawihna dingin LALPA kawmah lân in.

³Chun, Israel chate kawm achun, gitloh thawihna dingin kêlchal khat, bâwngno khat leh belamno khat, kum khata upa gel, dem umlo chuh hâlmang thillat dingin hun kai unla;

⁴bâwngchal leh belamchal chuh chamna thillat dingin, changbuong thillat sathau kihel chu tawh a lat dinguh ahi. Ziehi, a hih tei dinguh ahi, a ziek chuh, tunia hi a kawm u a LALPA hung kilak ding a hih ziekin,” ti’n a hilh a.

⁵Tichun, Mosi’n thu a piek bang chun, kihona puon-In mai achun a hun kai u a; mi chengcheng chun a va naih u a, LALPA masang achun a va ding u a.

⁶Mosi chun a kawm u ah, “Ziehi ahi, LALPA’n hih dinga thu a hun piek chuh ti a chuh a lopina vak chuh na lak uh a a hung kilak theihna dingin,” a ti a.

⁷Chun, Aron kawm achun, “Maichâm chuh hun naih inla, na gitlohnate na hâlmang thillat te lân inla, nanga ding leh mipite a ding in kichamna siem in; chun mipite thillat chuh lân inla, amau a dingin kichamna siem in, LALPA thupiek bangin,” a ti a.

⁸Tichun, Aron chun maichâm chuh a va naih a, amah dinga gitloh thawihna bâwngno chuh a that a,

⁹Chun, Aron chapate chun thisan chuh a kawmah a pieu a, thisan achun a khutzung a dieh a, maichâm kihaw achun a tât a, a dang cheng chuh maichâm bul achun a sungtha ta a.

¹⁰Gitloh thawihna sathau haw, a kal haw, a thin phatna pente chuh maichâm chung achun a hâl a meikhu’n a zâm mang sak ta a, LALPA’n Mosi thu a piek guol tak khan a hih ta a.

¹¹A sa leh a vun cheng chuh giehbuk pawlam achun a hâl ta a.

¹²Chun, hâlmang thillat chuh a that a, a chapate chun thisan chuh a pieu a, maichâm chuh a theh viel a.

¹³Hâlmang thillat luchang leh a sa dang cheng chuh a pieu a, amah chun maichâm achun a hâl a.

¹⁴A sunghaw, a kênghaw chule a sawp a, maichâm thillat chung achun a hâl ta a.

¹⁵Zie zawh chun, mipite dinga kithawihna thillat chuh a lân a. Mipite gitloh thawihna ding kel chuh a kai a, a that a, amah gitloh thawihna mah bang khan gitloh thawihna dingin a lân ta a.

¹⁶Chun, hâlmang thillat ding chule a la a, dân dungzui takin a lân ta a.

¹⁷Chun, changbuong thillat chuh a pie a, zie lak apat chun khut dim in a ham a, maichâm achun a hâl ta a. (Zie chuh, ni chenga hâlmang thillat piek bana chu hihbeh ahi).

¹⁸Chun, mipite dinga chamna thillat a kithawihna bâwngchal leh belamchal chule a that a. Aron chapate’n thisan chuh a pieu a, maichâm chuh a theh viel ta a.

¹⁹Aron chun bâwngchal thau haw leh belamchal thau haw, a mei thau haw, asungthau haw leh a thin a phatna pên chu;

²⁰Gancha awmpheh chung achun a kawih a, A thau cheng chuh maichâm achun a hâl a, meikhu’n a zam mang sak ta a

²¹Chun, Mosi thupiek bang khan, a awmsung leh a mal changlam chuh Aron in LALPA ma ah pei thillat in a pei a;

²²Chun, Aron in mipi lam nga’n a bân a zaka, vang a pie a; gitloh thawihna leh hâlmang thillat leh chamna thillat lân zo chun a hung kum suk ta a.

²³Chun, Mosi leh Aron chuh kikhawp khâwmna puon-In achun a va lut u a, a hung pawt kit u a; mipite chuh a vangsak a; tichun, LALPA lopina chuh mi chengcheng chung achun a hung kilang ta a.

²⁴Tichun, LALPA ma apat chun mei a hung pawt a, hâlmang thillat leh maichâm chunga sathau um haw chuh a katum ta a; zie chuh, mipite chun a muh phet un, a kiko u a, maia lei si’n a khupbawk tau hi.