Read Gangte JEREMIA 1 Bible Online

JEREMIA 1 - Gangte bible

JEREMIA 1

¹Benjamin gama Anathoth khuo a thiempute laka Hilkiah chapa Jeremia thute chuh:

²Juda leng Amon chapa Josia hun lai a a vaihawm kum sawmlethum na achun LALPA thu chuh ka kawmah a hung tunga.

³Juda lal Josia chapa Jehoiakim lal lai inle a hungtung a; Juda leng Josia chapa Zedekia kum sawmlekhat na tâwp, Jerusalem sala puih tha nga na tieng khan.

⁴Chun, LALPA thu chuh ka kawmah a hung tung a:

⁵“Sûl a ka hun siem makhan le ka hun he a, na pien ma a namte thiemgau dinga ka hun kawih chuom na hi tai” ti’n.

⁶Chun, kei chun, “E! LALPA Pathien, ngaitie, thu ka gen thei puoi; ka naupang taluo ngâla,” ka ti a.

⁷Himahlele, LALPA chun, ka kawmah hiti hin a gena, “Ka naupang ta luoi, ti ki’n, Kuo kieng hileh ka hun sawl na phawt ah chieh in na tin; thu ka hun piek phawt chuh na gen ding ahi.

⁸Amau haw chuh lau ki’n la, Nang hun hukdawk dingin na kawmah ka um zing hi,” tih hi LALPA kamsuok ahi.

⁹Tichun, LALPA chun a khut in ei hun bana, ka kam a khawih a, chun LALPA chun ka kawmah; “Ngaitie, na kam ah ka thu haw chuh ka kawih tai.

¹⁰Entie, tuni hin namte leh lalgam chung haw ah, bawt dawk ding leh phie ding leh susie ding leh paih tha ding leh siempha ding leh tung dawk ding leh phut ding a ka hun guot na hi,” a ti a.

¹¹Zielo chule LALPA thu chuh ka kawmah a hung tunga, “Jeremia bang na mu?” a ti a. Chun, kei chun, “Vaisuoklu thing kang ka mui,” ka ti a.

¹²Chun, LALPA’n ka kawmah, “Na mu dik ten hi,” Ka thu chuh suguitung dingin ka kisazo zing hi, a ti a.

¹³Chun, LALPA thu chuh ka kawmah a hung tung kita, “Bang na mu?” ti’n. Chun, kei chun, “Bel a tuiso bulh bulh a kam lam a mâllam nga’n ka mui,” ka ti a.

¹⁴Tichun, LALPA chun ka kawmah tihin a gena, “Gamsung a cheng te chung ahin mâllam apat in thil phalo hung tung ina.

¹⁵Ngaitie, mâllam a lalgam a nam chengcheng te chuh sam ding ka hi ngâla, LALPA’n a tii. Hung kikhawm untin, Jerusalem a lutna kawtkhak haw cheng leh kulhbang kimvelhaw leh Juda khawpi chengcheng a chun a lalchutphah uh hun kawih chiet un au.

¹⁶Ei taihsan u a, pathien dangte kawmah gimlim a hâl u a; amau haw khutsuok ngêi a ho u a, a gitloh na hawu chengcheng chunga ka lunggel haw chuh phuong ing ka.

¹⁷Zieziekchun, puon cheng inla, kipan inla thu ka hun piek chengcheng khah a zak dingun va gen ah. A masang u ah taisie ki’n, khutilochun a masang u ah hun taihsiet sak kha’ng ka.

¹⁸Ngaitie, tuni hin a gam pumpiu a Juda lengte, a lawiupateu, a thiempu teu leh zie gama mite leh khawpi kulh nei haw leh thik khuom leh sumsan banga ka hun siem na hi.

¹⁹Hun do untin uh, himahlele hun zo puo’n au; nang hun hukdawk dingin na kawmah ka um ngâla,” tih hi LALPA kamsuok ahi.