Read Gangte JEREMIA 11 Bible Online

JEREMIA 11 - Gangte bible

JEREMIA 11

¹Jeremia kawma LALPA thu hung tung chun hiti hin a gen hi.

²“Zie thugawlh um zie hi ngaitha’n la, Juda mite leh Jerusalem a chêngte kawm achun gen in.

³Chun, nangin a kawm u ah, LALPA Israel Pathien chun hiti hin a tii: ‘Zie thugawlh thu ngaitha lo chuh hansie dawl in um hen,’ a tii.

⁴Zie chuh na pileputeu Aigupta gama thik hâltuina mei apat a ka puih dawk ni a ka kamsuok ahi, ka thu zawp unla, ka thupiek chengcheng chuh zawp un, ti a ka thupiek chuh ahi. tichun ka mite hi’n na tin un, keile nang u dingin Pathien hi’ng ka.

⁵Khuoizu leh bâwngnawi a luong gam, nanguh hun suonte kawma kipautiem a piek ka tiem kha ka sukpitit theih na dingin, tuni guol hin,” a ti a. Chun, kei chun, “Hi hen, Aw LALPA,” ti’n ka dâwng a.

⁶Chun, LALPA’n ka kawmah, “Juda khawpi haw leh Jerusalem kawtthêl haw achun zie thu hi phuong unla, zie thugawlh thu hi ngaithau inla, zawp un.

⁷Nanguh hun suonte Aigupta gam apat a ka puihdawk ni apat tuni tieng hin ka pau kamsuok zawp un, ti’n zingpi a tho in amau haw chuh phachuomngai takin ka hilh seka.

⁸Mahleh a zui puou a, a bil u le a dawh diek puou a: mitin chuh amah lunggil gitloh na dungzui in a um zaw tau hi. Zieziekchun, zie thugawlh thu a zuih ding u a ka piek hi a zawp nuom puou a, ziehaw chuh a chung u a ka hun tun sak ahi tai,” a ti a.

⁹Chun, LALPA chun ka kawmah thu a gen kit a, “Juda mite leh Jerusalem a chêngte lak achun a gûk a thil phalo bawl guotna a um hi tih muhdawk in a um tai.

¹⁰A pileputeu, ka thu ngaitha nuom lote thulimlohna lam achun a vaikit u a; pathien dangte nasem dingin a chieh u a, Israel inkuon te leh Juda inkuonte chun a pileputeu kawma ka thugawlh chuh a bawhsie tau hi.

¹¹Zieziekchun LALPA chun hiti hin a tii: Ngaitiem u, a chunguh ah thil phalo, a pumpelh loh hiel dinguh hun tunsak ding ka hi, ei sam un tin, mahleh dâwng lo ding ka hi.

¹²Chun, Juda khawpite leh Jerusalem a chêngte chun pathiente a kawm u a gimlim a hâl sek teu chuh sam un tin, mahleh, a buoinau ah ziehaw chun amau hukdam hiel puo’n a.

¹³Aw Juda, na pathiente chuh na khawpi zah hielin a tam u a, thil zahchâk um tak, Baal kawma gimlim hâlna ding maichâm Jerusalem kawtthêl zah hiel na zahchâkna dinguh na siem tau a.

¹⁴Zieziekchun, ziehaw hi ngetsak ki’n la, amau dingin aw suoh in paucham sak diek ki’n; a buoi tieng u leh ei sap u chuh ngaitha lo ding ka hi ngâl a, ti’n.

¹⁵“Thil kihdak um tak hih kawmin, ka deihtak chun ka In ah chan banga a neih ding? Thutiem leh sazek chun na sietna dinguh hun pelh sak thei ding ahim? Kisuonpih thei ding na hiu em?

¹⁶LALPA chun na min dingin. olive thing hing, ‘gah pha hawih tak’ a hun sa a. A chung achun huihpi guola gi lullul in mei tik intin, a bâkte chuh katum zo ding ahi.

¹⁷“Sepaihte LALPA nangmah hun phutpa chun, Israel inkuon leh Juda inkuon te gitlohna, Baal kawma gimlim hâla, ei suklungnat nau thil, amau sepdawk chunga thil phalo ding thu chuh a phuongdawk tai.”

¹⁸LALPA chun ei hetsak a, ka he tai; tichun. nang ngêi in a thil phalo hihteu chuh nei kâwkmuh ta a.

¹⁹Himahleh, kei chuh la belamno thunuom tak, thah dinga puih bang mai ka hi. Thing chuh a gah pum in susiei ting un, mihing gama pat hin amah chuh sumang kei hitiu: Amin himhim zak loh na dingin, ti a ka chunga a thilbawl guot u chuh ka na he pha puoh a.

²⁰Himahleh, “Aw Sepaihte LALPA, diktaka vaihawm pa, sunggil lam leh lunggil patep sek pa; a chung u a na phuba lak chuh ei muh sak in. Ka chungchâng thu hi na kawmah ka hun vawp sak ngâl a.”

²¹Zieziekchun, Sepaihte LALPA chun Anathoth mi na hinna hawlpa, “Ka khutlum u a na thih lohna dingin LALPA min in genlawk kih,” tite chung thu achun hiti hin a tii:

²²Ngaitiem u, amau haw chuh gawt ing ka ting, a tangvalteu chuh chemzâm in thiu intin, a chanu teu, a chapa teu chuh kiel a hung thi ding ahiu hi.

²³A suokcha um hiel puo’n au, Anathoth mite chung achun thil phalo tunsak ding ka hi ngâl a, a gawtna dinguh kum ngêi u chuh.