Read Gangte JEREMIA 15 Bible Online

JEREMIA 15 - Gangte bible

JEREMIA 15

¹Chun, LALPA chun ka kawmah hiti hin a gena, “Mosi leh Samuel ka masang ah hung ding mahleu le; ka lunggil in zie mite lam hi nga diek puo’n a. Ka muh phakloh in nawhdawk inla, chieh mang u hen!

²Chun, khawi ah ka chieh mang ding um? ti a a hun dawt tieng u leh hiti hin dâwng in, LALPA’n hiti hin a tii, ‘Hipi a thi ding haw chuh hipi kawmah, chemzâma thi ding haw chuh chemzâm ah; kiel a thi ding chuh kiel ah, saltâng dingte chuh sal ah,’ ti’n.

³Thil chili a chung u ah guotsak ing ka tih hi LALPA kamsuok ahi. Chemzâm chuh thah na dingin, ui haw chuh pet tel dingin, chung leng vachate leh leichung a gamsa haw chuh ne mang ding leh sumang dingin.

⁴Juda leng Hezekia chapa Manasseh in Jerusalem a a thilbawl ziekin leichung a lalgam haw lak ah nung leh ma ah nawh viel viel ing ka.

⁵“Aw Jerusalem, kuo a hun lungsiet ding? Kuo a hung lungkham pih ding? Na chanchin hun dawng dingin kuo a na kawma hung ding?

⁶Nangin nei paih tha a, na nungtawlh zel a tih hi LALPA kamsuok ahi. Khutichun, na chungah ka khut ka tha a, ka hun sumangthai a, kisik hi ka chim tai.

⁷Gamsung a khawpi kawt haw a chun, amau haw chuh buhsi bangin ka zap a, cha bei in ka siem a; ka mite chuh ka sumang a, a umdan uh a kisik diek puou hi.

⁸Luipi pîlnel sanga tamzaw’n a meithai teu hih pung ing ka ting, a tangvalteu chuh a vanglai tak un a hihsie ding sun lai takin sawl ing ka ting; a nuteu chung achun lunggimna leh tizatna a chunguh ah thakhat in ka tunsak ta a.

⁹Cha sagih hing nu chuh a chau ta a, a thagau a thah ta a; sun ahih lai in nisa chuh a tum ta a. A zahhuoi in a min a sie a. Chun, a dang cheng chuh a melmateu in chemzâma a thah dingun pie’ng ka,” tih hi LALPA kamsuok ahi,

¹⁰Ka chung a gik na e! Ka nu’n lei chung pumpi a kiniel hât leh kina mi a nei na hin hi. Kuomah a ka khel puoh a, kuomah a ka palâk diek puoi. Himahleh, ei hansiet khum chiet tho u a.

¹¹LALPA chun, Tihtakzet in chuh thilpha a dingin hun hun sudet ing ka ting; tihtakzet in chuh siet ni leh gimtheih ni’n melma chuh na kawmah khutdawh sak ing ka, a ti a.

¹²Thik leh sumeng chun mâllam apat thik chuh a subawng thei dinguh a ahim?

¹³“Na sumlepai leh na gothilte chuh na gitloh ziek in aman bei in gâllâk in pie’ng ka, na gamgi tiengin.

¹⁴Gam na hêtkhâk loh u achun na melmateu lak ah hun kawih ing ka. Ka lungnat na mei na chunguh ah a kuong dawk ta ngâl a,” ti’n.

¹⁵Ziephet chun, ken “Aw LALPA nangin na hechien a, ei hezing inla, ei hung veh in. Ei sugimtheite chung achun phuba ei lak sak in. Na zahngaihna ziekin ka hinna hi sumang hiel ki’n; Nang mah ziek a minsietna tuok ka hi tih he’n.

¹⁶Na thu chuh suklat ahi ta a, na thute chuh ka ngaitha a. Aw LALPA Bangkim hihthei Pathien, nanga ka hi a. Na thu chun ka lungthim hi lawpna leh kipah na’n a hih dim a.

¹⁷Nawpchenna maia hun mangte lak achun ka tel puoh a, ka kipahpih puoi. Na thu zawp in keingawn in ka um a, himahleh, lungnatna’n nei sudim ta a.

¹⁸Bangti dana ka thuokna hi tawp lo a, sukdam ut lo bang mai ahi; ka natna hi sukdam loh ahim? Keia dingin luicha thephat tui kang sek bang na hi,” ti’n.

¹⁹Zieziekchun, LALPA chun hiti hin a ti a, “Na kisik chun hun tung ding kit ing ka ting, chun, ka masangah ding kit ding na hi. Asie hilo a thilpha ngen na gendawk chun ka kam tawbang hin la. Amau chun nang lam hun nga kit un tin, himahleh, nangin vang amau lam na ngat ding ahi puoi.

²⁰Chun, zie mite a ding hin sumeng kulhpi’n hun siem ing ka ting, hun do un tin, mahleh hun zo puo’n au. Hukdam ding leh hukdawk dingin na kawm u ah ka um ngâl a,” tih hi LALPA kamsuok ahi.

²¹Chun, minunsiete khuta kipat chun hun tandawk ing ka ting, chun, hehpihna neilote khut apat hun hukdawk ing ka.