Read Gangte JEREMIA 17 Bible Online

JEREMIA 17 - Gangte bible

JEREMIA 17

¹Juda gitlohna chuh thik kawlawm leh suongmantam hiem haw a zik a hi a; a lunggil pêk hawu a chuh kuok hiela zik a hi a, a maichâm ki hawu achun tawh.

²Thing hing bul tin leh, tâng sang chunghaw achun a chateu in a maichâmteu leh Asher te chuh a hezing ngâl uh a.

³Aw nang ka tâng! gamsung pumpi a na gitloh na ziek hin, na sum leh na go chengcheng te, na munsangte tawh gâllâk in pie’ng ka.

⁴Tichun, na chanvo ding ka hun piek khah chan in na tin, na gam het khâkloh gam achun melmate na hun sep sak ing ka. Ka lungnatna mei, kumlekhuo a kuong ding chuh na mût kuong ta ngâl a.

⁵LALPA chun hiti hin a tii: “Mihing a kinga a, mihingte bân thahatna suong a; LALPA kiheimangsanna lunggil nei chuh hansie dawl in um hen.

⁶Amah chuh thaleka ham bawkniem gaw lim lem tawbang a hi a, thilpha hung pawt ding himhim mu puo’n a. Thalek gamgaw, chi-leisiet, kuomah luoh lohna gam achun cheng zaw’n au.

⁷“LALPA gingcha a, a ginna LALPA a ngate vang chuh a hamphau hi.

⁸Amau chuh lui luong panga thing phuh, lui panga a zung khawh, khuolum hungtun ding le lau lo, a nah le hing zing, khuokhal kum khawksalo; gah loh tik neilo tawbang hi hi zaw’nau.

⁹“Lunggil hi thil chengcheng sanga thep hatpen, sie tâwp khawk a hi a; kuo a hethiem thei ding?

¹⁰Kei LALPA hi, mitin a umdan dungzui leh, a nasep gah hawu bang zela pie dinga lunggil mudawkpa leh lungthim patep sek pa chuh ka hi.”

¹¹Mi, diklo taka hung hausa chuh, vasie, amah tui hilo awpkêu tawbang a hi a, ziehaw chun a damsung ngêi in amah chuh nusieh intin, a tâwp leh mingawl hung hi mai ina.

¹²Ka Mun Thiengtho uh umna chuh Lalchutphah lopi tak, atûng apat a chawihsân a um tawbang chuh a hi ngâl a.

¹³Aw LALPA, Israel te kinepna na hi a, nang hun taihsan taphawtte chuh muolpho in um un au. Nang hun kiheimangsan te chuh leivui laka min zik bang phetin mangthai un au, hinna tuinak, LALPA chuh a taihsan ziekun.

¹⁴Aw LALPA ei hihdam inla, tichun, dam ing ka, ei hukdam inla, tichun, bit kêi in um ing ka. Ka pahchak zing sek chuh na hi ngâl a!

¹⁵Ngaitie, mipite chun ka kawmah, “LALPA thu chuh khawia um ahim hung tung he’n,” a ti sek uh a.

¹⁶Himahleh, aw LALPA, a chunguh a thil phalo tun sak dingin ka hun sawl kha puoh ngâl a! A sietna dinguh ni le ka deih sak diek puoi tih le na hêi. Ka thugen haw le na he vek ngâl a.

¹⁷Himahleh, keia dingin tizat-um hi ki’n la, buoina hungtun phat leh ka bitna mun pên na hi ngâl a.

¹⁸Ei sugimtheite chung achun zahchâkna tun sak inla, himahleh aw LALPA, kei vang ei suzakcha ki’n. Amau haw chungah sietna tunsak in la; sietna thuohnih in amau sumangthai in.

¹⁹LALPA chun ka kawmah hiti hin a tii: “Jeremia, kulh kawtkhak lun pên, Juda lengte lutna leh. pawt vielna achun va chieh inla, ka thuchah hi va phuong in; chun, Jerusalem kawtkhak danghaw achun le va chieh inla,

²⁰Lengte leh, Juda mipite chengcheng kawma leh, mi tin, Jerusalem a chêngte leh, zie kawtkhaka lut sekte cheng kawm achun ka thugen hi va hilh in.”

²¹LALPA chun hiti hin a ti ie: “Na hinnau na deih uh chun, Chawlhni’n puokgik himhim puo kiu inla; Jerusalem kulh kawtkhaka le lut pih diek kiu in.

²²Chun, Chawlhni’n na In uh apat in puokgik na puok dawk dinguh a hi puoh a, na mawng mawng le na sep loh dinguh ahi. Nanguh hun suonte kawma ka thupiek bangin, Chawlhni chuh na nit thiengtho dinguh a hi” ti’n.

²³Himahlele, amau in a ngaitha puou a, a bil uh le a dawh diek puou a; thununna thu chuh a muh uh a, a het lohna dingun a lunggil uh a sukhauh zaw ngâl uh a.

²⁴Chun, LALPA thu pawt chun hiti hin a tii: Khawksa tak a ka thu na ngaihthak u a, chawlhni a zie khawpi kawtkhaka chu thil gik na puoklut loh u a, na himhim sem lo a chawlhni na nit thiengtho u chun,

²⁵Zie khawpi kulh kawtkhak ahin lengte leh vaihawmte, David chutphah a chu ding chuh kangtalaite leh sakawlteu a chuong in hunglut untin, amau haw leh a vaihawmteu, Juda mite leh Jerusalem a cheng te tawh; tichun zie khawpi ahin mi tamtak cheng den tan au.

²⁶Juda khawpi leh Jerusalem kiengvêl apat chun, Benjamin gam apat te, Sefelah gam apat te, tânggam apat te leh simlam apat te chun hung un tin, hâlmang thillat leh kithawihna, changbuong thillat, gimlim haw, kipahthu genna haw LALPA In achun hun chawi un au.

²⁷Himahleh, chawlhni nit thiengtho ding leh, chawlhni a puokgik puo lo a Jerusalem kulh kawtkhak a lutpih loh ding thu a ei ngaihthak loh u chun, a kulh kawtkhak haw chuh mei in ka’n tin, Jerusalem a leng In te chuh katum zo intin, mit ngei ta puo’n a.