Read Gangte JEREMIA 18 Bible Online

JEREMIA 18 - Gangte bible

JEREMIA 18

¹LALPA apat a Jeremia kawma thu hung tung chun.

²“Tho inla, bêldêngpa In achun va chieh inla, zie tak achun ka thute hun hetsak ing ka,” a ti a.

³Tichun, bêldêngpa In achun ka va chieh ta a, bêldênna mun achun na a na sem a.

⁴Tung a bel a siem lai chuh a hung siet chun, bêldêngpa chun pha a sak bangin bel dangin a hun bawl kit mai sek hi.

⁵Tichun LALPA thu chuh ka kawmah a hung tung kit a;

⁶“Aw Israel inkuonte haw, bêldêngpa hih bang hin ka hun hih thei puoh a ahim? LALPA’n a tii. Ngaitiem u, bêldêngpa khuta tungman bang hin ka khut a um na hiu hi, Aw Israel inkuonte haw.

⁷Bangtik inle namte chungah ahim, gam chungah ahim ah, bawt dawk ing ka ting, phie’ng ka ting, susie’ng ka tih ana gen ta leng le,

⁸Zie nam chun thil phalo a chung u a tung ding apat a a hung kihei kit u chun, a chung u a thil phalo bawl ka guot chuh hai kit ing ka ting,

⁹Chuleh, bangtik inle namte chungah ahim, gam chungchâng thu ahim ah siem ing ka ting, phutdet ing ka ti’n a na gen ta leng le,

¹⁰Ka kamsuok ngaitha lo a, ka mitmuh a thil phalo ahih u chun amau dinga thilpha hih ka guot chuh haihsan ing ka.

¹¹Zieziekchun Juda mite leh Jerusalem a chêngte kawm achun, LALPA’n hiti hin a tii; Ngaitiem u, na chung u ah thil phalo ka gel a, na chunguh ah thil ka guonggalh a, tuhin mitin in a umdan phalo teu taihsan u hen la, na umdan u leh na thilhih teu siemphau in, va ti phawt in.

¹²Himahlele, amau chun, kinep a um puoi, ka lemguot dân chiet un um ka ting un, mitin amah lunggil gitlohna bangin bawl ung kau,” ti’n au.

¹³Zieziekchun LALPA’n hiti hin a tii: “Nam dangte dawng mah tiem u, tuma’n zie tawbang thil hi ana um kha ngei em? Nungak thieng Israel chun thil tizat-um tak a hih tai!

¹⁴Lebanon tânga Sirion suong phawm lak haw achun vuk umloh kal a um ngei em? Ahihloh leh, tâng a tui chuh a kang in, luicha tui vawt hung luongte chuh a kang ngei em?

¹⁵Himahleh, ka mite chun vang ei hengilh tau a, milim pathien haw masangah gimlim a hâl tau a. Ziehaw chun a chieh na lampi hawu achun a kisuih sak a, lampi lui u chuh zui lo in, lampi neu haw achun a chieh tau hi.

¹⁶A gam uh suchavai ding leh, kumlekhuo a hagawih khum ding leh a vakviel taphawt ten maksa’n a luchang uh thin khum un au.

¹⁷Suohlam huihpi bangin melmate âng ah thehzak ing ka ting, a vangsiet niu chun, ka mai hilo, ka tukkhuk etsak ing ka.”

¹⁸Tichun, amau chun, “Hung tiem u, Jeremia hi mat ahih theihna ding ngaihtuoh hitiu, thiempute lak apat dân thu bei ding ahi puoh ngâl a, mipil apat in lemguotna, chun, zawlnei apat in thu bei diek puo’n a. Hung tiem u, gensie sausau hitiu, a thu himhim ngaihsak hiel puoi tiu,” a kitiu a.

¹⁹“Aw LALPA ngaihsak inla, ka ngetna hi a na ngaitha tie!

²⁰Gitlohna hi thilpha ditthukna ahi ngei em? Amau haw’n vang ka hinna dingin kawkhuk a lai u a, amau apat na lungnatna bei ding leh, amau dinga thilpha gen dinga na ma a ka din sek kha hezing in.

²¹Zieziekchun, a chateu chuh kiel in thih sak inla, chemzâm a thah in um u hen. A ziteu chuh cha bei in, meithai in um sak in la, a pasal teu hipi’n thiu hen la, a tangval teu le kido na chemzâm in thah hiu hen.

²²A chung u ah sepaih haw hun tun sak phut in, a in hawu ah kah thawm zak hi hen. Kei ei matna ding un kawkhuk a lai ngâl u a, ka keng awkna dingin thâng a kam ngâl u a.

²³Himahleh, nangin aw LALPA, ei that dinga a kisak na hawu cheng na he a, a manlohnau ngaidam ki’n la. Na mitmuh apat in a gitlohnau thaimang diek ki’n. Na masang achun paih thak in um u hen la, na lungnat ni chun amau chuh paih thak in um u henla, a chungchâng uh ngaihtuoh in.”