Read Gangte JEREMIA 19 Bible Online

JEREMIA 19 - Gangte bible

JEREMIA 19

¹LALPA chun hiti hin a tii, Chieh inla, bêldêngpa leibel va chaw’n la, chun, mipite laka upahaw leh thiempute laka upahaw pui in la;

²Harsith kawtkhak lutna bula Ben-hinnom guom achun chieh in la, zie tak achun na kawma thu ka hun hilh ding hi phuong in.

³Hiti hin gen in, “Juda lengte leh Jerusalem a cheng te haw, LALPA thu hi ngaithau un, Israel Pathien, Sepaihte LALPA chun hiti hin a tii. Ngaitiem u, zie mun ahin a za taphawtte bilngêk na hiel dingin thil phalo hun tunsak ing ka.

⁴Kei ei kiheimangsan u a, zie mun hi a subuok u a, amau leh a suonteu leh Juda leng te’n le a hêtkhâk loh uh pathien dangte kawmah gimlim a hâl ziekun leh zie mun hi pawi khawih lo thisan a a sukdim tâk ziek un.

⁵Baal kawma hâlmang thillat dinga a chateu a hâlna dinguh a a munsangte chuh a siem ziekun; zie chuh ka thupiek ahi puoh a, gen le ka gen puoh a, ka lunggil a le a um kha puoi.

⁶Zieziekchun, ngaitie, nite chuh hung tung ding ahi, LALPA’n hiti hin a gen hi. Zie ni haw achun zie mun hi Topheth kiti ta puo’n tin, Benhinom guom le kiti diek ta puo’n a, kithahna guom tih hizaw ta’n a.

⁷Tichun, zie mun ahin Juda leh Jerusalem thil guot haw chuh bangmahlo suok sak ing ka ting; chun, amau chuh a melmateu masang achun chemzâm in thah sak ing ka ting, a luong hawu chuh chung leng vachate leh lei a gamsate an dingin pie’ng ka.

⁸Chun, zie khawpi chung ahin zie tawbang thil tizat-um tak chuh tunsak ing ka ting, a hawh malam taphawtte chuh maksa takin phuguih un au.

⁹Chun, a chapateu leh a chanuteu sa chuh nek sak ing ka ting; chun a melmateu leh a hinna lak guo ten a ûmkimvel u a, a suklungkham tieng u leh mitin chun a invengte sa chuh ne’n au.”

¹⁰Chun, na kitawnpihte mitmuh in bel chuh khen kek in na tin,

¹¹a zak un hiti hin gen in, Sepaihte LALPA chun hiti hin a tii: “Zie tawbang hin zie mite leh zie khuo hi susie ding ka hi; bêldêngpa bel mi’n a sukgawp a, siemphat kit theih ahih loh bang hin, chun, Topheth ah chun vui un tin, a vuihna ding, mun umlo khawp in.

¹²Khutibang tak chun zie mun hi bawl ing ka, tih hi LALPA kamsuok ahi. Chun, khutibang mah in zie khuo hi Topheth bang hiel a siem in, a sung a chêngte chung achun hih ing ka.

¹³Jerusalem in haw leh Juda lengte in haw chuleh a chunga van lam thilte kawma gimlim na hâlna chengcheng leh, pathien dangte kawma dâwn ding thillat sundawk sekna haw cheng chuh Topheth bang mai in sukbuok hi’n a,” ti’n.

¹⁴Chun, Jeremia chuh hilhlawkna thu gen dinga LALPA’n a sawlna mun Topheth apat chun a hunga, chun, LALPA In huongsung achun a ding a, mipi haw kawm achun hiti hin a gen a.

¹⁵“Israel Pathien, Sepaihte LALPA chun hiti hin a tii: Ngaitiem u, ka thu ngaitha lo dinga a kisukluhlul ziek un, zie khawpi leh a khawpel haw chung ahin sietna ka gen haw kha hun tunsak ding ka hi” ti’n.