Read Gangte JEREMIA 2 Bible Online

JEREMIA 2 - Gangte bible

JEREMIA 2

¹Chun, LALPA thu chuh ka kawmah a hung tunga, hiti hin a gen a;

²Chieh inla, Jerusalem zak in kiko inla, LALPA’n hiti hin a tii, ti’n: “Na khangdawng laia na nunnem zie te; kihuol laia nei hehpih ziete khah ka hezing hi. Gamgaw muntin ale nei zui a, bangmah chin khâk loh na gam haw ale nei zui sek kha.

³Israel chuh LALPA a ding a kawihchuom, a gah pung masa ahi. Amah ne zo te chuh thiemloh chang untin; a chung u ah sietna hung tung ina,” tih hi LALPA kamsuok ahi.

⁴Aw Jakob inkuon leh Israel inkuon chengcheng te haw, LALPA thu hi ngaithau un.

⁵LALPA chun hiti hin a tii: “Na pileputeu in kei ahin dikloh na bang a muu hi? Kei apat in gamla tak ah a chieh mang u a; thil thulimlo a delh u a, bangmah lo mai a hung hih u hi,

⁶Aigupta gama pata ei puidawk a, gamthip gamgaw kawkhuk leh thihna lim leh gamgaw mun, kuomah chen loh na mun apat a ei puidawk pa LALPA kha khawia um ahi ta? a ti diek puou hi.

⁷Gam phatak agah leh aphatna chen dingin ka hun puilut a, himahleh, na lut phet un ka gam chuh na subuok u a; ka go chan chuh thil ten um na suok sak tau hi.

⁸Thiempu te’n la, ‘LALPA chuh khawia um ahi,’ le a ti diek puou a, dân enkawl te’n le ei he diek puou a; vaihawm te chuh ka chung ah a hel u a, thiemgau te’n le Baal min in thu a gen u a, thilpha chuom lo a delh tau hi.

⁹Zieziekchun, hun kilanpih ing ka ting, na chateu chate le kilanpih zing ing ka,” tih hi LALPA kamsuok ahi.

¹⁰Kittim tuikuol a chun va chieh unla, en mah tiem u; ahih loh leh Kedar ah mi sawl unla, guntak in ngaihtuoh tiem u, hitibang thil hi a um kha himhim em hetna dingin!

¹¹Nam dang te chun pathien tak hilo mahleh, a pathien uh a sang ngei puou a, ka mite’n vang kei a lopi na Pathien uh hi thil phachuom lo tawh ei theng tau hi.

¹²Aw van te haw maksau inla, tiza’n kilîng un tih hi LALPA kamsuok ahi.

¹³Ka mite’n thil phalo nih a hih ta ngâl u a, kei hinna tuikhuk ei taihsan u a; tui kitin na ding tuikhuk a lai u a, a tuikhuk laih u chuh a khi, tui kiting theilo ding chuh!

¹⁴Israel chuh suok ahi a ahim? Suok a pu In a pieng den ahim? Bang zieka tawhden a um ahi ta’m?

¹⁵Sakeibaknei vanglai te chun a ngîk u a, ngeih tak in a chung ah a kitum u a; a gam chuh a susie zo tau a, a khawpi te le a luoh ding umlo in a kâng tum zo tai.

¹⁶Noph mi leh Tahpanes mite’n le na lusip a sukawlh zo tau hi.

¹⁷LALPA na Pathien chun lampi a a hun puih laia na taihmang san ziekin, zie chuh na chunga na tunsak hilo ahim?

¹⁸Nile luipi tui dâwn dinga Aigupta lampi na hawh hi nang a dinga banga phachuom? Euphrates tui dâwn dinga Asuria lampi na hawh hile nanga ding a banga phachuom?

¹⁹Na gitloh na ngêi chun hun thawk sak intin, na nungchawn sek na haw chun hun hilhgaih ina; ei kihchak na neilo a LALPA na Pathien na taihsan hih thil gilo tak leh kha tak ahi, tih hi hun hedawk in muchien inla tih hi, LALPA Sepaihte LALPA kamsuok ahi.

²⁰Malai a kipat khan na namkawl chuh na kisukbawt a, na kânna khaugui le na sutan a; tichun, nasem ta puo’ng ka na ti a. Tang sang chung haw leh thingbawk nuoi tin cheng achun nawhchizuok guolin na kûn viel viel a.

²¹Chi diktak manga grep chi thieng tak a ka phuh na hih maizen tawh; bangti dana kihei a kei a dinga grep lêm hung suok ta mai na him?

²²Changal a kisil in sahbawn tamtak mang mahleh chin, na gitloh na chuh ka mitmuh in a kilang tho hi tih hi LALPA Pathien kamsuok ahi.

²³Ka kisubuok puoh a, Baal pathien le ka delh puoi, bang ti a ti thei na him? Phaicham a na nung chang chuh en inla, na thilhih sa haw chuh kihet in. Sangawngsau tuoi hûk tai viel viel tawbang phet na hi.

²⁴Gam sabiltung thalek a um sek, a hûk zieka ha viel thethu bang in; a utchakna chuh kuo a nang zo ding? A hawlte chuh kisuchawl nuom kiu hen, a hun leh mu zieng ding ahiu hi.

²⁵Na kenga kengtawbek butlo in um ki’n la, na dang le châk kihen. Nang chun la kinepna a um ta hiel puoi, gamdang mite delh ing ka, na ti a.

²⁶Gucha matdawk ahih a a zahchâk bangin, Israel inkuon te le a zakcha tau hi, a leng teu leh a milien teu, a thiempu teu leh a thiemgau teu chun.

²⁷Thingbul kawmah, “Ka pa na hi,” a tiu a. Suong tum kawmah, “Ei hingpa na hi,” a tiu a. Ei nungngat u a, himahleh, a buoi tieng u leh, tho inla ei hukdam in, tin au.

²⁸Na pathien siem te kha khawitak ah a um tau hi? Amau chuh tho u henla, na buoi na ah a hun hukdam thei kha mawh ding u? Aw Juda, na pathiente chuh Juda khawpite zah zet ahiu hila.

²⁹Bang zieka ka chunga phun zing na hiu hi? Na bawn un ka chungah na hel ngâl u, tih hi a LALPA kamsuok ahi.

³⁰Na chateu ka zêp a la a phachuom puoh a; a phatpih diek puou hi. Sakeibaknei gawlham tak bang mai in na chemzâm teu in thiemgau te a that zo ta a.

³¹Aw khangthak te haw LALPA thu hih ngaihsak un, Israel a ding chun gamthip tawbang ka hi a ahim? Bangti dana ka mite chun, ka pawt chien tau a, na kawmah hung vaikit ta puo’ng kau, a tih uh ahim?

³²Nungak in a kicheina haw a hengilh in, mo thak in a kithuomna a hengilh thei em? Ka mite’n vang ei hetngilh niu hi simsen ding guol ahi ta puoi.

³³Ahun deihchate muh theih na dingin na um dân na hih fel a, numei gilo haw kawm ale na umdan na sinsak ta hi.

³⁴Na puonchen nasan ah mi gimthei, thilsie bawllo te hinna thisan a bek hi. A hun buluh te na thah le hi sâm lo in,

³⁵zie malak chun nangin, thiem ka chang hi, ka chunga lungnat na a dai hi, na ti behlap nalai a. Ngaitie, “Ka gilo puoi,” na tih ziekin na chung thu ngaihtuoh ing ka.

³⁶Bangti dana baihlam taka na umdan theng viel zung zung sek na hi? Asuria’n a hun sukzahchak bangin Aigupta’n le hun suzakcha ding ahi.

³⁷Na lu chunga khut kilhtuoh in a kawm u apat hung pawtdawk inla, na kiginchak na haw chuh LALPA’n a paih tha ta ngâl a; amau haw ziek chun hausa puo’n la.