Read Gangte JEREMIA 20 Bible Online

JEREMIA 20 - Gangte bible

JEREMIA 20

¹Chun, Immer chapa, LALPA in a hotu lienpen, thiempu Pashur chun Jeremia thugen lawk haw chuh a na za a.

²Ziephet chun, Pashur chun thiemgau Jeremia chuh a zêp a, LALPA In a Benjamin kawtkhak chungnung a suongkul a chun a khum ta a.

³Chun, a zing chun Pashur chun Jeremia chuh suongkul apat chun a thahdawk phet chun, Jeremia chun a kawmah, “LALPA’n na min dingin Pashur a sa puoh a, ‘Magor-misahib’ a sak zawk ahi.

⁴Chun, LALPA’n hiti hin a ti ngâl a: ‘Ngaitie, nang a ding leh na guolte chengcheng a dingin tizat-um in hun siem ing ka, tichun, a melmateu chemzâm in thah hiu un tin, nangin zie chuh na mit ngêi a mu ding na hi. Judate chengcheng chuh Babulon leng khut ah pie vek ing ka ting; amah chun Babulon ah sal in pui in tin, chemzâm in that in a.

⁵Zielo chule khawpi hauhsakna chengcheng te, a sepdawk chengcheng teu, a go thillul haw cheng leh Juda lengte go haw cheng chuh a melmateu khut ah pie’ng ka ting, amau chun buluh un tin, kilak un tin, Babulon lam ah kipuok un au.

⁶Chun, nang Pashur, na insung a um haw chengcheng tawh sala puih in um in na tin; nangle Babulon ah chieh in na tin, nang leh na guolte zuou thu na hilh sekte chengcheng hi tawh zie tak achun thi’n na tin, zie tak achun vuih hi ding na hiu,’” a ti a.

⁷Aw LALPA, nang in nei na thêm a, thep a um ka hi ta hi. Nang chuh kei sangin na hatzaw a, nei zo ta a. Nichang tumin nuihzatbuk ka hi a, micheng in ei nuihsan u a.

⁸Thu ka gen cheng leh ka kap dawk seka, “Kipawngbawlna leh suksietna” ti’n ka kiko dawk a. LALPA thu chuh kei a dingin sun ni tum a dem leh muhsit lawhna mai ahih ziekin.

⁹“Amah min chuh gen kha ta puo’ng ka ting, Amah min in le thu gen ta puo’ng ka,” ka ti a. Himahleh, ka guh sung ahin mei-âm kikhum bang mai in ka lunggil sung ahin a sa hut hut a, ka thip hiet hiet thei puoh a, ka kichawl thei puoh ngâl a.

¹⁰Mi tamtak te’n, ning tin ah lauh-um a um a. Kihetloh sak un la, pang khawm hitiu, ti a a phunguk sausau uh ka za a. Ka melhet ka puk chânggu zing sek te chun, thep in um intin, zo ding I hiu, a chungah phuba lai tiu, a tiu a.

¹¹Himahleh, LALPA chuh mi hangsan lauh-um tak bangin ka kawmah a um zing a. Zieziekchun, ei dote chuh puk untin, ei zo puo’n au. Zahhuoi takin um untin, a lawhtit loh ding ziekun. A kumkhuo minsietnau chuh hetngilh in um ngei puo’n a.

¹²Himahleh, Aw Sepaihte LALPA, mi diktatte pateppa, lungthim leh lunggil mulet sek pa; a chung u a na phuba lak chuh ei muhsak in. Na mitmuh ah ka chungchâng thu hi ka hun taklang ta ngâl a.

¹³LALPA pakcha’n la sau unla, LALPA chuh pakchau in. Thil gilo hihte khut apat panpih ngaite hinna chuh a tandawk ta ngâl a.

¹⁴Ka pienni chuh hansie buok in um hen la, ka nu’n ei hinthak ni chuh vangsak in um kihen.

¹⁵Ka pa kienga, “Chapa na nei tai,” tih thu hun tun a, hun sukipakpa chuh hansie dawl in um hen.

¹⁶Chun, zie mihiem chuh LALPA’n lungsiet lo hiela a sukchim khuo tawbang chuh hi hen; zinglam in kiko thawmgi za hen la, sun ahih tieng leh gâl lauh thawmgi za hen.

¹⁷Sûl a ka um laia ei na suklup loh ziek khan, khuti hileh ka nu chuh ka thân himai ding ahi a. A sûl chun kumkhuo a ei na vawp mai ding hi ven.

¹⁸Bang zieka semgim leh lungkhamna hi mu dinga, ka damsung nite zahchâkna leh hih mangthai a um ding chauh a, sûl apat a hung pawt khel khel ka hi die aw?