Read Gangte JEREMIA 23 Bible Online

JEREMIA 23 - Gangte bible

JEREMIA 23

¹Ka gan tatna muna belamte hihmangthai a, delh zak sek belampute chung chuh a gik hi! tih hi LALPA kamsuok ahi.

²Zieziekchun, LALPA Israel Pathien chun, ka mite vengpa belampute chung thu achun hiti hin a tii: “Ka ganguol haw chuh na sudalh uh a, na delh mang uh a, na ngaihsak puou hi. Ngaitiem u! na thilhih dikloh ziekun hun tawh tha ding ka hi, LALPA’n a tii.

³Tichun, ka ganguol umsunte chuh ka delhzak na gam haw apat chun pui khawm kit ing ka ting, a huong sung u ah hâwi khawm ing ka ting, gah nuom takin um un tin uh, hung pung un au!

⁴Amau haw ngaihsak ding belampu kawih sak ing ka ting, lau kit ta puou un tin, lungkham diek ta puou un tin uh, a mangthai himhim le um diek ta puo’n au, tih hi LALPA kamsuok ahi.”

⁵“Ngaitiem u! David dinga bâk diktak ka seldawk sak hun ding chuh hungtung ding ahi, tih hi LALPA kamsuok ahi. Amah chuh leng in chu’n tin, chingthei takin hih ina. Chuleh, gamsung ah dikna leh kitûpna um sak ina.

⁶A hun sungin Juda chuh hukdam hiu un tin, Israel chuh bit takin um ina. Chun, ziehi a min a sapna dinguh chuh a hi: ‘LALPA CHUH I DIKTATNAU AHI’ tih hi.

⁷“Tichun, ngaitiem u! a nite hungtung ding ahi,” LALPA’n a tii, “Israel chate, Aigupta gam apat a puidawkpa LALPA chuh a hin zing bangin, a tih lohna ding niu hung tung ina.

⁸Himahleh, mâllam gam leh, a delh zakna gam haw cheng apat a Israel inkuonte puidawk a puipa LALPA chuh a hin zing bangin, ti zaw ta’n au, tichun, amau gam ngêi ah cheng un au.”

⁹Thiemgaute chungchâng thu achun, ka sunga ka lungchang hi a puokkek a, ka guh chengcheng le a kithing a, zukham bang mai ka hi ta a, LALPA leh a thu thiengtho ziek chun; zu’n a zel zawh mah mah mihiem ka bang mai tai.

¹⁰Gam chuh zawlsaite’n a dim ta a, hansie ziekin zie gam chun a sûn a. Gamthip gam hingte chuh a gaw zo ta a! A lampiu chuh a pha puoh a, a hetnateu chule a dik puoi.

¹¹Thiemgaute leh thiempute chun Pathien a khawksa puou a, ka In sung ngeia le a gitlohnau ka mu tai, tih hi LALPA kamsuok ahi.

¹²Zieziekchun, amau haw a dingin a chieh nau lampi chuh, thim lak lam nal haw tawbang hi’n tin; tak achun delh zui in um untin, kithawlh pai un au! A chungu ah thil phalo hun tun sak ding ka hi ngâl a! Amau haw gawtna hun ding kum haw chuh, tih hi LALPA kamsuok ahi.

¹³Samari thiemgaute lak ah thil kihdak-um ka mûi, Baal sâm in thu a gen uh a, Israel te a pui mang uh ahi.

¹⁴Jerusalem thiemgaute chunga le, thil zahhuoi tak ka mûi. Zawl a sai uh a, lepchieh in a khuosau a; thil gilo hihte khut chuh a suhat uh a, mite’n a nunsietnau a kisik loh lawh tau a, Kei dingin Sodom khuo a mite bang a hung hi vek tau hi! A khuo sunga mite cheng le Gomorah khuo mite bang a hung hi vek tau!

¹⁵“Zieziekchun, thiemgaute chungchâng thu achun, LALPA sepaihte LALPA chun hiti hin a tii: Ngaitiem u! gamsai in hun vak ing ka ting, tui kha hun dâwn sak ding ka hi; Jerusalem thiemgaute kawm apat chun, gamsung pumpi ah Pathien khawksak lohna chuh a pawt ta ngâl a!”

¹⁶Sepaihte LALPA chun hiti hin a tii: “Thiemgau, na kawm uh a thugente chuh ngaitha kiu in, amau haw chun thil thâwn maimai a hun sinsak uh ahi! LALPA kawm apat hilo in, amau haw lungthim suongtuoh a gen sek ui.

¹⁷LALPA thu musitte kawm achun, Nanga dingin pha’na, a ti sek ui, amau deih lam lochal taka hih hâm hâmte kawm achun, Thil phalo bangmah na chungah hungtung puo’n a,” a tiu a.

¹⁸“LALPA lemguotna a kuo a tel kha a, a thu mu a pawm ding kuo a um? A hihloh leh, a thu chuh kuo a limsak a, ngaitha kha?

¹⁹Ngaitiem u, LALPA lungnatna huihpi chuh lungna takin a pawtdawk tai! Mi nunsiete luchang chuh nuoi diek ina.

²⁰LALPA lungnatna chuh vaikit mai puo’n a. A lunggil a a guotsa haw chuh a pitit a, a hih zawh zet ma chun. Ni nunung haw achun chientakin hun he ding na hiu hi!”

²¹Thiemgaute chuh, ka sawl loh in a tai uh a, a kawmuh a thu ka gen loh lai inle a genlawk u a.

²²Ka lemguotna a amau le um hi leu chuh, ka thu hi ka mite kawma phuong ding ahiu a, tichun, a lampi diklo u apat chun kihei kit sak ding ahiu hi!

²³“Gamla taka um Pathien hilo in, nai taka um zing Pathien hilo ka him? tih hi LALPA kamsuok ahi.

²⁴Ka muh theih loh dinga mun thip a kisel thei a um dinga ahim? tih hi LALPA kamsuok ahi. Lei leh van ahin ka dim hilo ahim? tih hi LALPA kamsuok ahi.

²⁵Ka mangmat hi, ka mangmat hi, ti a ka min a zuou gen thiemgaute a genlawk chuh ka za tai.

²⁶Lepchieh gen sek thiemgau, amau lungthima zuou thu phuok kawm thugente chun, bang chana a hih nak lai dinguh?

²⁷Amau haw chun a invengteu kawma a mang uh gen in, ka mite chuh ka min a hetngilh sak guou a, a pileputeu in Baal zieka ka min a hetngilh sek bang uh khan!

²⁸Thiemgau mang nei chun, a mang chuh gen hen la, chuleh, ka thu vawppa chun ka thu chuh ginum takin gen mai hen. Buh vaiham leh, buh changin kibatna a nei uh a ahim? tih hi LALPA kamsuok ahi.

²⁹Ka thu chuh mei tawbang hilo ahim? Suong sukgawpna sek tawbang hilo ahim? tih hi LALPA kamsuok ahi.

³⁰Zieziekchun, ngaitiem u! thiemgau ka thu kiguksak tuoh sekte chuh ka do ahi, LALPA’n a tii.

³¹Ngaiun! thiemgau, amah thu kigen a, ‘LALPA gen ahi,’ ti sekte chuh ka do ahi, tih hi LALPA kamsuok ahi!

³²LALPA chun, Ngaitiem u! mang lepchieh maimai gen a, hilh a, a lepchieh thuteu leh, a uonna thuteu maimai zieka ka mite puimang thiemgaute chuh ka do ahi, LALPA’n a tii! Sawl la ka sawl puoh a, thu la ka pie diek puoi; zieziekchun, zie mipite hin phatchuompih diek puo’n a,” tih hi LALPA kamsuok ahi.

³³“Zie mipite hi ahim, thiemgau in ahim, thiempute a him in, ‘LALPA puokgik chuh bang ahim?’ ti a a hun dawt uh leh, hiti hin dâwng un, ‘Nang haw hi LALPA puokgik chuh na hiu a, hun paih tha ding ka hi! tih hi LALPA kamsuok ahi.’

³⁴Thiemgau hi henla, thiempu hi henla, mipite hi leule, ‘LALPA puokgik,’ tih thu hi a mat uh chun, amah tawh, a inkawte chuh gawt khawm ing ka!

³⁵Tichun, mitin in, a invengpa kawm leh, a suohpihpa kawm achun, ‘LALPA’n bangti’na a dâwn, LALPA’n banga a gen?’ ti’n kidawng tuoh unlau.

³⁶Himahleh, LALPA puokgik chuh gen kha ta puou in na tin uh, mitin a dingin, amah thugen mah chuh a puokgik hi mai ding a hi! Pathien hing, Sepaihte LALPA, I Pathien uh thu chuh na kai kâwi ta ngâl uh a!

³⁷Zieziekchun, thiemgau kawm achun, ‘LALPA chun bangti’n a hun dâwng hi? LALPA chun banga a gen?’ ti’n dawng in.

³⁸Himahleh, ‘LALPA puokgik,’ na tih tâk ziek chun, LALPA chun hiti hin a tii: Zie thu, ‘LALPA puokgik,’ na tih tâk ziekuh hin, ‘LALPA puokgik’ chuh ti talo dinga ka hun sawl na hiu hi.

³⁹Zieziekchun, ngaitiem u! Hun bawt dawk ngêi ngêi ing ka ting, ka kawm apat in hun paihmang ing ka; zie khawpi nang u leh na pileputeu ka na piek hi tawh.

⁴⁰Khutichun, kumlekhuo a demna leh, zahhuoina chuh na chungu ah hungtung intin, zie chuh hetngilh hita puo’n a!”