Read Gangte JEREMIA 25 Bible Online

JEREMIA 25 - Gangte bible

JEREMIA 25

¹Juda leng Jehoiakim, Josia chapa vaihawm kum lina a, Juda mite chengcheng chungchanga Jeremia kawma thu hungtung chuh: Zie hun chuh Babulon leng Nebuknezar vaihawm kum khatna a hi a;

²zie thu chuh, thiemgau Jeremia’n Juda mi chengcheng leh, Jerusalem a um cheng chengte kawma a gen chuh ahi.

³“Kum sawmnih leh kum thum sung zet, Judate leng Amon chapa Josia vaihawm, kum sawm leh kum thumna apat tu tiengin, LALPA thu chuh a hungtung a, chawllo in na kawm u ah ka gen sek a, himahleh, na ngaitha puou a.

⁴LALPA’n na kawm u ah a nasem thiemgaute a sawl sek a, zingkal vaima taka tho in a hun sawl a, himahleh, na ngaitha puou a, za dingin na bil u le na dawh diek puou hi!

⁵Zie thiemgaute chun, mi tin, amah gitlohna apat in hung vaikit u hen la, LALPA’n na kawm u leh, nanguh hun suonte kawma malai apat a kumlekhuo a dinga a piek gam ahin cheng tau in;

⁶pathien dangte zui kiu inla, a nau sem ding leh. chibai bûk ding leh, na khut nasepteu a ka lung suna dingin chieh kiu in; tichun. hun gawt puo’ng ka.” a ti sek a.

⁷Himahleh, nanguh dinga phalo ding leh, na khut nasep uh a ei sulungna dingin nei ngaitha sek puou hi. LALPA’n a tii.

⁸Zieziekchun, sepaihte LALPA chun hiti hin a tii: “Ka thu na ngaihthak loh ziekun,

⁹ngaitiem u, mâllam a nam chengcheng chuh sam ding ka hi, LALPA’n a tii. Ka suok Babulon leng Nebuknezar le sam ing ka ting, amanhaw chuh zie gam leh, a sunga mite leh, a kimvel a nam chengcheng hi do ding leh sumangthai vek dingin hun pui ing ka.

¹⁰Tichun, amau a kipat lawpna thawm leh a lak u a kipahna thawmte. moneipa leh mo aw te, buh gawih thawm leh thaumei vakte la mang ing ka.

¹¹Tichun, zie gam pumpi hi a hawm in um in tin, tizat-um takin um ina. Khutichun, zie namte chun Babulon lengpa na chuh kum sawmsagih sem un au!

¹²Khutichun, kum sawmsagih a beih tieng leh, Babulon te leh a lengteu chuh a gitloh ziekun gawt ing ka ting, kumlekhuo’n suhawm ing ka, tih hi LALPA kamsuok ahi.

¹³Zie gam achun, a chunguh a thu ka gen chengcheng leh, Jeremia’n nam cheng kalh a a genlawk, zie lehkhabu a kizikhaw hi tun sak ing ka.

¹⁴Nam chuom chuomte leh, leng lopi takte chun amau haw chuh suok in a siem tau a, tichun, a thilhih dungzui u leh, a khut nasep dungzui zel un dinthuk ding ka hi,” a ti a.

¹⁵LALPA Israel Pathien chun hiti hin a tii: “Ka lungnatna uain khawn hi ka khut apat la’n la, ka hun sawlna ding namte cheng chuh dâwn sak ah.

¹⁶Dâwn un tin, lawn duoi duoi in, kham un au, a lak u a ka sawl ding chemzâm ziek chun,” ti’n.

¹⁷Tichun, LALPA khut apat khawn chuh ka la a, LALPA’n ei sawlna nam chengcheng chuh ka dâwn sak ta a.

¹⁸Ziehaw chuh Jerusalem leh Juda khawpite, zie tak muna lengte leh miliente chuh hawmngawn leh, maksak leh chekkhum leh, hansiedawl ding leh, tulai a a umdan bang uh ahi um dinga nutsieh in a um tau hi!.

¹⁹Aigupta leng Pharaoh leh a suokte, a miliente cheng leh, a mipite cheng tawh;

²⁰a lak u a nam dang a chenkhawm pih teu, Uz gama leng haw cheng, Philistia gama leng Ashkelon leh Gaza leh Ekron, Ashdod a umsun lengte;

²¹Edom lengte cheng leh, Moab lengte leh, Ammon suonte le,

²²Tura lengte cheng, Zidon lengte cheng leh, Tuipi gala lengte cheng le,

²³Dedan leh Tema leh Buz leh, a ningkawia chêngte le,

²⁴Arabia lengte cheng leh, gam gaw a nam kichawkhelte lengte cheng tawh,

²⁵Zimri lengte, Elam lengte leh, Media lengte cheng;

²⁶Mâllam lengte cheng, a gamla leh a nai te, a bân banin, lei chunga um, khawvel lalgam chengin a dâwn zawh tiengu leh, Sheshak lal in dâwn ina!

²⁷Chun, a kawm u ah, “Sepaihte LALPA, Israel Pathien chun hiti hin a tii: ‘Dâwn unla, kham unla, luou unla, puk unla, thokit ta kiu in; na lak uh a chemzâm ka lên sak ding ziek chun,’ ti’n.

²⁸Chun, na khuta khawn chuh dâwn dinga a lak nawp loh uh leh, a kawm u ah hiti hin ti’n: ‘Sepaihte LALPA chun hiti hin a tii, Na dâwn tei dinguh ahi.

²⁹Ngaiun! ka min pu khawpi ahin thil phalo bawl ka pan ta a, nang haw hi gawt loh a um diek ding na hiu em? Gawt loh in um puo’n lau: lei chunga mi chengcheng chungah chemzâm lên sak ding ka hi ngâl a,’ tih hi sepaihte LALPA kamsuok ahi.”

³⁰“Zieziekchun, a chungu ah ziehi gen inla, a kawm u ah hiti hin ti’n; ‘LALPA chuh chunglam a kipat hung kiko intin, a chênna Mun thiengtho pat chun a aw suoh ina, A huongsung ah ngeih tak in kiko in tin, grep chilte guolin kiko in tin; tichun, leia mitin cheng chun za’n au!

³¹A gi chun kâwl mawng tâwp chan thawng ina! LALPA’n namte chuh a kilanpih a, mi chengcheng chungah vaihawm intin, mi nunsiete chuh chemzâm kawmah pie’n a,’ tih hi LALPA kamsuok ahi.”

³²Sepaihte LALPA chun hiti hin a tii: “Ngaitie! thil phalo chun namtin hun zut ding a hi a, huihpi hât tak mai chuh lei mawng tâwp apat in hung nung ina!

³³Zie ni a LALPA’n a thahte chun, lei mawng khat apat leh lam tâwp tiengin dâp suok untin uh, sun loh leh, chawm khawm loh, vuih loh in um un tin uh, lei chunga êk tawbang phet hi’nau!

³⁴“Nanguh belampute haw pêng tuntun unla, kap un! nang haw, gan guol enkawlte haw, vut lak ah kibuol un! Thah a na um niu leh, thehzak a na um niu a hih ziekin, belamchal deihum tak bangin puk ding na hiu hi!

³⁵Belampute chun taihmang na ding nei puou un tin, belam hawn enkawlte chun le pumpelhna ding nei diek puo’n au!

³⁶Belampute kah thawm leh, belam hawn laka lawiupate kah thawm zak hi’n a LALPA’n hamhing mun haw a sukhawm tâk ziek in.

³⁷Chun, LALPA lungnatna tizat-um tak ziek chun huong muon-um tak te chule thip dîl del in a um tai.

³⁸Sakeibaknei bang mai in a kisêlna chuh a pawtsan ta a, chemzâm nunsie tak leh a lungnatna tizat-um tak ziek chun, a gam u chuh a hawm zo ta ngâl a.”