Read Gangte JEREMIA 27 Bible Online

JEREMIA 27 - Gangte bible

JEREMIA 27

¹Juda leng Josia chapa Jehoiakim vaihawm tûng lai in Jeremia kawmah LALPA apat in thu a hung tung a.

²LALPA chun ka kawmah hiti hin a tii: Namkawl leh a huol siem in la, na ngâwng ah tuoh in.

³Chun, Edom leng te, Moab leng te, Ammon suonte leng le, Tura leng te, Zidon lengte kawmah chun thu thâk inla, Jerusalem a Juda leng Zedekiah kawma hung, thangkote puoksak ah.

⁴Zie thu haw hi a puteu kawmah gen sak in. Israel Pathien, Sepaihte LALPA chun hiti hin a tii; hiti bang hin na puteu kawma na gen dinguh ahi.

⁵Ka thilhih theihna lopi tak leh ka bân zak in lei leh mihing te leh leichung a gamsate ka siem a, piek ding kilawm ka sakte kawm achun ka pie a.

⁶Tuhin le ka suok, Babulon leng Nebuknezar khut ah zie gam haw cheng hi ka pie ta a, gamsate le amah nasem dingin ka pie tai.

⁷Amah pukna ding hun a tun masang chun gam chengcheng te chun amah leh a chapate leh a chapate chate chanin a na sem un au. Zie zawh tieng chuleh nam tamtak leh leng lopi takte chun amah chuh suok in siem un au.

⁸Himahleh, Babulon leng Nebuknezar namkawl puo nuom lo te leh a nasem nuom lo nam leh lalgam chuh chemzâm leh kiel leh hipi’n ka sukmangthai suok macheng in amah khut ngêi in amau haw gawt zel ing ka.

⁹Nang un vang na thiemgauteu, na khutzie en thiemteu, na mangteu, na phunsân thiem teu, na dawithiem teu, na kawm u a Babulon leng nasem puo’n lau, ti a gen haw chuh ngaitha kiu in.

¹⁰Na gam u apat a gamla taka puihmang na hih theihna ding u a na kawm u a lepchieh thu genlawk ahiu ui, ka hun nawhdawk a na manthaina ding un.

¹¹Himahleh, Babulon lengpa namkawl puo nuom a, a na sem nuom cheng chuh a gam u ah um sak ing ka ting, lei let un tin, zie mun achun cheng zing un au, tih hi LALPA kamsuok ahi.

¹²Chun, Juda leng Zedekiah kawma chun zie thu haw cheng chuh ka gen a: “Babulon leng namkawl chuh puou unla, amah leh a mite na sem unla, tichun hing unlau.

¹³Babulon lengpa nasem nuom lo nam te chungchâng LALPA gen guol a chemzâm te, kielte, hipite a nang leh na mite bang zieka thi ding?

¹⁴Chun, thiemgau, na kieng u a, Babulon lengte na sem kiu un ti a gen te thu chuh ngaitha kiu in, na kawm u a zuou thu gen maimai ahi ngâl u a.

¹⁵Ka sawl ahi puou a, ka min a zuou gen ahi zawu hi; nang u leh na kawm u a thugen thiemgaute chuh ka nawhdawk a, na manthai theih na ding un,” LALPA’n a tii.

¹⁶Thiempute leh zie mipite chengcheng kawma hin le ka gen tho ta a, LALPA chun hiti hin a gen hi: “Na kawm u a thiemgau thu gente chuh ngaitha kiu. Ngaitiem u, Babulon apat in LALPA in a belte chuh hun puo tung vak ding ahi tai tite chuh na kawm u a zuou gen ahi ngâl u a.

¹⁷Amau haw chuh ngaitha hiel kiu in, Babulon lengpa na sem un la, tichun hing un lau; bang zieka zie khawpi hi a hawma um ding ahim?

¹⁸Himahleh, amau chuh thiemgau ahi ngâl u a, LALPA thu a kawm u a um ahih takzet chun LALPA In leh Juda leng In leh Jerusalem a ûmlebel nutsieh a umte chuh Babulon a puoklut a hihloh na’n Sepaihte LALPA kienga nget hi’n a.”

¹⁹Sepaihte LALPA chun, khuom lien haw chung thu leh, luipi lien leh ûmlebel zie khawpi a nutsieh a um haw thu achun,

²⁰Babulon leng Nebuknezar in Juda leng Jehoiakim chapa Jekonia leh Juda leng Jerusalem a mi lopi haw cheng, Jerusalem apat a Babulon sala a puih chunga a um nalai te chungchâng thu chuh hiti hin a gen a;

²¹“Ahi, Sepaihte LALPA, Israel Pathien chun LALPA in leh Juda lengte in leh Jerusalem a ûmlebel nutsieh a um haw chungchâng thu a gen hi.

²²Babulon lama puih hiu untin, amau haw ka hung vehthak kit macheng in zie tak achun um zing un tin, chun, puikit ing ka ting, zie mun a hin puikit ing ka, tih hi LALPA kamsuok ahi.”