Read Gangte JEREMIA 28 Bible Online

JEREMIA 28 - Gangte bible

JEREMIA 28

¹Chun, hiti hi a hi a, zie kum mah a Juda leng Zedekia vaihawm tûng lai, a kum lina. tha nga na achun, Gibeon mi, Azur chapa thiemgau Hanania chun, thiempute leh mi cheng cheng kawmah, LALPA Ho-In achun ei hopih a, ka kawmah,

²“Sepaihte LALPA, Israel Pathien chun hiti hin a tii: Babulon lengpa namkawl chuh ka subawng tai! ti’n.

³Kum nih sungin LALPA Ho-In a ûmlebel, Babulon leng Nebuknezar in zie mun apat a a lâk haw, Babulon lama a puok manghaw cheng chuh, kum nih sungin a mun ngêi ahin hun puo lut kit ding ka hi.

⁴Zie mun ahin Juda leng Jehoiakim chapa Jekonia leh, Babulon a Juda saltâng chengcheng chuh puikit ing ka. Babulon leng namkawl chuh sukbawt sak ding ka hi ngâl a,” tih hi LALPA kamsuok ahi, ti’n.

⁵Khutichun, thiemgau Jeremia chun, thiempute leh, LALPA Ho-In a ding mipi haw masang achun thiemgau Hanania kawmah,

⁶“Thiemgau Jeremia chun, ‘Amen, LALPA’n khutibang chun hih ngut hen; LALPA Ho-In a ûmlebel leh, saltânghaw Babulon apat a zie mun hun tun kit dinga na genlawk chuh LALPA’n hih guitung tei he’n!

⁷Amahvang chuh, nang leh mipite zaka ka thugen hi ngaitha’n!

⁸Kei leh nang masanga thiemgaute chun gam tamtak chungah kidonate, thil phalo leh, hipite thu a gen sek uh a.

⁹Lungmuonna thu genlawk, thiemgaupa thu chuh a hung guitun tieng leh, zie thiemgau chuh LALPA sawl ngêi ahi tih het hi mai ding ahi,’ a ti a.

¹⁰Khutichun, thiemgau Hanania chun thiemgau Jeremia ngâwng apat namkawl chuh a latha a, a subawng ta a,”

¹¹Chun, mipite masang achun, Hanania’n “LALPA’n hitihin a gen hi: zie tawbang hin, Babulon leng Nebuknezar namkawl chuh kum nih sung ngêi in, namte chengcheng ngâwng apat subawng ing ka,” a ti a. Chun, thiemgau Jeremia chun a taihsan pai ta a.

¹²Thiemgau Hanania chun thiemgau Jeremia ngâwng apat a namkawl a sukbawt zawh phet chun LALPA thu chuh Jeremia kawmah a hungtung a:

¹³Chieh inla, Hanania kawmah tihin va gen ah, hiti hin LALPA’n a tii: “Thing namkawl chuh na subawng a, a thasang in thik namkawl na siem sak zaw a hi hi.

¹⁴Sepaihte LALPA, Israel Pathien chun hiti hin a tii, Babulon leng Nebuknezar na a sep theihna dingun zie nam haw hi thik namkawl ka puok sak ahi, amah na sem un tin, gamnuoia gamsa haw nasan le amah ka piek ahi,” ti’n.

¹⁵Chun, thiemgau Jeremia chun thiemgau Hanania kawmah, “Ngaitie! Hanania, LALPA’n a hun sawl hiel puoi; na mite hi lepchieh thu na zak sak mai a hi zawi!

¹⁶Zieziekchun, LALPA chun hiti hin a tii: Ngaitie. lei chung apat hin hun sumangthai ding ka hi! LALPA chunga kiphinna thu na gen ziekin, tu kum ngêi hin thi ding na hi,” a ti a.

¹⁷Tichun, zie kum mah, a tha sagihna achun thiemgau Hanania chuh a thi tai.