Read Gangte JEREMIA 29 Bible Online

JEREMIA 29 - Gangte bible

JEREMIA 29

¹Chun, ziehi Nebuknezar in Jerusalem apat a Babulon sala a puih upate, thiempute, thiemgaute, leh mipite, a dam sunte kawma thiemgau Jeremia lehkhathâk thu chuh ahi:

²Leng Jekonia leh lengnu te, mitilgeh te, Juda leh Jerusalem a miliente, mi khutthiem leh thîk sekte’n Jerusalem a pawt san nung uh a a thâk ahi.

³Shaphan Chapa Elasa leh Hilkiah chapa Gemaria te khuta a thâk hi. (Ziehaw chuh Juda leng Zedekia’n, Babulon leng Nebuknezar kawma a sawlte chuh ahiu hi.)

⁴“Israel te Pathien, Sepaihte LALPA chun, Jerusalem apat a Babulon sala a puih sak haw kawm chun hiti hin a tii:

⁵In sau inla, zie chun cheng unla, huon bawl unla, a gahte chuh neu inla,

⁶Zi nei unla, chanu chapa hing unla, na chapateu chuh zi neih sak unla, na chanuteu chuh pasal neih sak un, chanu chapa a hun neih uh a, hung pung a, kiem lam a nawh lohna dingun.

⁷Sala ka hun tan sakna khawpite phatna ding hawl unla, LALPA kawmah nget sak un. A sunga phatna achun, nangun le phatna mu ding na hi ngâl u a.

⁸Israel Pathien, Sepaihte LALPA chun hiti hin a tii: ‘Na lak uh a thiemgaute leh phunsânte chun hun thêm kiu hen la, a mang matteu chule ngaitha diek kiu in.

⁹Ka min in na kawm u ah lepchieh thu a genlawk uh a hi! Ka sawl ahi puou hi,’ tih hi LALPA kamsuok ahi.

¹⁰Chun, LALPA’n hiti hin a ti ngâl a, ‘Babulon a dinga kum sawmsagih a tin tieng leh hun veh-tha kit ing ka ting, na kawmuh a ka thutiem phatak chuh muolsuoh ing ka ting, zie mun ngêi ahin hun puikit ing ka.

¹¹Nanguh dinga ka thil guot chuh ka kihet ngâl a, tunung a ding a kinepna hun pie dingin, thil phalo hilo in, phatna ka ngaihtuoh a hi zawi! LALPA’n a tii.’

¹²Chun, ei sam un na tin uh, ka kieng ah paucham un na tin, hun ngaitha ding ka hi.

¹³Chun, ei hawl un na tin uh, na lunggil cheng chenguh a nei hawl tiengu leh ei mu’n lau.

¹⁴Tichun, nang haw muhin um ing ka, LALPA’n a tii. Na umdan uh theng ing ka ting, nam chengcheng laka ka hun thehzakna mun apat in hun puikhawm kit ing ka tih hi, LALPA kamsuok ahi. Sala ka hun tânsakna apat ngêi khan hun puikit ing ka.”

¹⁵“LALPA’n Babulon gam ahin le thiemgau ei siem sak ngâla,” na ti ngâl u a.

¹⁶LALPA chun David lalchutphah chungchâng thu leh, zie khawpi a cheng mipi chengcheng, sala puih khawm loh na suohpihteu chung châng thu achun hiti hin a ti ngâl a.

¹⁷“Sepaihte LALPA chun hiti hin a tii: Ngaitiem u, a chunguh achun chemzâm te, kiel te, hipite hun tun sak ing ka ting, theipi hût, a siet takluot zieka nek theih loh bang mai in siem ing ka.

¹⁸Tichun, chemzâm leh kiel leh hipite’n delh zui ing ka ting, lei chunga lalgam haw lak ah zahhuoi takin siem ing ka ting, amau haw ka thehzak na gam haw achun, maksak ding leh, chekkhum a hansie buok khum leh gensiet dingin siem ding ka hi.

¹⁹Zingkal a vaima taka tho a, ka suok thiemgau manga ka thugente na khawksak uh a, na ngaihthak nawp loh ziekun tih hi LALPA kamsuok ahi.”

²⁰Zieziekchun, nang haw Jerusalem apat a Babulon lama ka sawl, saltâng cheng chengte haw, LALPA thu hi ngaithau un!

²¹“Israel Pathien, Sepaihte LALPA chun Kolaia chapa Ahab leh, Maaseiah chapa Zedekiah, ka min sala na kawmuh a lepchieh thu genlawk te chungchâng thu achun hiti hin a tii: Ngaitiem u, Babulon leng Nebuknezar khut ah pie ding ka hi a, na mitmuh ngei un that un au;

²²Chun, amau haw chungchâng thu chuh, Babulon gama Juda saltâng cheng chengte chun, Babulon leng in meia a hâl Zedekiah leh, Ahab bang khan ‘LALPA’n na chungah hih hen,’ tih hi hansie lawhna takin mang un au.

²³Israel gam achun thil ngawlhuoi tak a hih uh a, a invengteu zite tawh zawl a sai uh a, ka min a ka thupiek loh pi a, thu a gen ziekun, Kei a he pa leh, a hetpihpa ka hi,” tih hi LALPA kamsuok a hi!

²⁴Chun, Nehelam-mi, Shemaiah chungchâng thu achun hiti a hi na gen ding ahi.

²⁵Israel Pathien, Sepaihte LALPA chun hiti hin a gen a, Jerusalem a mipi chengcheng kawm leh thiempu Maaseiah chapa Zephania leh thiemgaute cheng kawmah, nangmah min ngêi in lehkha na thâk a.

²⁶“LALPA chun thiempu Jehoiada thasang in thiempu dingin a hun siem a, LALPA Ho-In enkawl na hi a, thiemgau kiti phawt chuh kawlbuh sak in suongkul a na khum ding ahi.

²⁷Zieziekchun, bangati a, Anathoth khuo a cheng, Jeremia, na kawmuh a thiemgau kitipa chuh na gaih loh a?

²⁸Babulon gam ah, ka kawm u ah, ‘saltan sung chuh sawt ding a hi’n, inte sau inla, tak achun cheng unla, huonte bawl unla, a gahte chuh neu in,’ ti’n thu hi ei thak uh ka hi ngâl uh a!”

²⁹Khutichun, thiempu Zephania chun zie lehkha chuh thiemgau Jeremia zak in a sim a,

³⁰tichun, Jeremia kawmah LALPA thu a hung tung a.

³¹Saltânghaw chengcheng kawm achun, Nehelam-mi Shemaiah chungchâng thu achun LALPA’n hiti hin a tii: “Ka sawl loh hielin Shemaiah’n na kawm u ah thu a gena, zuou thu ahun ginchak saka; zieziekchun LALPA’n hiti hin a tii. Ngaitiem u, Nehelam-mi Shemaiah leh, a suonte chuh gawt ing ka ting, zie mite lak ahin mi khat chale nei puo’n tin,

³²Chun, ka mite dinga thilpha ka hih ding chule mu diek puo’n a! LALPA chunga kiphinna thu a gen ziekin tih hi LALPA kamsuok ahi,” ti’n thak ah, a ti a.