Read Gangte JEREMIA 31 Bible Online

JEREMIA 31 - Gangte bible

JEREMIA 31

¹LALPA chun, “Zie tieng chuleh, Israel insung dingin a Pathien uh hing ka ting, amau haw chuh ka mite hi ta’n au.

²LALPA chun hiti hin a tii: Chemzâma thi mâwkte chung achun thalek ah lungsietna ka sulang a, Israel mipite’n chawlhdamna a deih lai ngêi u khan.

³Masanga ka kawma hung kilak LALPA chun hiti hin a tii, A hi, lainatna tâwp lo in ka hun lainat a: zieziekchun, nanga dingin ka ginum zing hi.

⁴Hun tung ding thak kit ing ka ting, tichun, tundin a um ding na hi. Aw Israel, nungak thiengtho khuong neu haw chun kivan kit in na tin lawp a lâmna mun haw achun tel inla!

⁵Samari tâng chunghaw achun grep huon siem in na tin, a phuttute chun phut un tin, tichun, a gah haw chuh chen un au.

⁶Ephraim tânghaw achun, vengtute kiko ni hungtung ding ahi. Tho unla, Zion ah chieh hitiu, LALPA I Pathien uh kawm achun,” ti’n.

⁷LALPA chun, “Jakob a dingin kipâk in la sau unla, nam lopite lak achun kiko dawk un, phuongdawk unla, pakchau un, aw LALPA chun Israel nutsieh a um te hi na hukdawk tai,” tiu in.

⁸Ngaitie, amau chuh mâllam apat in hun pui ing ka ting, kâwl mawng tâwp pên apat in hun puikhawm ing ka. Tichun, mitdûkte, kêngbâite, numei nauvawpte leh nauhanatte, mipi tamtak tawh hungtung khawm un au!

⁹Kap kawmin hung khawm un tin, thamuong takin puikit ing ka. Lui luong pang achun pui ing ka ting, a kisuih lohna dinguh lampi cham achun; Israel a dingin pa ka hi ngâl a, Ephraim chuh ka cha masapen ahi, ti’n.

¹⁰“Aw namte haw, LALPA thu chuh ngaithau inla, gamla taka tuipi panga gam haw achun phuongzak unla, Israel thehzakpa chun hun puikhawm kit intin, belampu’n a belamte a ven bangin veng ina, tiu in.

¹¹Jakob chuh LALPA’n a hukdawk a, amah sanga hatzaw khut apat chun a hukdawk ta ngâl a.

¹²Zion tângsip achun lasa’n hung un tin, LALPA phatna achun kipâk untin: buhte, uain te, sathau te, anchehlohing, belam leh gan guol note ka piek achun kipâk un au. A hinnau chuh huon tui pha mun bang hi’n tin, kumlekhuo’n lungkham kit ta puo’n au.

¹³Zie tieng chuleh, nungak thiengthote chuh lam in, kipâk untin, tangvalte leh teksiete le kipâk un au. A lungkhamnau kipahna chan sak in, a lusûnnau kipahna suok sak ka ting, thamuon ing ka ting, lungkhamna sangin kipahna pie’ng ka.

¹⁴Thiempute hinna chuh sathau in sutai ing ka ting, ka phatna’n ka mite le lung-awi un au tih hi,” tih hi LALPA kamsuok ahi.

¹⁵LALPA chun hiti hin a tii, “Ramah khuo ah thawm a zau a, mithi ngaia kapte thawm chuh. Rachel in a chate a kah a, a chate a um tâk loh ziekun thepbih theih ahi ta puoi!

¹⁶Na kahlai hai inla, na mitthitui thiek hul in, na chate dinga na thilhih hi kipahman piek loh in um puo’n a; melmate gam apat in hung vaikit ding a hi ngâl uh a, tih hi LALPA kamsuok ahi.

¹⁷Na hun tawp lam chuh kinep-um tak hi’n tin, amau gam ngêi ah na chateu chuh hung vaikit un au, tih hi LALPA kamsuok ahi.”

¹⁸“Ephraim te haw’n, ‘LALPA, bâwngchal sawih nem loh tawbang ka hiu a, himahleh, nangin thu-awih dân nei sinsak a, nei kaihei kit tai, LALPA ka Pathien uh na hi ngâl a,’ ti a lungkham taka a gen u chuh ka za ngei tai!

¹⁹Nang apat in ka kihei mang tau a, himahleh, ka kisika, keihaw nei gawt nung chun, lungkham in ka luchang uh ka khun thau a, ka tanglak lai uh gitlohna haw ziek chun zakcha’n, ka san hut hut hi!” ti’n

²⁰“Ephraim chuh ka chapa deihtak, ka cha ngaih-um tak a hih ziek ahim? Amah ka thunun chenga, ka lungthima a chen zing sek hih? Ka lunggil in a lainat sek a, a chungah zahngai tei ing ka, tih hi LALPA kamsuok ahi.

²¹Lampi melchikna kisiem inla, na taihsanna lampi, lam tuongpi ngêi chuh mudawk kit in. Aw nungak thiengtho Israel, hung vaikit in, zie na khawpi lam ngêi ahin.

²²Aw nang, chanu nungchawn, bang chan ahim na zawn vak ding? LALPA chun lei ahin thil thak a siem ta a, numei in pasal hum zaw ta ding ahi,” ti’n.

²³Israel Pathien, sepaihte LALPA chun hiti hin a tii: “A saltannau apat a ka puihkit tieng leh Juda gam leh a khawpi teu achun zie tawbang paukam hi mang kit un au, ‘Aw dikna umna mun, aw tâng thiengtho, LALPA’n hun vangsak hen,’ tih hi.”

²⁴Zie chun Judate leh a khawpi a mite chuh cheng khawm untin, lo bawl mite leh gan vulh mite vakviel tawh.

²⁵Thagau hinna chau haw chuh ka sutai ta a, mi lungkhamte chuh ka suhalh ta ngâla.

²⁶Tichun, “Ka ipmu ta a, ka hung khanglo kit a, keia dingin anuom mah mah mai hi” hun ti’n au.

²⁷LALPA chun, “Ngaitie, nite chuh hungtung ding ahi. Israel inkuonte leh Juda inkuonte gam achun, mihing leh gancha dim sak ing ka.

²⁸Chun, hiti hi hi’n tin, amau haw bawt dawk a, susie a, paihmang a, hihmangthai a, sugimthei dinga ka chan bang khan, amau haw siempha ding leh, tung ding dingin en tha’ng ka.

²⁹Zie ni haw chuleh, ‘Pate’n grep thuk a nek u leh, a chateu ha a zau hi,’ ti ta puo’n au.

³⁰Himahleh, mitin chuh amah gitloh ziekin thiu in tin uh, grep thuk ne taphawtte ha chuh zau ding ahi!”

³¹Ngaitie, nite chuh hungtung ding ahi, tih hi LALPA kamsuok ahi. Zie nihaw achun, Israel inkawte leh Juda inkawte kawm achun thugawlh thak siem ing ka.

³²A suonteu, Aigupta gam apat a puidawk dinga a khut uh a ka tuk ni a ka thugawlh bang kha hilo in, amau haw dinga a pasal uh tawbang himahleng, ka thugawlh a bawhsie ngâl uh a!

³³Chun, ziehaw zawh nunga Israel inkawte tawh thugawlh thak ka siem ding chuh ziehi ahi, LALPA’n a tii: A lunggil u ah ka thupiek kawih ing ka ting, a lunggil uh a le zik ing ka. Kei hi a Pathien uh hi’ng ka ting, amau haw chuh ka mite hita’n au.

³⁴Kuoma’n, amah inveng leh, amah suohpihte chuh LALPA he dingin hilh ta puou un tin, a neupen apat a lienpen tiengin, a bawn un ei he chiet ta ding ahi ngâl uh a, tih hi LALPA kamsuok ahi. A manlohnau chuh ngaidam ing ka ting, a gitlohna hawu chuh hezing zing ta puo’ng ka.

³⁵LALPA chun nisa chuh sun a vak ding leh, tha leh aksi chuh zan a vak dingin a siem a. Tuipi te chawktho a, tui kinawkte gi hum hum a siempa chuh Amin Sepaihte LALPA chuh ahi ngâl a!

³⁶Zie dante hi ka masang apat a a beih chun, Israel suonte chuh ka masang apat in nam a hihnau mangthai den un au, LALPA’n a tii.

³⁷LALPA chun hiti hin a tii: “Chunglam van khuh teh theih a hih a, nuoi lam a lei kingaknate hi hawl dawk theih a hih chun, Israel suonte chuh a thil hihsateu ziekin paihmang ing ka, tih hi LALPA kamsuok ahi.”

³⁸“Ngaitie, nite chuh hungtung ding ahi, Hananel insang apat in kulh ning kawtkhak tiengin LALPA a dingin khawpi chuh siem ahi tih hi, LALPA kamsuok ahi.

³⁹A tehna khau chuh Gareb tâng tiengin zang takin kithun intin, Goah lam ah kâwi kit ina.

⁴⁰Mithi luong leh vut paihna guom pumpi leh, phul lak haw cheng, Kidron lui tiengin, suohlam panga sakawl kawtkhak ning tieng chu LALPA a dinga thiengtho hi’n tin; zie chuh bangmah tikin sukchim leh suksiet hita puo’n a.”