Read Gangte JEREMIA 32 Bible Online

JEREMIA 32 - Gangte bible

JEREMIA 32

¹Juda leng Zedekiah lal kum sawmna achun Jeremia kawmah LALPA thu chuh a hungtung a, zie chuh Babulon leng Nebuknezar lal kum sawm leh kum gietna ahi.

²Zie hun lai chun, Babulon leng sepaih hawn in Jerusalem a ûmkimvel uh a; thiemgau Jeremia chuh Juda leng In huongsung achun kawltâng in a um a.

³Juda leng Zedekia’n a khum a hi a, a kawm achun hiti hin a gen a: “Bang zieka nangin, ngaiin, zie khawpi hi Babulon lengpa khut ah pie’ng ka ting, la ding ahi, LALPA’n a tii, ti a na genlawk ahim?

⁴Chun, Juda leng Zedekia le Kaldai mite khut apat pawt puo’n tin, Babulon lengpa khuta matsak a um zaw ding ahi, tichun, kimaichangtuoh in kiho un tin, a mit ngêi in a mel mu ding ahi.

⁵Tichun, Zedekia chuh Babulon lam ah pui intin, amah ka va veh thâk ma chengin zie tak achun um zing ina, LALPA’n a tii. Kaldai te chuh do mahleu chin le, lawhting diek puo’n lau,” ti’n.

⁶Jeremia chun, “LALPA thu chuh ka kawmah a hungtung a, hiti hin a gen hi:

⁷‘Ngaiin, na paneu Shallum chapa Hanamel chuh na kieng ah hung intin, Anathoth khuo a ka lo chuh nanga dingin kichawk in; goluoh ding na hih ziekin na châwk ding ahi,’ ti’n na kawma hung ding ahi, ti’n.

⁸Tichun, ka paneu chapa Hanamel chuh LALPA thu bang chun, suongkul huongsung achun a hung lut a, ka kawmah, ‘Anathoth khuo a ka lo chuh ei châwk sak in ti’n a hung ngên hi, zie chuh Benjamin gama um ahi a, goluoh theihna dik a nei ngâla, na tat ding ahi a, nanga dingin kichâwk in,’ a ti a. Tichun, zie chuh LALPA thu ahi tih ka heta a.

⁹Tichun, ka paneu chapa Hanamel lo, Anathoth khuo a um chuh ka chaw a, a paisa chuh ka vak bûka, dangkaguo sekel sawm le sagih hiel hi.

¹⁰Chun, lehkha ka zika ka châl den a, hetpih te ka sama, dangka chuh bûkna’n ka bûk saka.

¹¹Tichun ka chaw ngêi hi tih sukchetna lehkha chuh ka laa.

¹²Chun, ka paneu chapa Hanamel mitmuh leh hetpihtu kichawkna a min chuong te mit muh leh suongkul huong sunga Juda um chengcheng te masang achun Maaseiah chapa Neriah chapa Baruk chuh ka pie ta a.

¹³A masang u achun Baruk chuh hiti hin thu ka pie a.

¹⁴Israel Pathien, Sepaihte LALPA chun hiti hin a tii: Zie lehkha thil kichâwk sukchetna, châl leh châlloh hi lân la leibel ah kawih inla, ni tamtak a um theih na dingin.

¹⁵Israel Pathien Sepaihte LALPA chun hiti hin a tii: zie gam ahin in leh lote grep huonte midang inle hun chaw ding ahiu hi,” ti’n.

¹⁶Chun, Neria chapa Baruk kienga kichawkna lehkha ka piek zawh phet chun LALPA kieng ah ka paucham a,

¹⁷“Aw LALPA Pathien, ngaitie, na thilhih theih na nasa tak leh na khut zak in lei leh van na siem ta a; nanga dingin thil haksa taluo a um puoi.

¹⁸Sang tamtak te kawma lungsietna vuk sek pa leh pate gitlohna chate chunga din thuk sek Pathien lopi leh thilhih thei A min Sepaihte LALPA chuh:

¹⁹Lemguotthiem leh thilhih thei tak na hi a, mihing chate umdan chengcheng muchien pa: mitin a umdan u leh a thilhih dungzui u a din sek pa.

²⁰Aigupta gama melchik na leh thilmak hih sek pa, tuni tienga Israel leh midang haw laka hih zel sek pa, tuni guol a a min ngêi sulang zing,

²¹Na mi Israel te Aigupta gama pata melchiknate. thilmakte, khut hat leh ban zaka thil huoisie nasa taka puidawk pa.

²²Zie khuoizu leh bâwngnawi a luong gam, a suonteu kienga kipautiem a piek le pie ngâl pa,

²³A hunglut u a a luoh tau a; himahleh, na kamsuok a nit puou a, na dân le a zui diek puou a, hih dinga na thupiek haw le a hih puou a, zieziekchun, zie thil phalo haw cheng hi a chung u a na tunsak ahi hi.

²⁴“Entie, khawpite, tângte chuh la dingin a hung u a, khawpi chuh Kaldai te khuta piek ahi ta a; a hun dote chuh Chemzâmte, kielte, hipite ziek chun, ti chun, na gensa haw chuh a hung ta a, entie na mu hila.

²⁵Aw LALPA Pathien, nangin ka kawmah na gena, ‘Lo chuh dangka’n chaw’n la. hetpihtu ding sam inla, khawpi vang Kaldai te khuta piek ahi tai,’ na ti a” ti’n.

²⁶Chun, LALPA thu Jeremia kawmah a hung tunga hiti hin;

²⁷“Ngaiin. kei LALPA Pathien hi taksa nei chengcheng te Pathien ka hi, kei a ding thil haksa taluo a um em?” ti’n.

²⁸Zieziekchun, LALPA’n hiti hi’n a tii: “Ngai ah, zie khawpi hi Kaldai te khut leh Babulon leng Nebuknezar khut ah pie’ng ka ting, amah chun kipuih ina.

²⁹Chun, zie khawpi do ding Kaldai te chuh hung untin uh, zie khawpi hi hung hâl un tin, Baal a dinga gimlim a inchung a a hâl sek nau chuh katum ina; pathien dangte kawma dâwn ding thillat a butdawk sekna in u chule katum in a, ei suklungnatna ding un.

³⁰Israel chate leh Juda chate chun a tanglak u apat in ka mitmuh a thil phalo ngen a hih ngâl u a: Israel chate chun a khut nasep hawu chun ei sulungnau hi, tih hi LALPA kamsuok ahi.

³¹Zie khawpi hi a sak tûng u apat tuni tieng hin ei sulungna leh ei suthangtawmtu a hizing ngâl a. ka masanga pata ka sukbeih na ding in.

³²Israel chate leh Juda chate ei sulungna dinga a thil phalo hihsateu chengcheng ziekin, amau haw, a lengteu, a milienteu, a thiemgauteu, Juda mite Jerusalem luoh te chengcheng tawh.

³³A mai lam uh hilo in a nung lam uh ei ngat u a; hailo in amau haw sinsak mahleng sinsakna lasawn dingin a ngaitha nuom puou hi.

³⁴Ka min chuonna In chuh subuok ding a thil kihdak-um teu chuh a kawih zawu a.

³⁵Chun, Ben-Hinom guom ah Baal munsangte chuh a sau a, a chanuteu leh a chapateu Molek kienga, mei a chieh pai a a paih theihna dingun; ziehi ka thupiek le ahi puoh a, ka lungthim ale ka gel kha diek puoi, Judate thil gilo bawl sak a nawp ziekuh ahi.”

³⁶“Zieziekchun, tuhin LALPA Israel Pathien chun zie khawpi hi, hipi leh kiel leh chemzâm a Babulon lengpa khut a piek hi ding ahi, na tih chungchâng achun LALPA’n hiti hin a tii;

³⁷Ngaitie, ka lungnatna leh ka lunghihlohna leh ka thangtawmna nasa taka amau haw ka nawhdawkna gam haw cheng apat in puikhawm ing ka ting, zie mun ahin hun puikit ing ka ting, bit takin um sak ta’ng ka.

³⁸Chun, ka mite hiu untin, kei a Pathien uh hing ka ting,

³⁹Chuleh kumlekhuo a ei kihchak theihna ding un lungthim khat leh lampi khat neih sak ing ka; amau leh a nung u a a chateu in ei kihchak na dingun.

⁴⁰Chun, amau chu tawh kumlekhuo a ding in thugawlh siem ing ka ting, amau phatna ding ka hih sak na apat ka kiheimang lohna ding in; a lungthim u ah kei ei lauh nau kawih ing ka ting, ei kiheimang san kit ta puo’n au.

⁴¹Ahi, amau phatna ding hih chuh ka kipahlam hi’n tin, zie gam ahin ka lunggil chengcheng leh ka thagau chengcheng in phutdet ngêi ing ka.”

⁴²LALPA chun hiti hin a tii: “Zie mite chung ahin thil phalo nasatak ka tunsak tâk bangin thilpha ka tiem chengcheng te kha tunsak ngêi ngêi ing ka.

⁴³Zie gam hawm, Kaldai te khuta pieksa mi leh sa um talo a thawmhau na tihna gam uh ahin lote hun kichâwk kit ding na hiu hi.

⁴⁴Benjamin gam haw leh, Jerusalem khawpi kimvel haw, Judai gam khawpi haw ah, tânggam khawpi haw ah, phaigam khawpi haw ah leh simlam khawpi haw achun, mite chun dangka’n lo chawu un tin, kichawkna lehkha zik untin, sudet un tin hetpihtu ding sam un au; tichun amau chuh vangsak ing ka ting tung ding kit ding ka hi, tih hi LALPA kamsuok ahi.”