Read Gangte JEREMIA 36 Bible Online

JEREMIA 36 - Gangte bible

JEREMIA 36

¹Chun, hiti hi ahi a, Juda leng Josia chapa Jehoiakim vaihawm kum nihna achun zie thu hi LALPA kawm apat in Jeremia kieng a hung tung a:

²“Lehkhabu ziel chuh la’n la, zie tak achun na kawma ka thugen chengcheng, Israel te chung thu leh Juda chung thu, a nam pumpiu chung thu na kawm u a ka gen ni apat Josia hun lai leh tuni tienga thu chuh zik ah.

³Zie tieng chuleh Juda inkawte chunga thil phalo hih ka guot haw cheng chuh hun hedawk untin, mitin chuh a thil hihkhelh nau apat in a hung kihei kit kha mawh ding u, a manlohnau leh a gitlohnau ka ngaihdam theihna dingin,” a ti a.

⁴Ziephet chun, Jeremia’n Neria chapa Baruk chuh a sama. LALPA thu Jeremia’n a gen haw chengcheng chuh Baruk in lehkhabuziel achun a ziklut suok ta a.

⁵Chun, Jeremia chun Baruk kawmah, “Suongkul a khum ka hi a, LALPA In ah ka chieh thei puoh a.

⁶Zieziekchun, nang chieh inla, LALPA thu ka kam apat a lehkhabuziel a na ziklut kha mite’n a zak chiet theih na ding un anngawlh ni’n LALPA in a mite masanga na va sim dawk ding ahi; a khawpiu apat a hung pawt Juda cheng chengin a bil u a a zak ngêi ding u a na sim dawk ding ahi,” a ti a.

⁷Mitin chun a umdan gilo uh a haihsan u a a hih chun LALPA masanga lungsietna a nget u chuh a tung thei kha mawh die; zie chite chunga lungnatna leh thangtawm na LALPA’n a gen haw chuh a nasa mah mah ngâla, ti’n thu a pie a.

⁸Tichun, Neria chapa Baruk chun, LALPA thu lehkhabu ziel apat a LALPA in a sim dawk ding ti a thiemgau Jeremia’n thu a piek bang zel chun a hih ta a.

⁹Chun, Juda leng Josia chapa Jehoiakim vaihawm kum ngana, tha kuona achun Jerusalem a mi chengcheng leh Juda khawpi akipat a Jerusalem a hung khawm chengcheng te chun LALPA min a anngawlh thu a phuong tau a.

¹⁰Ziephet chun, mipi chengcheng zak in LALPA in a lehkhazikpa Shaphan chapa Gemaria pindan sungnung ah LALPA in lutna kawtkhak thak achun Baruk in lehkhabuziel apat chun Jeremia thugen haw cheng chuh a bawn in a sim suok kêi ta a.

¹¹Chun, Shaphan chapa Gemaria chapa Mikaiah chun lehkhabuziel apat a LALPA thu chengcheng chuh a zak phetin,

¹²Leng In lam ah a chieh suk a, lehkhazikpa indan achun a lut a, chun, ngaitie, zie tak achun milien leh lal haw chengcheng chuh a na chuu a, lehkhazikpa Elishama leh Semai chapa Delaiah leh Akbor chapa Elnathan leh Shaphan chapa Gemaria, Hanania chapa Zedekia leh a milien hawu chengcheng chuh zie chun a na um u a.

¹³Chun, Mikaiah chun mipite zak ah, Baruk in lehkhabu ziel a a sim dawk a na zak haw cheng chuh kimtak in a hilh a.

¹⁴Zieziekchun, lal haw chengcheng chun Kushi chapa Shelemiah chapa Netthania chapa Jehudi chuh Baruk kawmah a sawl u a, a kawmah, “Mipite zak dinga a nakhang u a na sim lehkhabuziel chuh hun chawi ah,” a tiu a. Tichun, Neria chapa Baruk chuh lehkhabuziel hun chawiin a kawm u ah a hung a.

¹⁵Tichun, amau chun kawmah, “Chu’n la, ka bil u a ka zak ngêi un sim tie le,” a tiu a; tichun Baruk chun a zak u ah chun a sim ta a.

¹⁶Chun, hiti hi a hung hi a, zie thu haw chuh a zak phet un lau in a ki-en tuoh u a, “Zie thu haw cheng hi ka lengpau hilh ngêi ngêi ung kau,” a tiu a.

¹⁷“Bangti a zie thu haw cheng hi a kawm apat na zik dawk ahim? Ei hilh in,” ti’n Baruk a dawng u a.

¹⁸Chun, Baruk chun, “Zie thu haw cheng hi a kam in a gen a, lehkhatui in lehkhabu achun ka zik mai ahi,” ti’n a dâwng a.

¹⁹Chun, miliente chun Baruk kawmah, “Chieh inla, Jeremia chuh tawh va kisel unla; kuoma’n na um nau he kiu hen,” a tiu a

²⁰Chun, amau chuh a chieh u a, lengpa in achun a lut; u a, lehkhabuziel vang chuh lehkhabu zikpa Elishama pindan ah a kawih tau a, a thu chengcheng chuh kam in leng a hilh u a.

²¹Tichun, leng chun lehkhabuziel la ding chun Jehudi a sawl a, lehkha zik pa Elishama pindan sung achun a va muu a; tichun, lengpa zak in Jehudi chun a sim dawk a, chuleh, lengpa kawma milien leh mi lal umte nakhang achun le a sim ta a.

²²Tha kuo na achun lengpa chuh a phalbi In achun a chu a, a âng achun thukkhuk a mei kitik kuong hi a um a.

²³Chun, tihi ahung hi a, Jehudi chun pêk thum ahim pêk li ahim a sim zawh chun, lengpa chun a la a, chemcha’n a âttan: a, thukkhuk achun a paih lut a, lehkhabuziel chuh a kâktum masieh thukkhuk achun a hâl tai.

²⁴Himahleh, lengpa leh a suokte chengcheng, zie thu za chengcheng chuh kuomah lau puou a, silhlechen bawtthêk a le a um puou hi.

²⁵Zie mai chuh hilo in Elnathan leh Delaiah leh Gemaria te chun lehkhabuziel chuh hâl lo dingin a ngên u a, himahleh, lengpa chun a ngaitha nuom diek puoi.

²⁶Chun, leng chun lengpa chapa Jerahmeel leh Azriel chapa Seraiah tawh Abdeel chapa Shelemiah chuh lehkhazikpa Baruk leh Jeremia man dingin thu a pie a, himahleh, amau chuh LALPA’n a selgu tai.

²⁷Chun, lehkhabuziel leh Jeremia kam apat a Baruk in a zikthak haw cheng chuh leng in a hâltum nung chun LALPA thu chuh Jeremia kieng ah a hung tung kit a, hiti hin a gen a;

²⁸“Lehkhabuziel dang la kit inla, Juda leng Jehoiakim in a hâltum sa lehkhabuziel sunga kizik haw chengcheng kha a bawn in zik dawk kit in.

²⁹Chun, Juda leng Jehoiakim chungchâng achun LALPA’n hiti hin a tii: Babulon lengpa hung in tin, zie gam hi susie’n tin, a sunga mihing leh ganchate hi sumangthai vek in a, ti a kizik chuh bang zieka zie tawbang thu chuh na zik ahim ti’n lehkhabuziel chuh na hâlvam ta a.

³⁰Zieziekchun, Juda leng Jehoiakim chung châng achun LALPA’n hiti hin a tii: David lalchutphah a chu ding mi nei puo’n tin, chuleh, amah luong ngêi chule sun nisa’n a kâk ding leh leh zan dâitui in chap chek dingin paih dawk in um in a.

³¹Chun, a manlohna ziekun amah leh a suonte chuh gawt ding ka hi. Jerusalem a cheng te leh Juda mite chunga thil phalo tunsak dinga ka phuon haw kha hun tun sak ing ka,” a ti a.

³²Tichun, Jeremia chun lehkhabuziel dang khat a la a, Neria chapa Baruk, lehkhazikpa chuh a pie a; amah chun zie sung achun Jeremia thugen lehkhabuziel a kizik sa cheng, Juda lengpa Jehoiakim in mei a a hâlvam sa a thu haw chuh a zik a, zie lak achun, a kibatpih thumal tampi le a behlap hi.