Read Gangte JEREMIA 37 Bible Online

JEREMIA 37 - Gangte bible

JEREMIA 37

¹Babulon leng Nebuknezar in Juda gamsung a leng a a guot Zedekia chun Jehoiakim chapa Konia thasang in vai a hawm a.

²Himahleh, amah leh a suonte leh a gamsung a mite chuh thiemgau Jeremia kam a LALPA thugen ngaihsak himhim a um puou hi.

³Chun, leng Zedekia chun Shelmia chapa Jehukal leh Maaseiah chapa thiempu Zephania chuh thiemgau Jeremia kawmah a sawl a, “LALPA ka Pathien kieng ah ei paucham sak ah,” a ti a.

⁴Zie hun lai chun Jeremia chuh mipite lak ah zalen takin a vak viel thei a; suongkul achun a khum nai puoh ngâl u a.

⁵Chun, Pharaoh sepaih hawn chuh Aigupta apat in a hung kuon dawk tau a; Kaldai te Jerusalem huol te chun a chanchin u chuh a het phet un Jerusalem chuh a kinungzuk san tau a.

⁶Ziephet chun, LALPA thu chuh thiemgau Jeremia kawm achun a hung tung a;

⁷“LALPA Israel Pathien chun hiti hin a tii: Juda leng kei ei dawng dinga hung pa kawm achun hiti hin gen in, Ngaitie, nang hun panpih dinga hung Pharaoh sepaihte khu, amau thu’n a gam uh Aigupta ah vaikit ding ahiu hi.

⁸Chun, Kaldai te chuh hung un tin, zie khawpi hi hun do un tin uh, tichun la vek un tin, mei in hâltum ding ahiu hi.

⁹LALPA chun hiti hin a tii: ‘Kaldai te chun ei taihsan ding ahiu hi,’ ti’n nang u leh nang uh kithem kiu un; hun taihsan lo ding a hih ziekun.

¹⁰Nanguh hun do Kaldai sepaih hawn cheng hi bawl diek mahleu chin le, a lak u a kisuliem haw ngawnin le a puon-in u apat a hung pawtdawk in, zie khawpi hi mei in hâl vam tho ding ahiu hi.”

¹¹Chun, hiti hi ahi a, Pharaoh sepaihte lauh ziek a Kaldai sepaihte Jerusalem a a taih zak phet u chun,

¹²Jeremia chuh Jerusalem apat Benjamin gam a mipite laka pata amah chanvo la dingin a chiehdawk ta a.

¹³Amah chuh Benjamin kawtpi a tun phet chun, kawtkhak veng lawiupa Hanania chapa Shelemiah chapa, a min Irija a na um a, amah chun, “Kaldai te kawmah na kipiei,” ti’n thiemgau Jeremia chuh a mana.

¹⁴Chun, Jeremia chun, “Lepchieh thu ahi chuh, Kaldai te kieng ah ka kipie puoi,” a tih leh, Irija chun a ngaihthak sak nuom puoh a, vaihawm te kawmah a pui zaw ta a.

¹⁵Tichun, vaihawmte chuh Jeremia chung-achun a lungna mah mah u a, a zêp u a, lehkhazikpa Jonathan In achun a khum tau a, zie chuh suongkul dinga a mat uh ahi ngâla.

¹⁶Tichun, Jeremia chuh suongkul, leinuoi thima a khum nung uh ni tamtak nung chun;

¹⁷Leng Zedekia chun a sam dawka, chun, leng chun a insung ah a gukcha’n a dawng a, a kawmah, “LALPA apat in thu bang ahim bêk a um em?” a ti a. Jeremia chun, “A um hi, Babulon leng khuta matsak in um tei ding na hi,” a ti a.

¹⁸Jeremia’n leng Zedekia kawm achun, “Na mite, na suokte leh nang mah zakdah ding bang thil ka hih a suongkul a nei khum ahi?” ti’n a dawng a.

¹⁹“Na gam leh nang hun do dingin Babulon lengpa hung lo ding ahi ti a hun hilhlawk, na thiemgaute chuh khawia um ahi tau hi?

²⁰Zieziekchun, Aw hepu, lalpen, ngaitie, ka ngetna hi ei pawm sak dingin ka hun ngên hi: lehkhazikpa Jonathan In a khun ei sawl kit dah hâm hâm in; khutilochun thi ding ka hi,” a ti a.

²¹Tichun, leng Zedekia chun thu a pie a, “Jeremia chuh vengtu huongsung a suongkul achun a na khum unla, nicheng leh chângthâk siempa In apat in chângthâk tang khat na piek dinguh ahi a, khawpi sunga chângthâk a um lai chan na piek dinguh ahi,” tin. Tichun, Jeremia chuh vengtu huongsung achun khum in a um zing ta a.