Read Gangte JEREMIA 38 Bible Online

JEREMIA 38 - Gangte bible

JEREMIA 38

¹Chun, Mattan chapa Sephatia leh Pashur chapa Gedalia leh Shelemiah chapa Jukal leh Malkia chapa Pashur te hin mipite kawma Jermia’n thu a gen sek haw kha a heu a.

²LALPA’n hiti hin a tii: “Kuole, zie khawpi a um taphawt hi Chemzâmte, kielte, hipite’n thiu intin; Kaldai te kienga kipie te vang chuh hing un au; a damsung chuh galhing kiman guol in hing in a.

³LALPA chun hiti hin a tii: zie khawpi hi Babulon leng sepaihte khut a piek hi tei ding ahi a, a kilak ding uh ahi.”

⁴Chun, miliente chun leng kawm achun, “Zie pa hi suklup hi hen, ka hun ngên ui, amah chun zie thu haw hi gen in, khawpi sunga taihsan a um sepaihte leh mipite a sukthatdah, a mipite phatna ding hi a hawl puoh a; a sietna dinguh a hawl zawk ziek in,” a tiu a.

⁵Tichun, leng Zedekia chun, “Ngaitiem u, amah chuh na khut u ah a um a puo; leng in nang haw deihloh lam bangmah a hih ding ahi puoi,” a ti a.

⁶Tichun, amau haw chun Jeremia chuh a pui u a. Hemmelek chapa Malkia in huongsung a leikawhawm sung achun a paih lut tau a; khauhuol in a khaithau a, leikawhawm sung thim achun tui a um puoh a, buonthuok in a dim a, Jeremia chuh buonthuok lak achun a um ta a.

⁷Lengpa insung a um sek, mitilgeh Ethiopia mi, Ebedmelek in Jeremia chuh leikawhawm sung ah a khe lut ui tih a na zak phetin; zielai tak chun lengpa chuh Benjamin kawtkhak ah a chu a.

⁸Ebedmelek chuh leng in apat chun a pawt a, leng kawm achun hiti hin a gen a,

⁹“Hepu, lengpa, zie mite hin thil gilo huoisie tak a hih tau hi; thiemgau Jeremia chuh leikawhawm ah a paih lut u a, zie mun achun amah chuh gilkiel a thi mai ding ahi: khawpi sung achun chângthâk a um ta puoh ngâla,” a ti a.

¹⁰Ziephet chun, leng chun Ethiopia mi Ebedmelek chuh thu a pie a, “Zie apat hin mi sawm thum pui inla; thiemgau Jeremia chuh a thih masang in leikawhawm sung apat chun va ladawk un,” ti’n.

¹¹Tichun, Ebedmelek chun mite chuh a pui a, lengpa go kawihna In nuoi achun a lut u a, puon luite chuh a ladawk u a, leihawm sung a Jeremia kawm achun khauhuol in a vak khaitha suk u a.

¹²Chun, Ethiopia mi Ebedmelek chun Jeremia kawmah, “Zie a puon lui te leh silhlechen sie haw hi na zaknuoi te nih ah khauhuol hin gâk den in” a ti a. Jeremia chun khutibang chun a hih ta a.

¹³Tichun, Jeremia chuh leikawhawm sung apat chun khauhuol in a khaidawk tau a. Tichun, Jeremia chuh suongkul vengpa huongsung achun a um zing ta a.

¹⁴Chun, leng Zedekia chun thiemgau Jeremia sam ding in mi a sawl a, LALPA ho-in lutna a kawt thumna achun a kimuhpih a, leng chun thiemgau Jeremia kieng achun, “Thil khat hun dawng ing ka ting, ka kienga bangmah na îm loh ding ahi,” a ti a.

¹⁵Chun, Jeremia chun leng Zedekia kawmah, “Hun hilh leng, ei that tei lo ding na him? Ka thu hun hilh ding chuh ei ngaitha ding na hi na maw?” a ti a.

¹⁶Khutichun, leng Zedekia chuh a gukcha’n Jeremia kawm achun a kipautiem a, “LALPA, I hinnau siempa chuh a hin sung cheng chuh hun sulum hiel puo’ng ka ting, na hinna hawlte khut achun le hun pie diek puo’ng ka,” a ti a.

¹⁷Ziephet chun, Jeremia chun Zedekia kawm achun, Israel Pathien, Sepaihte LALPA chun hiti hin a tii, “Babulon leng miliente kawma na kipiek chun, na hinna chuh hukbit in na tin, zie khawpi hile meia hâlvam hi puo’n tin, nang leh na inkawte hing ding na hiu hi.

¹⁸Amahvang chuh, Babulon leng miliente khuta na kipiek loh chun, zie khawpi hi Kaldai te khuta piek hi’n tin, tichun, mei in hâl un tin, amau haw khut apat hin suokcha hiel puo’n la,” a ti a.

¹⁹Ziephet chun, Zedekia chun Jeremia kawmah, “Kaldai te khuta umsa Judate chuh ka lau hi, a ziek chuh, a khut uh a piek in um ta leng, ei sugimthei ding a hih ziekun a hi!” ti a.

²⁰Himahlele, Jeremia chun, “Amau haw khuta piek hilo ding na hi, na kawma ka gen, LALPA aw hi ngai mai in, khuti leh nanga dingin pha’n tin, na hinna le hawih a um ding ahi,” a ti a.

²¹“Himahleh, na kipiek lut nawp loh le vang chuh, ziehi LALPA thu ei hetsak chuh ahi:

²²Ngaitie, Juda lengte ina numei nutsieh a um cheng chuh, Babulon lengpa leh a chapate kieng ah puih in um un tin, zie numeite chun, ‘Na guolpha teu in a hun thêm u a; a hun zo tau a, tichun, na keng te nih le buonthuok lak ah a lut ta a, amau chun nang a hun kihei mangsan tau hi,’ ” a ti a.

²³“Khutichun, na zi le chate chuh Kaldai mite’n kipuih vek untin, a khut u apat in pawtdawk puo’n la. Babulon lengpa khuta matsak hin na tin, zie tieng chuleh zie khawpi hi mei a hâltum hiding ahi,” a ti a.

²⁴Tichun, Zedekia chun Jeremia kawmah, “Zie thu hi kuoma’n he kihen, khutichun, thilo ding na hi.

²⁵Himahlele, leng chate’n ka hun hopih hi a het u a, na kienga a hung u a, na kawm a, ‘Leng kawma na gen, kha ei hilh ah, ka kawm u ah bangmah îm ki’n; hun that lo ding ka hiu hi, na kawma leng thugen haw chule,’ a tih u chun,

²⁶Nangin a kawm u ah, ‘Jonathan In a ei sawl kit lo a, zie a chuh va thilo dingin leng kawm a kingainiem taka ngetna ka va siem ahi,’ ti leh chin,” a ti a.

²⁷Ziephet chun, lawiupate chuh Jeremia kawm achun a hung u a, a dawng ta ngêi u a, tichun, lengpa’n a gen guol chun a dawng ta a. Tichun, a thugen u chuh bang ahim tih a hettheih loh phet u chun Jeremia chuh a taihsan tau a.

²⁸Tichun, Jeremia chuh Jerusalem lak ni tieng khan vengtu huong sunga chuh um zing ahi.