Read Gangte JEREMIA 4 Bible Online

JEREMIA 4 - Gangte bible

JEREMIA 4

¹Aw Israel, na vaihkit chun kei kawm ngeia na hung vaihkit ding ahi LALPA’n a tii. Na kihdak-um nate ka mitmuh a na kawih mang leh nang chuh sukmangthai hi puo’n la.

²Tihtakzet leh vaihawmna diktak manga diktak a, LALPA a hin zing bangin ti a na kipautiem chun, namte chuh amah achun vangsak in um untin; Amah chuh suong tan au.

³Juda leh Jerusalem mite kawm achun LALPA Pathien in hiti hin a ti ngâla; “Na lei sît u chuh let unla, ling lak achun chi theh kiu in.

⁴Nanguh Juda mi leh Jerusalem a chêngte haw LALPA het in zektan unla, na lunggil zek teu tan un. Na thil gilo hih teu ziekin ka lungnat na chuh mei bangin hung kuong khan tin; kuomah phelh theih loh in hun kang khâna.”

⁵Juda gam ah phuong unla, Jerusalem ah genzak un. Gamsung pumpi achun pengkun mût unla, ngeih tak in kiko un. Hung khawm unla khawpi kulh nei haw ah lut hitiu, tiu un.

⁶Zion lam nga’n puonzak khâi unla, bitna hawl in tai un. Muong kiu unla, mâllam apat in thil phalo hun tunsak ding ka hi. Sietna huoisie tak mai chuh.

⁷Gammâng kulung apat chun sakeibaknei a hung pawt hi, nam te susie ding chuh. Amun apat chuh a hung pawt ta a, a hung lai tak ahi. Na gam suhawm ding leh na khawpite luoh loh a kawih dingin.

⁸Zieziekchun kawlladip silh unla, kap unla, khuoisa vungvung un. LALPA lungnat na huoisie tak mai chuh I lak u apat in akithiel puoh ngâla.

⁹Zie ni chun hiti hi hung hi’n a, LALPA’n a tii, Leng leh vaihawmte lungthim chuh hung taisie’n tin, vaihawmte lungthim le, thiempute chuh beidawng untin, thiemgaute chun maksa mah mah un au.

¹⁰Chun, kei chun Ehe! LALPA Pathien diktak in zie mite leh Jerusalem hi hah thepa na thep a hi hi, “Muonna nei unlau na ti a, chemzâm in a hinnau a sun ngâla,” ka ti a.

¹¹Zie tieng chuleh zie mite leh Jerusalem kawm ahin, Thalek gamgaw apat in huih lum tak, ka chanu ka mite suthieng ding hilo, ka mite mût vawt ding le hi diek lo hung nung ina.

¹²Huih hattak mai, ka thu a hung tung ding ahi a; tuhin le a chung u a vaihawm sak chuh kei ka hi, tih hi’n a.

¹³Ngaitie, meipi guol in hung to ding ahi, a kangtalaite chuh chinpei bang mai in; a sakawlte chuh mupi sangin a kin zawu hi. I chung uh a gik na e! Suksiet ding I hi ngâl u a.

¹⁴Aw Jerusalem, gitloh na apat in na lunggil sawp thieng inla, ti a chuh hukdam na hih theih na dingin. Bang chana na ngaihtuoh na gilo chuh na vawp ding?

¹⁵Dan apat in aw a hung pawt a, Ephraim tâng apat in sietna a phuong lang tau hi.

¹⁶Namte chuh hilh unla, Jerusalem ah phuong un, ngaitie, gam gamla tak apat in melma a hung tung u a, Juda khawpi haw chungah aw suoh in a kiko ui.

¹⁷Lo hawng te bang mai in a kimvel achun a um u a, ka chung a a hel ziekun, LALPA’n a tii.

¹⁸Na umdan leh na thilhih teu chun ziehaw hi na chunga a tunsak ahi. Zie hih na sietna ding chuh ahi a, a na mah mah ngâla, na lungthim a sun hi.

¹⁹Ka lung a gim hi, ka lung a gim hi, ka lungchang tieng in a na a, ka sung ah ka lungthim a buoi zo ta a; ka um hiet hiet thei puoi. Aziek chuh, aw ka hinna, pengkun gi leh kidona heizam na zak ziekin.

²⁰Sietna chungah sietna a hung tung tai, gamsung chuh suksiet a hita a, ka puon-In te chuh thakhat a suksiet ahiu a, ka puonzak haw chule mitphetlohkal in suksiet ahi tai.

²¹Bang chan ahi die kidona puonzak ka muh a, kidona pengkun gi ka zak ding?

²²Ka mite chuh a ngawl bêk u a, ei he ngâl puou a; naupang ngawl hetna neilo bang mai ahiu hi. Thil gilo hih a thiem u a, thilpha hih dân vang a thiem puou hi.

²³Leichung chuh ka vak en a, ngaitie, a sie leh a hawmngawn ahi a; van haw chun le vak a nei puou a.

²⁴Tang haw chuh ka en a, ngaitie, a kilîng u a, muol haw chule a kilawk u a, a kilîng dup dup u a.

²⁵Ka vak en a, chun ngaitie, mihing a um puoh a; chung leng vachate chengcheng le a leng mang zo tau hi.

²⁶Ka vak en a, chun ngaitie, gam gahsuoh haw chuh gamgaw a suok zo ta a; khawpi cheng le LALPA masang achun a chim zo ta a, a lungnat na tizat-um tak masang achun.

²⁷LALPA’n hiti hin a tii, Gam sung pumpi chuh hung hawm suok intin, mahleh sukmangthai vek hi puo’n a.

²⁸Zieziekchun lei in sun intin, chunglam van haw le thim ina. Thu ka gen ta a, tup ka neih ziekin kisik puo’ng ka ting, kinungzuk diek puo’ng ka.

²⁹Sakawl chunga chu te husa leh thal chawite thawm chun khawpi a mite chuh taisieu untin; gammâng ah tailut untin, suongpi chung haw ah kal un tin; khawpi cheng chuh taihsan untin uh, a sung ah kuomah cheng puo’n au.

³⁰Chun, buluh a na um tieng leh bangti’n na um ta die? Puon sandâng silh in, sana te a kichei in, na mit haw chuh nuh theih chin nuh leh chin le na kihawihsakna chuh a thâwn ahi. Na ngaihzawng te chun a hun musit tho u a, na hinna lak guon a hawl ui.

³¹Numei nauhanat tau git tawbang ka za a, nautil hing nat thuok lai, Zion chanu ha huoi huoi a kah git chuh a khuthaw zak in, “Ka chung a gik hi, tuolthat te masang ah ka thidang zo tai,” tih aw ahi.