Read Gangte JEREMIA 41 Bible Online

JEREMIA 41 - Gangte bible

JEREMIA 41

¹Chun, hiti hi a hung hi a, tha sagihna achun, Elishama chapa Nethania chapa Ishmael, leng chi, leng siehmangte laka khat chuh, mi sawm pui in Mizpah khuo a Ahikam chapa Gedalia kawmah a hung uh a; tichun, Mizpah khuo achun an a ne khawm uh a.

²Chun, Nethania chapa Ishmael chuh, a mi puih sawmte chu tawh a kipan u a, Shaphan chapa Ahikam chapa, Babulon leng in gamsung vaihawm dinga a siem Gedalia chuh chemzâm in a that tau a.

³Khutichun, a kawma Juda mi um haw leh, Mizpah khuo a Gedalia kawma umte leh, Kaldai sepaih a na umte chule Ishmael chun a that vek ta a!

⁴Chun, Gedalia a thah nung ni nihna achun hiti hi ahung hi a, kuoma’n a hetdawk mau in;

⁵Shekem apat te, Shiloh apat te, Samari akipat te chun mi sawmgiet, a khabemul uh met in, a puonteu bawtthêk in, amau ki-ât in, chângthâk thillat te leh gimlim chawiin LALPA Ho-In a lân dingin a hung u a.

⁶Khutichun, Nethania chapa Ishmael chuh Mizpah khuo apat chun amau haw muok dingin a kipan dawk a; lam tung tawn in a kap a, tichun, amau haw chu tawh a kituok phetin, a kawm u ah, “Ahikam chapa Gedalia kawmah hung un,” a ti a.

⁷Chun, hiti hi a hung hi a, khawpi sung a tun phet u chun, Nethania chapa Ishmael le a mi puih teu chun amau haw chuh a na that tau a, amah leh a lawite chuh kawkhuk ah a paih lut u a.

⁸Himahleh, a lak u a mi sawm te chun vang, “Ei that ki’n, lo achun buhte, buhmanpawlte, sathaute leh khuoizute ka selgu ngâl u a,” a tiu a. Tichun, amau haw chuh a hing hawih u a, a suohpihte lak achun a that khawm ta puou hi.

⁹Chun, Ishmael in Gedala tawh a thah khawmte luong a paihnau kawkhuk chu leng Asa’n Israel leng Baasha a lauh ziek a a laih ahi. Nethania chapa Ishmael in zie chuh a mithahte luong in a sudim a.

¹⁰Tichun, Ishmael chun khuo a mihing dama umsun, leng chanute, Ahikam chapa Gedalia khuta sepaih hotu Nebuzaradan in a kawlsak Mizpah khuo a um nalaite tawh sal in a pui vek ta a; Nethania chapa Ishmael in ziete chuh sala pui in, Amon gam lam zuon in a kipan dawk tai.

¹¹Amahvang chuh, Karea chapa Johanan leh a kawma um sepaih hotu cheng cheng te chun Nethania chapa, Ishmael thil phalo bawl haw chengcheng chuh a na he vek u a.

¹²Mi chengcheng chuh a puidawk u a, Nethania chapa Ishmael do ding chun a kipan dawk u a, dîl lien tak umna mun Gibeon achun a va muu a.

¹³Chun, tihi ahi a, Ishmael kienga mipite chun Karea chapa Johanan leh a kawma sepaih lawiupa te chuh a vak muh u chun, a kipâk mah mah mai tau a.

¹⁴Tichun, Ishmael in Mizpah khuo apat a sala a puih cheng chengte chuh a kihei u a; Karea chapa Johanan kawma chun a chieh tau a.

¹⁵Nethania chapa Ishmael vang chuh mi giet te chu tawh Johanan kawma pat chun a taidawk thei hâm hâm u a; Amon mite kieng achun a chieh tau a.

¹⁶Chun, Karea chapa Johanan leh a kawma sepaih hotu um cheng te chun, Nethania chapa Ishmael in Ahikam chapa Gedalia a thah nunga Mizpah khuo apat a Nethania chapa Ishmael apat a Johanan in a hukdawk te laka um nalai cheng, sepaihte, numeite, naupangte leh mitilgehte, Gibeon apat a a puihkit te chuh a leh puihkit vek a.

¹⁷Chun, a pawt u a, Kaldai te lauh zieka Aigupta gama taihlut guon Bethlehem khuo kawma Geruth Chimham achun a châwl tau hi.

¹⁸Tichun, Nethania chapa Ishmael chun Ahikam chapa Gedalia, Babulon leng in zie gam awp a a kawih chuh a thah ziekin a mau chuh a lau mah mah zieng ta ngâl u a.