Read Gangte JEREMIA 44 Bible Online

JEREMIA 44 - Gangte bible

JEREMIA 44

¹Aigupta gama Juda um chengcheng, Migdol khuo te, Tahpanhes khuo te, Noph khuo te leh Pathros gama cheng te chunga Jeremia kawma thu hung tung chuh,

²“Sepaihte LALPA, Israel Pathien in hiti hin a tii: Jerusalem leh Juda khawpite chunga thil phalo ka hun tun sak haw cheng chuh na mu tau a; chun, ngaitiem u, tuhin a hawmngawn ahi ta a, kuomah a cheng ta puou hi, ti’n.

³Amau leh nang u leh na suonteu un le, pathien dang te a het khâkloh uh nasem ding leh, a kawm u a gimlim hâla ei sulungna dingin a thulimlohna teu a hih tâk ziekun.

⁴Khutisa chun le, ka nasem thiemgaute chuh na kawm u ah chawllo in ka hun sawl a, a kieng u ah, ‘Zie thil kihdak um, ka hawt lam tak hi chuh hih ta kiu,’ ti’n.

⁵Mahleh, a ngaitha diek puou a, a nunsiet nau haihsan a pathien dang te kienga gimlim hâl loh ding chuh a ngaihsak diek puou hi.

⁶Zieziekchun ka lungnat na leh ka thangtawm na chuh Juda khawpi haw leh Jerusalem kawtthêl haw achun ka sungtha a, a kuong ta a, tuni a a um guol hin a hawm a um in luoh loh in a um tai.

⁷“Zieziekchun tuhin vang, LALPA Sepaihte LALPA, Israel Pathien chun, ‘Na lak u apat numei leh pasal, nausen leh nawichep laite, Juda laka pat kuomah sit lo a sumangthai vek dinga bang zieka zie thil phalo tak hi nang mau hinna chung ngêi a na hih uh ahim?

⁸Na va chênnau Aigupta gama pathiente kawma gimlim hâl in, khawvel a nam cheng laka khenthak leh hansie dawl leh gensiet na hih na ding u leh, gawt chimit na hih na ding u a bang zieka na khut nasep ngêi u a nei suklungnat uh ahim?

⁹Na pileputeu nunsiet na leh a mipite thulimlohna leh na zi teu thulimlohna, Juda gam leh Jerusalem kawtthêl haw a a hih u haw kha na hengilh tau a ahim?

¹⁰Tuni tieng hin a kisik nai diek puou a, nang uh hun suon te leh nanguh masanga ka taklat, ka dân leh ka thuguot haw chuh na zui puou a, lauh le na lau diek puou hi.’

¹¹“Zieziekchun, Sepaihte LALPA Israel Pathien chun hiti hin a tii: Ngaitiem u, na chunguh ah siet na hun tunsak ing ka ting, Juda chengcheng sumangthai vek ding ka hi.

¹²Chun, Juda umsun, Aigupta lama chen guo a kihei hâm hâm te chuh man ing ka ting, suchimit vek ing ka, Aigupta gam achun a lien pên apat a neupen tiengin, chemzâm leh kiel a sukchimit in um un tin; hansie thuok leh maksak leh mi mûk chuonna leh gensiet hi’nau.

¹³Jerusalem ka gawt guol mah in, Aigupta gama cheng te chuh chemzâm leh kiel leh hipi’n gawt ding ka hi ngâla.

¹⁴Khutichun, Aigupta gama cheng ding a chieh Juda umsun te chuh, Juda gam, a um na ding a vaihkit a utchak mah mah nau gam achun vaikit dingin khat cha le hing leh dam in pawt puo’n au; a gûka taidawk te tihloh chuh kuomah vaikit puo’n au.”

¹⁵Tichun, mi chengcheng, a ziteu in pathien dangte kawmah gimlim a hâl ui tih hete leh, numei zie taka dingte leh Aigupta gama Pathros a mipi tamtak te chun Jeremia chuh a dawng u a, hiti hin a gen u a.

¹⁶“LALPA min a ka kawm u a na thugen haw kha vang hung ngaitha puo’ng kau.

¹⁷Himahleh, kei u leh ei suonteu leh ka leng teu ka milien teu in Juda khawpi haw leh Jerusalem kawtthêl haw a a hih guol u khan, van lengnu kawma gimlim hâl, a kawma thilpiek sung dawkte, ka kamsuok bang zel u khan hih ngêi ung kau; zie lai khan a lamzang u a, nek le châk a kiting a, sietna himhim ka mu puou hi.

¹⁸Van lengnu kawma thillat leh dâwn ding thilpiek sun dawk ka haihsan u apat in bangkim ka tasam zawu a, chemzâm leh kiel haw a hih mangthai in ka um tau hi,” a tiu a.

¹⁹Chun, numeite chun, “Van lengnu kawma gimlim ka hâl u leh a kawma dâwn ding thilpiek ka sundawk lai u khan ka pasal teu lemsak loh in amah ho na ding chângthâk ka siem un, dâwn ding thilpiek pathien kawmah ka sungdawk uh a ahim?” a tiu a.

²⁰Tichun, Jeremia chun mipite chengcheng; amei-apa’n amah dawng chengcheng te kawm achun,

²¹“Juda khawpi haw leh Jerusalem kawtthêl haw a nang u leh na pileputeu leh na leng teu leh na milien teu leh gamsung a mipi himhim in gimlim a hâlteu chuh LALPA’n hezing in a lunggil ah khum lo ding ahim?

²²Thil phalo na bawl ziek u leh thil gilo na hih hawu ziekin LALPA’n a thuok ngâp talo ahi kha; zieziekchun na gam u chuh tu a a um bang hin luoh loh leh gamgaw, maksak leh hansie dawl a hung hita a.

²³Gimlim na hâl u a, LALPA chungah na gilo u a, LALPA kamsuok na zui puou a, a dân leh a thuguot leh a thu hetsak haw chule na zuih diek loh ziekun, thil phalo haw hi tu a a um bang hin na chung u ah a hung tung tai,” a ti a.

²⁴Zielo chun, Jeremia chun mipi cheng leh numei haw kieng achun, “Aigupta gama Juda um chengcheng te LALPA thu hi ngai un.

²⁵Sepaihte LALPA Israel Pathien chun hiti hin a tii: Nang u leh na ziteu chun van lengnu kawma gimlim hâl leh dâwn ding thilpiek sundawk te chuh ka na kitiem bangun hih ngêi ngêi ung kau, ti’n na kam un na gen tau a; na khut un le na subuting tau a, na thutiem u chuh sudet unla, na thutiem teu chuh supiting ngâl un.

²⁶Zieziekchun, nanguh Aigupta gama Juda chengcheng te, LALPA thu hi ngaitha tiem u: Ngaitiem u, LALPA Pathien a hin zing bang hin ti’n Aigupta gam pumpi a cheng Juda mi kuomah kama pat in ka min kigen ngei ta puo’n a ti’n, ka min lopi sal in ka kitiem hi tih hi LALPA kamsuok ahi.

²⁷Ngaitiem u, a phat na dinguh hilo, a sietna dingun amau ka châng zing hi. Tichun Juda mi Aigupta gama cheng haw cheng chuh chemzâm leh kiel haw a sukmangthai hi’nau, a manthai vek macheng un.

²⁸Chun, chemzâma thi mâwk tawmcha te chuh Aigupta gama pata pawt in Juda gam ah lut un au; chun Juda umsun cheng Aigupta gama cheng dinga chieh te chuh kuo thu hatzaw ding ahim, kei thu ahim amau thu hun hen au.

²⁹“Chun, zie hi nanguh a dingin melchikna hi’n a; ka thu hi nanguh dingin thil phalo lam in chieh ngêi ding ahi tih na hettheih na dingun, zie mun ahin hun gawt ding ka hi tih hi LALPA kamsuok ahi.

³⁰LALPA chun hiti hin a tii: Ngaitiem u, Pharaoh-Hophra Aigupta leng chuh a melma a hinna hawlte khut ah pie ding ka hi; Juda leng Zedekia chuh a melma a hinna hawlpa Babulon leng Nebuknezar khuta ka piek bang khan,” a ti a.