Read Gangte JEREMIA 45 Bible Online

JEREMIA 45 - Gangte bible

JEREMIA 45

¹Juda leng Jehoiakim Josia chapa a lal kum lina achun Jeremia kama pat in zie thu haw hi lehkhabu a zik ahih laia Neria chapa Baruk kawma thiemgau Jeremia thugen chuh:

²LALPA Israel Pathien chun, “Aw Baruk, na kawmah hiti hin a tii:

³‘Nangin ka chunga gik na e! LALPA chun ka thawkna ah lungkhamna ei behlap sak ta ngâla, ka tau hi ka chauh lawh a, chawlhdamna himhim ka mu zo puoi,’ na ti a.”

⁴A kawm achun hiti hin gen ah, “LALPA chun hiti hin a tii; ‘Ngaitie, ka sak sa chuh phie kit ing ka ting, ka phuh sa chuh bawt dawk kit ing ka, gamsung chengcheng achun.

⁵Chun, nanga dingin thil lopi na hawl em? Hawl dah mai ah, ngaitie, mi chengcheng chungah thil phalo hun tun sak ding ka hi ngâla tih hi LALPA kamsuok ahi. Himahlele, na hinnau chuh muntin a na chieh na chengah galdona a kipahman guolin hun pie’ng ka,’ ti’n.”