Read Gangte JEREMIA 49 Bible Online

JEREMIA 49 - Gangte bible

JEREMIA 49

¹Amon chate thu, LALPA chun hiti hin a tii: “Israel in chapa neilo ahim? Goluoh ding neilo ahim? Bangati a Gad chuh Milkom in a luoh a, a mite khawpi haw a a chen sak a?

²Zieziekchun, ngaitiem u, nite chuh a hung tung hi tih hi LALPA kamsuok ahi. Kido thawm zak sak ing ka ting, Amon chate Rabbah chung achun, khutichun, thil sie umkhawm bang mai hung hi ding ahi, a khuo teu chuh mei in ka’n tin; tichun Israel chun amah neitu chuh nei thuk ina, LALPA’n a tii.

³Aw Heshbon, hahpi’n kap inla, Ai chuh a susie zo ta ngâl u a; Rabbah chate haw kap un, saidippuon silh unla, kap unla, a dai sung haw achun taiviel un. Milkom chuh sala puih a um ding ahi ngâla, a thiempute leh a miliente tawh.

⁴Bangati a na phaichamte kiletsak pih na him? Aw chanu ginum lo, a go khawlte suong a, kuo a ei do ding? ti sek nu.

⁵Ngaitie, na chungah lauhna hun tun sak ding ka hi, na kimvela mi chengcheng laka pat tih hi LALPA Sepaihte Pathien kamsuok ahi; Mitin nawhdawk hi vek unlau, a taimang haw chuh kuoma’n sam khawm puo’n au.

⁶Himahleh, Amon chate saltanna apat chun puikit ing ka ting tih hi LALPA kamsuok ahi.”

⁷Edom thu, Sepaihte LALPA chun hiti hin a gen hi: “Teman ah chitna um talo ahim? Lemhete lem hetna chuh a bei zo ahi ta’m? A chitnau a bei zo ahi ta’m?

⁸Aw Dedan a chêngte, taizak unla, kisel mang kêi un; Esau sietna chuh a chungah hun tun sak ding ka hi, amah ka gawt tieng chuleh.

⁹Grep lote chuh na kawmah hung leu hetngilh neilo ding maw? Zan a guchate chun a deihkhawp uh a ngah ma cheng uh chawm lo ding ahiu hi?

¹⁰Himahleh, Esau chuh ngâwnchang in ka kawih ta a, a selguk haw le ka hâwk dawk saka; kisel thei ta puo’n a. A suonte chuh suksiet ahiu a, a suohpihte, a invengte haw tawh, khat chale a um ta puoi hi.

¹¹Pa neilo, na naute chuh ngaihsak ki’n, ken amau chuh humbit ding ka hi a, na meithai teu chuh ka chungah kingau hen.”

¹²LALPA chun hiti hin a tii: “Khawn dâwn lo ding ten le a dâwn ngâl u chun, nang gawt loh hiel in na suokcha ding a ahim? Gawt loh in pawt puo’n na tin, dâwn tei inla.

¹³LALPA chun kei leh kei kisâm in ka kipautiem ta ngâla, Bozrah chuh maksak huoi huoi, gensiet, hawmngawn, hansiedawl hi’n tin, a khuo haw cheng le a sie’n um den ina, ti’n.”

¹⁴LALPA kawma pat in thu ka za ta a, namte kawma sawlchak sawl ahi tai. “Hung kipunkhawm unla, amah do un la, kido dingin hung dieng dawk un.

¹⁵Ngaitie, namte lak ah ka hun suneu a, mihingte muhsit in na um ta ngâla.

¹⁶Na lauh-umna chuh thepna ahi a; lunggil a na chapo na chuh, Aw nang, kâwl sang chunga suong kal a tângsip a cheng sek; mupi guol in na bu chuh sang takin sieh mahleh chin, zie apat chun hun latha tho tho ding ka hi, tih hi LALPA kamsuok ahi.”

¹⁷“Chun, Edom chuh maksak huoi huoi in hung um in tin, mi vakviel tapoh chun maksau untin, a siet huoisiet bêk ziek chun chekkhum un au.

¹⁸Sodom leh Gomorra leh a kimvel a khawpi te chuh suksiet a hih bangun, kuomah cheng ta puou intin, mihing cha kuomah zie chun um ngei ta puo’n au, LALPA’n a tii.

¹⁹Ngaitiem u, Jordan gammâng apat a sakeibaknei, gancha tat na mun haw ah hung to intin; amau haw chuh a lak u apat in delhmang sak ing ka ting; a chung u a thunei dingin ka nawp taphawt guot ing ka; kei tawbang hi kuo a um: Kuo a hunbi ei guot sak ding? Belam pu ka masanga ding ding chuh kuo ahi?

²⁰Zieziekchun, Edom chunga LALPA thilbawl guot leh Teman chunga a thilbawl guot, hih a guot haw chuh ngaitha tiem u, ganguol nokai haw chuh nawhmang in um untin uh, a chênna chuh sukhawm sak hi’n a.

²¹A puksiet git u chun lei hi kilîng intin, a kah thawm u chuh Tuipi san tieng in le zak hi’n a.

²²Ngaitiem u, mupi bangin hung leng to intin, Bozrah chung achun tha zak ina: zie ni chun Edom mi hangsante lunggil chule numei nauhanat lungthim bang phet hi’n a.”

²³Damaska thu: Hamath chuh a zakcha tai, Arpad tawh, thu phalo a za ta ngâl u a, a tuimang zo tau a, tuipi kinawk um hiet hiet theilo guol in a kichâwk ui.

²⁴Damaska chuh a chau tha ta a, taihsiet a guo a; lauhna’n a man ta a, numei nauhanat bang mai in, Lungngaihna leh natna’n a man ta a.

²⁵Khawpi minthang leh lawpna mun chuh bangti a nutsieh a um ahi ta?

²⁶Tichun, zie ni chun a tangval teu chuh kawtthêl achun puk un tin, a gâlhât hangsan te cheng chuh zie ni chun mangthai un au, tih hi Sepaihte LALPA kamsuok ahi.

²⁷Chun, Damaska kulhbang achun mei tik ing ka ting, Benhadad leng In haw chuh kavam ina.

²⁸Kedar leh Hazor gam haw Babulon leng Nebuknezar in a do thu: LALPA chun hiti hin a tii; “Kipan inla, Kedar chuh do unla, suohlam chate chuh that chimit un.

²⁹A puon-In teu leh a gan guol cheng cheng teu lâksak unla, a puonzak teu leh a ûmlebel teu, a sangawngsau teu chuh puok mang sak hi’n a, ‘Ning tin ah lauhna a um hi,’ ti’n mite chun kikokhum un au.”

³⁰“Taimang unla, vakmang pai un, tum mang kêi un, Aw Hazor a chêngte haw, tih hi LALPA kamsuok ahi. Babulon leng Nebuknezar chun nang hun do in na chungah thugen in thil a guonggalh tai.

³¹Tho unla, thamuong tak a um, amah maia khawsa, kulh kawtkhak neilo, a kamna thiktawn le neilo nam chuh sim un tih hi LALPA kamsuok ahi.

³²“A sangawngsau teu chuh gâl in la’n tin, a gan guol teu chule gâllâk sum hi’n a. Baksam met namte chuh huih guol in ning tin ah thehdalh ing ka ting; a sietna ding u chuh ning tin apat in tunsak ing ka tih hi LALPA kamsuok ahi,

³³Chun, Hazor chuh si-âlte chênna mun hi’n tin, kumlekhuo’n sie den ta’n a. Zie tak achun kuomah cheng ta puou un tin uh, mihing chate himhim cheng ta puo’n au.”

³⁴Juda leng Zedekia vaihawm tung laia, Elam chungchâng thu a LALPA’n thiemgau Jeremia kawma a gen chuh:

³⁵“Sepaihte LALPA chun hiti hin a tii, ‘Ngaitiem u, Elam thal kap mite, a hatna bulpipen chuh susie vek ing ka ting,

³⁶Elam chung achun kâwlmawng li apat in huihpi hun nun sak ing ka ting, a mite chuh muntin ah thehzak ka ting, a taih zak lohnau gam himhim um lo in thehzak ing ka.

³⁷A melmateu, a hinnau lak nuomte masang achun Elam mite chuh lauhna pie’ng ka ting. Ka lungnat nasatak chun Elam mite chuh sumangthai ing ka ting, ka sukmang suok kêi macheng chun amau haw do dingin sepaih sawl ing ka,’ tih hi LALPA kamsuok ahi,

³⁸A lengteu leh a milienteu chuh sumangthai vek ing ka ting, zie tak achun ka lalchutphah tung ding ing ka.

³⁹Himahleh, ni nunung haw achun hiti hi hi’n tin, Elam mite chuh a saltannau apat chun puikit ing ka, tih hi LALPA kamsuok ahi.”