Read Gangte JEREMIA 6 Bible Online

JEREMIA 6 - Gangte bible

JEREMIA 6

¹Benjamin chate haw, na bitna dingun Jerusalem apat, in taimang unla, Tekoa ah pengkun mût unla, Bethhakkeram ah melchikna tâk dawk un. Mâllam apat in sietna huoisie tak a hung kitawl hi; siet na huoisie tak mai chuh!

²Zion chanu chuh numei melhawih tak leh no tak tawh ka tehkhin ahi.

³Belam pute chuh a belam guol teu tawh amah do dingin a kawm hung tung un tin, a kimvel ah a puon-In teu zak untin, amau utna chiet ah a gancha teu tat sak un au.

⁴Amah do dingin kisau inla, kipan un, sun chang lai tak in do hitiu. I chunguh a gik na e! ni a kihei ta a, nitâk lam lim le a hung sau tai.

⁵Tho unla, zan lai in do hiting un! A leng In hawu chuh suksiet sak hitiu, a tiu a.

⁶Sepaihte LALPA chun hiti hin a tii, “Thing haw chuh phuk unla, Jerusalem dona dingin lei sep sang un. Zie khawpi hi ahi gawt ngêi ngêi ding chuh; a sung achun thil dang hilo kipawngbawlna chauh a um ngâla.

⁷Tuilaihdawk in tui thieng a piekdawk bangin, a nunsietnau chuh a thak zing hi. A sung achun kipawngbawlna leh kisuksiet tuoh na a um hi tih het ahi a, lunggimna leh kisukliem nate chuh ka masang ah a um zing hi.

⁸Ka lunggil in a hun taihsan masang in, Aw Jerusalem, chingthei in. Khutilochun, kuomah chen loh na gam in hun siem khang ka ting, hun suhawm khang ka.”

⁹Sepaihte LALPA chun hiti hin a tii, “Israel um sunte chuh grep gui bangin lo thieng vek unla, grep gah lakhawm haw bang chun na khut in a bâkhaw chuh mai viel in.”

¹⁰A hettheih ding un kuo a ka hopih ding, kuo a ka sap ding? Ngaitie, bilvih loh ahiu a, a za thei puou a, LALPA thu chuh amau dingin nuihzat um ahi a, kipahna himhim a nei ta puou hi.

¹¹Zieziekchun, LALPA lungnat na’n ka dima, kidêk zing hi ka chim tai. “Khawlai a naupang haw chungah chun sungtha’n la, tangval um khawm haw chung ale; a zi pum in pasal chuh lak hi’n tin, upate leh teksie te le.

¹²A in u haw chuh midang kawma piek hi’n tin, a lo u leh a ziteu tawh. Zie gama chêngte chung achun ka khuttha ding ka hi ngâla, LALPA’n a tii.

¹³A neupen apat a lienpen tieng in mitin chuh lawkna diklo in a huoiham u a; thiemgaute leh thiempute nasan chule, mitin in diklo takin a hih tau hi.

¹⁴Amau chun ka mite liemna chuh ngaihsam takin, ‘Muonna, Muonna,’ ti’n a gen u a, thamuonna a um hiel puoh ngâla.

¹⁵Thil ten um a hih un le a zakcha diek um? Hilo, a zakcha hiel puou a, a mai u le a muol diek puoi. Zieziekchun, midang lak achun puk untin, amau haw chuh ka gawt tieng leh a tâwp nau chuh hita’n a, LALPA’n a tii.”

¹⁶LALPA chun hiti hin a tii, “Lampi pang haw achun ding unla en un. Lampi pha umna lamluite chuh dawng un la, zie tak achun chieh unla, na thagau u a dingin chawlhna mu’n lau,” ti’n. Himahleh, amau in vang, “Zie lampi chuh hawh puo’ng kau,” a tiu a.

¹⁷Chun, nanguh a dingin gâlvengte ka kawih a, “Pêngkun gi chuh ngaithau in,” ti’n. Amau chun la, “Ngaitha puo’ng kau,” a tiu a.

¹⁸“Zieziekchun, aw namte haw ngaithau inla aw kikhawmkhawmte haw a chung u a hung tung ding chuh heu in,

¹⁹Aw leisiet a na ngaitha’n zie mite chung ahin sietna hun tun ding ka hi. A ngaihtuoh na hawu gah ngêi chuh, ka thute chuh a ngaihsak puou a; ka dân te chula a paih tha kei u a.

²⁰Bang ding a Sheba apat begaw te, gam gamla tak akipat in gilimte chuh ka kawma a hun chawih sek uh ahi? Na hâlmang kithawihnateu chuh pawmtâk ahi puoh a; na kithawihna hawu chun le ei sukipak diek puoi.

²¹Zieziekchun LALPA’n hiti hin a tii, Zie mite kawm ahin kisuihna kawih ing ka ting; zie tak achun pate chuh a chapateu tawh pukkhawm un tin, inveng leh a lawipa chule mangthai un au.”

²²Chun, LALPA’n hiti hin a tii, “Ngaitiem u, mâllam apat in nam khat a hung u a, lei mawng tâwp a pat in nam lopi tak a hung kipan dawk ui.

²³Amau chun thalpi leh tiengcha a chawi u a; Nunsie tak, zahngaihna himhim neilo ahiu a. A thawm u chuh tuipi gi hum hum tawbang ahi a; Sakawl chung haw ah a chuu a. Mitin chuh galdo ding banga kithuom in, Aw Zion chanu, nang hun do ding ahiu ui.”

²⁴“A thuthang uh ka za a, ka khut uh a zawi zo tai. Numei nauhanat bang in; lungkhamna’n ei man tai.

²⁵Lo lam ah chiehdawk kiu unla, lamlien ale vakviel diek kiu in. Zie chun melmate chemzâm a um ngâla; ning tin ah lauhthawngna a um hi.”

²⁶“Aw ka mi, ka chanu saidippuon cheng inla, vut lak ah kibuol in. Chapa changkhat sun bangin sun inla, kap buoh buoh in. Thakhat in sugampa chuh na chung ah hung tung ding a hi ngâla.

²⁷Ka mite lak ah phawchien ding leh entup dingin ka hun kawih a, a umdan uh na het a na phawtchet theih na dingin.

²⁸Abawn un gen hak leh luhlul ahiu a, gensiet chîng vak viel viel; sumeng leh thik tawbang ahiu a, susietu ngen ahiu hi.

²⁹Pum in a zap âm hut hut a, mei lak achun ngên chuh a tuimang a, Sukthientho na chuh a thawn in a chieh a. Nunsiet na chuh paih dawk ahi diek puoi.

³⁰Amau haw chuh, ‘dangkaguo êksie,’ ti’n au, LALPA’n amau chuh a deih tâk loh ziekin.”