Read Gangte JEREMIA 8 Bible Online

JEREMIA 8 - Gangte bible

JEREMIA 8

¹“Zie tieng chuleh! tih hi LALPA kamsuok ahi; Juda lengte guh haw leh leng chate guhhaw, thiempute guh leh thiemgaute guh haw leh Jerusalem a cheng te guh haw chuh thân apat in hun ladawk untin,

²Nisa leh thapi leh van a lopina haw chengcheng hehpih a, a na a sep u a, a delh u leh a hawl u a chibai a bûk sekteu masang achun thehzak un tin, lâkkhâwm hita puou untin, vuih le hi diek puo’n au; leichung a êk khuk ding chauh hung hi’nau.

³Chun, zie inkuon gilo tak apat a suokcha sunte, ka nawhdawk na muna um chengte chun hin sangin thih tel zaw’n au tih hi LALPA kamsuok ahi.”

⁴Zielo chule, a kawm u ah hiti a hi na gen ding ahi, LALPA’n hiti hin a tii: “Mi a kipuk leh thokit lo ding ahim? A gamman u leh hung vaikit lo ding ahiu em?”

⁵“Bang zieka zie mipite hi kumlekhuo a nungchawn dinga kipuk den ahi tau hi? Thepna a tuchak kêi u a, vaihkit a nuom puou hi,

⁶Bil dawh in ka ngaitha a, kuoma’n thudik a gen ta puou a; kuoma’n bang ahim ka na hih, ti’n a gitlohnau a kisik diek puou hi. Mitin amau lampi chiet ah a chieh u a, kidona muna sakawl kikhawh viel puotpuot guol in.

⁷Ahi, tuivakang in amah hunbi a kihet a, vakhu leh pielpate, tuivate chuh a hun tak in a hung tung sek u a; ka mite’n vang LALPA thuguot chuh a he puou hi.

⁸Bang zieka, ‘Miching ka hiu hi, LALPA dân chuh ka kawm u ah a um hi,’ na tih u a? Ngaitiem u, lehkhazikte kawlawm zuou thei chun lepchieh a suoh sak zawk uh ahi.

⁹Miching te chuh zakcha leh lungkie’n a um a, mat in um untin ngaitiem u, ka thu chuh a paih thak ziekun. A mau achun bang chitna a um em?

¹⁰Zieziekchun, a ziteu chuh midang kawmah pie’ng ka ting, a lo hawu chule a hun luoh zo dingte khuta pie ding ka hi. A lienpen apat a a neupen tiengin mitin chuh awhchâk na’n a dim u a, thiemgaute leh thiempute tieng in mitin in lepchieh in na a sem ui.

¹¹Ka chanu ka mite liemna chuh ngaihsam takin, ‘Muonna, Muonna,’ ti’n a sudam u a, muonna a um hiel puoh ngâla.

¹²Thil kihdak-um a bawl u hi a zakchau hi? Zakchalo, a zakcha hiel puou, a mai u le a muol chuom puoi. Zieziekchun, a pukte chu tawh pukkhawm untin amau haw ka vehthak ni leh paih thak hi’n au, tih hi LALPA kamsuok ahi.

¹³“Chun, amau haw sumangthai vek ing ka ting, grep guite chuh gah puo’n tin, theipi te’n le gahsuoh puou in tin, a nah haw le vuoi intin a kawm u a thil ka piek haw chuh amau apat in mangthai ina, tih hi LALPA kamsuok ahi.

¹⁴“Bang zieka chu hiet hiet I hiu hi? Hung kikhawm unla kulh nei khawpi haw achun lut hitiu; tichun, zie chun mangthai khawm vek hitiu LALPA chunga I gitloh tâk ziekun, LALPA I Pathien un thihna gu ei dâwn sak in, thihna ah ei kawih tai.

¹⁵Muonna I hawl u a, mahleh thilpha bang mah a hung tung puoi, ngaitie sukdam na hun ding le lungkhamna mai ahi.

¹⁶Dan apat in a sakawlteu hat git chuh a kiza pha a, a sakawlteu hâm git chun gamsung chuh a sulîng a, a hung tûng u a, a sung a um chengte chuh a ne zo vek tau hi; khawpi leh a sunga cheng haw tawh.”

¹⁷“Ngaitiem u, na lak u ah gulsie hun sawl ing ka ting, gûl gu nei, vakzuol theih loh haw chuh; ziehaw chun hun chu ding ahiu hi, tih hi LALPA kamsuok ahi.”

¹⁸Aw ka lungkhamna hi kithamuon thei leng chuh aw! Sunggil lam ah hin ka lunggil a chau zo tai.

¹⁹Gamsung dung leh vaia ka chanu ka mite kah thawm chuh ngaitiem u! Zion achun LALPA a um puoh ahim? A sunga chun a Leng umlo ahim? Bang zieka a milim siem kawm teu leh a gamdang pathien teu a ei sulungna ahiu em?

²⁰Buh ât phat a kikhel ta a, Nipi a kichai ta a; eihaw la Hukdam I hi nai diek puou hi.

²¹Ka mite chanu liemna achun ka na a, ka sun a, lungkham na’n ei man tai.

²²Gilead achun thingnai damdawi umlo ahim? Zie tak achun hihdampa umlo ahim? Bang zieka ka mi, ka chanu chuh sukdam hilo ahim?