Read Gangte SUNNA LA 1 Bible Online

SUNNA LA 1 - Gangte bible

SUNNA LA 1

¹Bangti dana mipi a dim sek Jerusalem kha, tu a lunghel a um ahi tam! Namte laka chawihsâna um sek kha, bangti dana meithai bang pheta um ahi ta? gambung laka a lienpen kha bangti dana sieh pie ahi ta’m?

²Zan khawvak in a kap a; a mitthi teu chu a bieng u ah luong tha a. A guolphate cheng lak achun, amah thamuon ding himhim a um ta puou. A guolte chengin a thep bawl tau a, tichun, a melma a suok zo tau hi.

³Juda chu gimtheihna ziekin suok in a chieh zo ta a, namte lak ah a chênga, chawldamna a mu ta puoi. Ka gam ahi tih ding himhim um lo in gam dangah a cheng tau a, Suohchakna ding umlo khawp in melmate’n a ûmkimvel tau a.

⁴Zion zawtna lampi chu a ngui zo ta a, Kut lopitak haw achun kuomah a hung ta puou hi. Nungak thiengthote chun a thuok tau a, thiempute chu a beidawng u a. Kulh kawtkhakte chu a sie zo ta a, Zion chu lungkham in a um tai.

⁵A melmateu chun a huol kimvel tau a, vai a hawm khum tau hi. A gitlohnau haw ziekin LALPA’n a thuok sak ta a; A chateu chu mata um in melmate chun a puimang tau hi.

⁶Zion chanu melhawih na chengcheng chu a beizo ta a. A milienteu chu sazuk chal tatna mun neilo bang mai in a um tau hi. Melmate masanga taihna dingin tha leh zung himhim a nei ta puou.

⁷Zie banga thawmhau taka a um lai chun, Jerusalem chun a malai lopinate kha a hedawk sek a; Melmate khuta a puksiet lai in kuomah amah panpih ding himhim a um puou. A melma teu chun a puksietna chu a nuihsan tau a.

⁸Jerusalem chu nasa takin a gilo ta a, zieziekchun, sukmang in a um tai. A sangawnna a muh tâk ziekun amah limbawl cheng khan a musit tau a, a lungkham a, a mai a sel tai.

⁹A kihdak-umna chu a puonmawng ah a bek a; himahleh a tawpna ding chu a ngaihtuoh puoi. Nasa takin a puksie ta a; thamuontu ding himhim a nei puoi. A melmate’n a zo tau a, zahngaihna ngenin LALPA, ngaitie, ka melma ten ei sukgimtheih zieu hi.

¹⁰A melmate chun a go neih cheng chu a lâksak tau a; LALPA’n na mi pungkhawmte laka a lut loh dinguh ahi, ti a thu ana piek te achu a lut tâk ziekun.

¹¹A mipite chengcheng chu a beidawng u a, chângthâk a hawl u a; A hin theihna dingun a go neihteu cheng chu nek ding thenna’n a mang u a; Mipite chun, “LALPA en in, ka gimtheih danteu hi” ti’n a kiko u a.

¹²Ziehi nang u dingin bangmahlo ahim, nang haw chieh suk chieh to te haw, ding unla, entiem u, LALPA’n a lungnat ni a ei sukgimtheih dân hi, Zie bang lungkhamna ka thuok u hi, a thuok kha a um die aw?

¹³Chunglam apat in mei a hun sawl a; ka guh sung a ka hut hut a; zie chun ei zo ta a. Ka kenga dingin lên a zak a, tuol ah ei luoi chu ta a. Lungvai leh ni tum a chau in ei kawih ta a

¹⁴Ka sukkhelh nate chengcheng a melchik a: a bawnin a kankhawm ta a. Ka ngâwng ah a hun bât a, tichun ka chautha ta a. ka do zawh loh ding melmate khut achun. LALPA’n ei pie ta a.

¹⁵LALPA’n ka mihatteu chu bangmahlo a chansak ta a; Ka tangvalteu sumangthai dingin khawppi pawimawh a sama. uain thawkna bang mai in LALPA’n Juda chanute chu a tawh den a.

¹⁶Ziehaw ziek chun ka kap a, ka mit chu mitthi tui in achup ta a; Ka hinna suhalh ding thamuontu kei apat a gamla ta a. Melmate’n ei zawh tâk ziekun ka chate chu amau maia nutsieh in a um tau hi.

¹⁷Zion in a khutte a zaka, amau thamuon ding kuomah a um puou hi. Jakob chungchâng achun a melmateu in ûmkimvel un au, ti’n LALPA’n thu a pie a, Jerusalem chu a lak u ah numei thienglo bang mai ahi.

¹⁸Himahleh LALPA chu a dik a, ken la a thu ka zawp puoh ngâl a; Mipite haw ngaithau inla, ka lungkhamna hi en un. Ka tangvalteu leh ka nungak thiengtho hawu chu sala puih in a um tau hi.

¹⁹Ka ngaihnatte chu ka sama, himahleh amau haw chun ei thêm tau hi; Thiempute leh upate chu khawpi sung ah a thi zo tau a, A hinna ding u a nek ding a hawl lai ngêi u chun.

²⁰Aw LALPA, ka lungthim lungkham zie mai hi; Ka lunggil a buoi a, nasa takin ka na gilo ta a. Khawlai vela chun kituolthahna a um a; Kawtkhak sunglam nasan ah thihna atung hi.

²¹Ka tauna thawm hi a zau a, Kuomah ei thamuon ding a um puoh ngâl a; ka chunga sietna na hun tun sak hi ka melmate a kipâk ui. Nang hih ahih ziekin a kipâk ui, na ni guot chu hungtung in tin, amau chule kei tawbang hung hin au.

²²A gitlohna chengcheng uh na masangah hungtung henla; Ka gitlohna zieka ka chunga na hih bang hin, amau haw chunga le hihin. Gimthei takin ka tau a, ka lungthim a chautha tai.