Read Gangte SUNNA LA 3 Bible Online

SUNNA LA 3 - Gangte bible

SUNNA LA 3

¹A lungnatna mawlh, a sukgimtheihna thuok chu kei ka hi a;

²Amah chun ei pui a, thim lak ah ei nawhlut a, vak ah hilo in.

³Ni tum in ka sietna dingin khut a lama, kei ei kalh in ni tum in khut a lam takzet hi.

⁴Ka taksa leh ka vun a kek zeng zung a, ka guhte chu a subawng a;

⁵Kei ei kalh in a lama, khâtna leh nauveina’n ei ûmkimvel a.

⁶Malai a thisa te bangin thimnuoi ah ei chen saka.

⁷Thikkhau in ei kan a, tichun pawtdawk kinepna neilo hiela suongkul a khum ka hi ta a.

⁸Ka kap a, ka kiko lele amah chun ka pauchamna ei dâwng puoi.

⁹Ka vakvielna chengah ka kisui a, ka chieh vielna chengah suong bang in ei nang kimvel ta a.

¹⁰Savawm in mi chan gûk bangin ei chânggu a, sakeibaknei guolin ka chungah a chu ta a.

¹¹Ka lampi a heikawi a, ei luoi tel a, ei mal gawp ta a.

¹²A thalpo a luoi a; a thil kap ding guolin in ei hawl a.

¹³A thalbawm a thalchang haw chu ka thigui ah a kaplut a.

¹⁴Ka mite dinga nuihzatbuk ka hung hi ta a, ni tum in ei nuihsan u a.

¹⁵Thil tui kha ka gawl ah a sung lut a; gamsai ei dâwn kham sak u a.

¹⁶Suong in ka ha ei sukbal sak a, vut ei khuk sak ta a.

¹⁷Nangin ka hinna hi muonna apat gamla tak ah na kawih a.

¹⁸Tichun, “LALPA a ka kinepna leh ka hatna cheng a bei tai” ka ti a.

¹⁹Ka thuokgimna leh thil kha ka dâwn haw hetdawk kit chuh, keia dingin gu tawbang ahi.

²⁰Ka lungthim in ziehaw chu ka ngaihtuoh zing a; ka lungthim a suchau hi.

²¹Ziehaw hi ka lungthim in a hun hedawk ta a, zieziekchun kinepna ka nei tai:

²²LALPA lungsietna zieka sukmangthai a umlo I hiu hi; a zahngaihna chu a bei ngei puoh a.

²³Zing tin in a thak zel ui, na ginum zie chu a lopi hi.

²⁴LALPA chu ka chanvo ahi, ka hinna’n a ti a; tichun kinepna amah achun kinem ing ka.

²⁵LALPA chu amah ngakte dingin a pha a; thagau amah hawlte dingin tawh.

²⁶Zieziekchun, eihaw a dingin thuok hattak a LALPA ngak a, I hukdamna dingu a ngak chu aphai.

²⁷Mi a naupan laia namkawl puoksak chu amah a dingin a phai.

²⁸Amah chauh in a chu a, thipkêi in a um a, amah chu thunun a um ahih ziekin.

²⁹Kingainiem in bawkkhup leuhing, kinepna a um nalai mawh die!

³⁰A bieng chu amah bêngte kawmah a dawh a, gensiet na’n a dim hi,

³¹LALPA chun kumlekhuo a ei paih tha ding ahi puoh ngâl a.

³²Ei sulungkham mah leh, a lungsietna hauh dungzui in ei lungsiet nalai ding ahi.

³³Amah chun a ut mâwnga a sukgimtheih ahi puoh a, Mihing chate a suklungkham ahi puoi.

³⁴Lei chunga suongkul tângte chengcheng chu A kengnuoi a tawh gawp ding leh.

³⁵Chungnung pên Pa masanga mihing thuneihna heimang dingin,

³⁶LALPA’n lem a sakpih loh a chungthu a mihing lehhei dingin.

³⁷LALPA’n thu a piek loh a thugen a, hung guitung chu kuo ahi?

³⁸Chungnung pên pa kam apat a sie leh a pha pawtdawk hilo ahim?

³⁹Mihingte hi eimau gitlohna zieka gawt a I um tieng u leh bang zieka phunchiek sek I hiu em?

⁴⁰I lampiteu chu enchien thak kit hiting un, LALPA lam ah vaikit hitiu.

⁴¹I khutteu leh I lungthimteu chu Van Pathien lam ah dawmsang hitiu.

⁴²I na sukhiel tau a, I kiphin u a; tichun aw LALPA, nangin nei ngaidam ta puoi.

⁴³Lungnat na’n na kikhuh a, kei uh nei sawi ta a, zahngaihna tello hielin nei that a.

⁴⁴Meipi’n na kituom khum a, ka pauchamnau chu a chieh pai theih loh na dingin.

⁴⁵Mite lak ah thil phalo leh thil nin paih khawm bangin nei um sak ta a.

⁴⁶Ka melmateu chengcheng chun musit takin ei nuihsan u a.

⁴⁷Lauh-umna leh thâng in ei dal u a; sietna leh manthaina ah ka um tau hi.

⁴⁸Ka mite chanu sukgimtheih a a um ziek u chun ka mitthi hi luipi tui bangin a luong dawk a.

⁴⁹Ka mit chu hailo in mitthitui in a chup a a hai thei ngei puoi.

⁵⁰LALPA’n van apat a ei hun et suk a ei muh masang chengin.

⁵¹Khawpi a numeite chunga thil tungte ka muh in, ka lungthim a sulungkham mah mah hi.

⁵²A ziek beiin gâlte’n gimthei takin vacha bangin ei delh u a.

⁵³Hingsan in kawkhuk ah ei khiethau a; suong ei sit khum tau a.

⁵⁴Tui chu ka lu chung ah a luong a, a thi ding ka hi tam ka ti hiel a.

⁵⁵Aw LALPA, Suongkul sungnung pên apat chun na min ka hun sama.

⁵⁶Ka hun sapna aw chu nangin na za ta a, ka hatna ah, ka hun sapna ah na bil sel ki’n.

⁵⁷Ka hun sap ni’n nangin nei dâwng a; “Lau ki’n” nei ti a.

⁵⁸Aw LALPA, ka hinna chungchâng thu na ngaihtuoh a, nangin ka hinna hi na hukdawk ta a.

⁵⁹Aw LALPA, ka diklohna te hi na mu ta a, ka chungthu vai nei hawm sak in.

⁶⁰Ka chunga a phuba lak hawu cheng leh thil phalo a hih guotteu na he a.

⁶¹Aw LALPA, ei gensietnau leh, ka chunga thil phalo a hih guot cheng u chuh na he suok a.

⁶²Ni changtum in ka chungchâng thu a gen u a, ei sawisak ding dân a ngaihtuoh u a.

⁶³A chut u leh a din uh enzui in, amau dingin la ka hita hi.

⁶⁴A thilhih teu ziek chun, Aw LALPA, gawt tei in.

⁶⁵Amau chu lunggil lungkhamna pie’n la, chung uh ah na hansie tung hen.

⁶⁶Vannuoi ah amau chu lungna’n delh zui pek inla, leia pat hin sumangthai vek in.