Read Gangte SUNNA LA 5 Bible Online

SUNNA LA 5 - Gangte bible

SUNNA LA 5

¹Aw LALPA, ka chung u a thil tungte hi hezing inla; Ei hun en inla, ka zahchaknau hi mu’n.

²Ka neihlelam teu chu gamdang mite khut achun a um zo ta a; Gamdang mite chu ka In hawu achun a cheng tau hi.

³Nauchagah, pa bei ka hi tau a, ka nuteu chu meithai a suok zo tau hi.

⁴Tui dâwn dingte chu aman ka piek uh a ngai ta a; ka thing uh ka kawm u a zawk in a um tai.

⁵Namkawl puok sak in ka um u a, ka chau u a, chawlhngak himhim ka nei puou hi.

⁶Ka hin zawm theihna ding un. Aigupta leh Suria te kawmah khutdawh in ka vak tau hi.

⁷Ka pileputeu chu a na gilo tau a, himahleh tuhin a um zo ta puou a; A gitloh manteu chu kei un ka puo tau hi.

⁸Suokte chun ka chung u ah vai a hawm tau a; kuoma’n a khut apat in ei hukdawk thei ta puou hi.

⁹Hinna chan lauh-um khawp in an ka ne sek u a: Thaleka chemzâm lauh thawng ziekin.

¹⁰Kiel huoisiet bêk ziekin, ka vunteu chu thukkhuk bangin a vawm zo ta a.

¹¹Zion numeite a pawngsuol u a; Juda khawpite a nungak thiengte le!

¹²Milienteu chu a man u a, tichun a khailum u a: Upa haw chu a zahchâk diek puou hi.

¹³Ka tangvalteu chu suongsumhei hêk dingin nawh in a um u a; Pasal naupangte chu thing lawm nuoi achun a lawn duoi duoi u a.

¹⁴Khawpi kawtkhak achun upate a chu ta puou a; Tangvalte’n le a lasak uh a haihsan tau hi.

¹⁵Ka kipahnateu a dai zo ta a; ka lâmnau chu lungkham na’n a chup mang tai.

¹⁶Ka luchang u apat lallukhuk a kie ta a; ka na gilo tau a ka chunguh a gik tai.

¹⁷Zieziek hin ka lunggil sung uh a chau a, ka mitthi tui ziekun khuo ka mu thei ta puou hi.

¹⁸Zion tâng chu thawmhau taka nutsieh a hih tâk ziekin, si-âlte chu a chungah a vakviel viel tau hi.

¹⁹Himahleh aw LALPA, nang chun kumlekhuo a vaihawm in; Na lalchutphah chun khang chengcheng a daih hi.

²⁰Bang zieka kumkhuo a ei hengilh a, Tuhun sung cheng hi bang zieka nei hetngilh ahi?

²¹Aw LALPA nang lam ei ngat sak inla, khutichun siemthak in um ing ka. malai bangin ka niteu ei siemthak sak kit in.

²²A hih leh, nangin ei paih tha den ding na him? na lungnat hin tawptik neilo ding ahim?