Read Gangte EZEKIEL 1 Bible Online

EZEKIEL 1 - Gangte bible

EZEKIEL 1

¹Kum sawmthum na tha lina, ni ngana ni chun hiti hi a hung hi a, Kebar lui panga saltâng haw laka ka um lai chun van a hung kihawng a, Pathien kilâkna haw ka mu ta a.

²Zie tha ni ngana ni, leng Jehoiakin saltan nung kum ngana kum chuh ahi.

³Babulon gama Kebar lui pang achun Buzi chapa, thiem pu Ezekiel kawm achun LALPA thu chientakin a hung tung ta a, zie chun LALPA khut chuh ka chungah a um a.

⁴Khutichun, ka vak et leh, ngaitie, mâllam apat in huihpi nasatak hung kipan ka mu a. Meipi nasatak apat hin kâwl a hung phe zawl zawl a, a kimvel chuh a vak pempum mai a. A sunga meikuong lailung lai tak chuh thik âm velvul tawbang ahi a.

⁵Chun, zie lak a kipat chun thilhing li tawbang a hung pawtdawk a, zie chuh a mel latdan ahi a, mihing tawh kibatna a nei u a.

⁶Chun, mai li a nei chiet u a, chun, tha li le a nei chiet ui.

⁷A keng teu chuh a thuon zang u a, a kengtawu chuh bâwngno tin tawbang ahi a, sumeng kinawt val guolin a te zawl zawl mai u a.

⁸Mai li leh tha li tihloh chun, a sik u achun mihing khut tawbang li a nei chiet u a, a tha nuoi chiet u ah a um u a.

⁹Thilhing haw chun a tha nih chiet uh a zak palh u a, a tha mawng uh a kisutuoh pha chieta kigamlat dân kibang chietin ning li nei in a ding u a, a kichawn viel tieng u leh a taksau kihei se lo in a malam chiet u a chieh ahi zieng ui.

¹⁰Thilhing lite chun mai li a nei chiet u a; malam ah mihing mel a puu a, changlam ah sakeibaknei mel, veilam ah bâwngchal mel, chun, nung lam ah mupi mel a puu hi.

¹¹Chun, a tha nih chiet uh chuh a mawng kisutuoh pha chietin, a zak palh u a, a dang haw chun a taksau a khuh u a.

¹²A masang lam uh nga chiet ahiu a, kihei se lo in thagau in a tihna lam phawt ah zang takin a chieh khawm thei ui.

¹³Thilhing lite lak achun bang vak ahim, meisel kuong hawih tak tawbang hi a um a, bangtik lai in le a tawi zinga. Mei chuh a kuong vak pempum a, kawlphe guolin a vak zawt zawt a.

¹⁴Thilhingte chuh kawlphe vak zawt zawt bang mai in a taiviel zawlzawl u a.

¹⁵Chun, thilhing lite chuh ka et zing lai chun, ngaitie, kangtalai keng li thilhing lite zawn chieta chu um, leia kinga le ka mu a.

¹⁶Kangtalai keng lite chuh kibang chiet ahiu a, suongmantam guolin a vak chiet u a, kangtalai keng khat sunga kangtalai keng dang um tawbang ahiu.

¹⁷A chieh tieng u leh a ning lite chun a chieh u a, kihei se lo in khawilam a le a kichawn viel thei u a.

¹⁸Kangtalai keng kuol geikawm chuh kikuol pempum zieng, tizat-um tak ahiu a, mita dim ahi.

¹⁹Chun, thilhingte chuh a chieh chawn cheng u leh kangtalai kênghaw chun le a zui zel u a.

²⁰Thilhingte chuh thagau tihna lam lam ah a chieh u a, kangtalai kênghaw chun le thilhingte hih dân dân chun a hih zel u a, thilhingte thagau chuh kangtalai keng haw achun a um ngâl u a.

²¹Khutichun, thilhingte a chieh tieng uh ahim, a din tieng uh ahim, lei apat a dawpkanga a um tieng u leh kangtalai keng haw chule khutichun a um sek ui, thilhingte thagau chuh kangtalai keng haw achun a um ngâl a.

²²Chun, thilhingte lu chung chuh thil bang ahim, krustal suong te sel sel chi a siem tawbang hin a khuh khum khepkhup mai a.

²³Zie a khuh khum khepkhup nuoi achun thilhingte chuh a ding u a; a tha mawng uh kisutuoh pha chietin a thau nih chiet a zak palh u a, a tha nih dang hawu chun a taksau a khuh u a.

²⁴Chun, a lên lai u a a tha zap git u chuh ka za a, tuisuohgiet kinawk gi tawbang leh sepaih hawn thawm gi mul mul tawbang leh Sepaihte LALPA Pathien aw tawbang ahi. A lên loh tieng u leh a thateu chuh a khup zel u a.

²⁵A thateu khupa a lên loh tieng u leh a chunglam u a hun khuh khum khepkhup apat chun thil gi hum hum a hung pawt a.

²⁶Chun, a lu chung u hun khuh khum khepkhup chunglam achun lalchutphah tawbang, sapphire suong tawbanga kilang hi a um a: chun, lalchutphah tawbang chung achun mihing tawbanga kilang hi a um a.

²⁷Chun, a kâwng apat chunglam cheng chuh sumeng te sulsul tawbang in ka mu a, a kâwng hileh kilawm apat nuoi lam cheng chuh mei tawbang mai hin ka mu a, a kimvel chuh a vak pempum mai a.

²⁸Guoh zuk ni a mei chunga sakhizozum kilat dân tawbang hi a kimvela vak kilat dân chuh ahi Ziehi LALPA lopina kibatpih kilat dân chuh ahi. Chun, zie chuh ka muh in khupbawk in ka puk a, thugenpa aw ka za a.