Read Gangte EZEKIEL 10 Bible Online

EZEKIEL 10 - Gangte bible

EZEKIEL 10

¹Khutichun, ka vak et leh, ngaitie, Cherub te lu chung van dum a khun sapphire suong hileh kilawm tak, lalchutphah tawbanga kilang hi a hung lang a.

²Chun, amah chun patngatpuon silh pa kawm achun. Cherub nuoia kangtalai keng haw lak a khun va lut inla, Cherub te laka mei-âm khu na khutte nih dim in va ham inla, khawpi chungah thehzak in, a ti a. Chun, ka et zing lai ngêi chun a chieh ta a.

³Chun, mipa chuh a lut lai khan Cherub te chuh Ho-In simlam panga ding ahiu a chun, huongsung sungnung zaw chuh mei in a dim ta a.

⁴Ziephet chun, LALPA lopina chuh Cherub te apat chun a chieh to a, Ho-In lutna chung a chun a va ding ta a, chun, In chuh mei in a dim ta a, chun, LALPA lopina vak chun huongsung chuh a dim ta a.

⁵Chun, Bangkim hihthei Pathien a pau tienga a aw guolin, Cherub te tha zap git chuh huongsung pamnung zaw a chun le a kihe a.

⁶Chun, hiti hi ahi a, LALPA’n patngatpuon a kivan pa chuh, “Cherub te laka kangtalai keng haw lak apat mei va la’n,” ti a thu a piek phet chun, amah chuh a va luta, kangtalai keng haw kawm achun a va ding ta a.

⁷Chun, Cherub te lak apat chun Cherub chun Cherub te laka mei um chuh a vak bana, neukhat a la a, patngatpuon silh pa chuh a pie ta a, amah chun ana la a, a chiehdawk ta a.

⁸Chun, a tha nuoi u a mihing khut hileh kilawm tak nei in Cherub te chuh a kilang u a.

⁹Chun, ka vak et leh, ngaitie, Cherub te sik achun kangtalai keng li, Cherub khat kawma kangtalai keng khat um, Cherub dang kawma kangtalai keng dang um hi ka mu a; kangtalai keng haw chuh Tarshis suong guolin a kilang u a.

¹⁰Chun, a kilat dân u chun a liu chun akibang u a, kangtalai keng khata kangtalai keng dang, alai a zang taka kituoh tawbang ahi.

¹¹A chieh tieng u leh sik li’n a chieh thei u a, a chieh uh lele a kihei uh a ngai puoi; ahi’n, a chiehna ding lam u nga pên chuh a zui zieng u a, a chieh tieng u leh a kihei se puou hi.

¹²Chun, a taksa pumpiu chuh a nungzang u leh, a khut u leh, thau leh kangtalai keng haw chule a pumpi a mita dim ahiu a, a liu a a kangtalai keng hawu kha le.

¹³Kangtalai keng haw kha chuh ka hetna ngêi ah, “Kangtalai Keng Kipei,” tih ahiu hi.

¹⁴Chun, Cherub cheng chun mel li a nei chiet u a: mel khatna chuh Cherub mel ahi a, mel nihna chuh mihing mel ahi a, mel thumna chuh sakeibaknei mel ahi, chun, mel lina chuh mupi mel ahi.

¹⁵Chun, Cherub te chuh a leng to tau a. Ziehaw hi Kebar lui panga thilhing ka muh haw kha ahiu hi.

¹⁶Cherub te chuh a chieh tieng u leh a kieng u a kangtalai keng haw chule a chieh u a; chun, leituol apat leng to dinga Cherub te chun a thau a zap tieng u leh kangtalai keng haw chun a nusieh kha puou hi.

¹⁷Cherub te chuh a din hiet hiet u leh ziehaw hi le a ding hiet hiet u a, a lên toh tieng u leh ziehaw hile a leng to zel u a, thilhing haw thagau chuh amau a a um ziekin.

¹⁸Ziephet chun LALPA lopina chuh Ho-In lutna chung apat chun a pawt a, Cherub te chung achun a ding ta a.

¹⁹Chun, Cherub te chun a thau a zak u a, ka muhna ngêi ah leituol apat in a leng to tau a; a chieh phet u chun kangtalai keng haw chun le a zui zel u a; chun, LALPA In lutna suohlam panga kawtbul achun a ding tau, chun, Israel Pathien lopina chuh a chung u ah a um a.

²⁰Ziehaw hi Kebar lui panga Israel Pathien nuoia thilhing ka muh haw chuh ahiu a, Cherub te ahiu ui tih ka he ta a.

²¹A bawn un mei chuom li leh tha li a nei chiet u a, a thanuoi u achun mihing khut tawbang a um a.

²²Chun, a mei u chuh Kebar lui panga ka muh haw mel kha tawbang ahi, a kilat dân u leh a guong u le; a malam u a zang taka chieh zieng chiet ahiu ui.