Read Gangte EZEKIEL 11 Bible Online

EZEKIEL 11 - Gangte bible

EZEKIEL 11

¹Chun, Thagau in ei dawm kang a, LALPA In suohlam kawtpi achun ei pui a, zie chun suohlam a nga a; chun, ngaitie, zie taka kelkawt kawtbul achun mi sawmnih leh nga a um u a; a lak u achun Azur chapa Jaazaniah leh Benaiah chapa Pelatia, mipi hotute chuh ka mu a.

²Chun, amah chun ka kawmah, “Mihing chapa ziete hi zie khawpi sunga gitloh na hun puodawk te chuh ahiu hi;

³‘In sak hun ahi nai puoh ie, zie khawpi hi sa so bel ahi a, ei u hi a sa chuh I hiu hi,’ tite chuh.

⁴Zieziekchun, a sietna ding thuu genlawk inla, Aw mihing chapa genlawk in” a ti a.

⁵Chun, LALPA Thagau chuh ka chungah a hung tunga, ka kawmah, Gen in, LALPA chun hiti hin a tii: “Aw Israel insung mite haw, khutichun na ti sek ui; na lungthim u a thil hung lut haw chuh ka he suok kêi ngâla.

⁶Zie khawpi ahin na mithah hawu chuh na supung deuh deuh u a, na mithah hawu chun a kawtthêl haw chuh na sudim tau a.

⁷“Zieziekchun, LALPA Pathien chun hiti hin a tii: ‘Khawpi a na mithahteu chuh a sa chuh ahiu a, chun, zie khawpi hi sa so bel chuh ahi; ahihziekin, a lai apat chuh hun nawhdawk ding ka hi.

⁸Chemzâm chuh na lau a, na chung u a chemzâm hun tun ding ka hi, LALPA Pathien chun a tii.

⁹Khawpi lai apat chun hun nawhdawk ing ka ting, nam dangte khuta hun pie ding ka hi; amau chun na chung u ah vaihawm in au.

¹⁰Chemzâm in thi’n na tin un, Israel gamgi lam achun na chung u ah vaihawm ing ka; khutichun, kei hi LALPA chuh ka hi tih hun he ta’n lau.

¹¹Zie khawpi hi na sa so bel uh hi puo’n tin, nang u le a sunga sa chuh hi diek puo’n lau; ka dân siem chuh na hawh puou a,

¹²Ka thutanna haw le na zui diek puou; na kimvel u a Jentel te hihdan chun thil na hih zaw ngâl u a,’ a tii,” ti’n.

¹³Chun, hiti hi ahi a, thu ka genlawk zing lai chun Benaiah chapa Pelatia chapa chuh a na thi ta mai a. Khutichun, ka maia leituol si’n ka bawkkhup a, aw ngeih tak in ka kiko a, “Aw LALPA Pathien; Israel umsunte chimit na ding siem ding na him?” ka ti a.

¹⁴Chun, LALPA thu chuh ka kawmah a hung tunga,

¹⁵“Mihing chapa, na inkawte, na bawn un, Jerusalem a a na cheng te’n, ‘Saltâng te chuh LALPA ho dingin a gamla taluou a; zie gam hi I luoh ding u a piek ahi tai,’ a tih hawu kha ahiu a.

¹⁶“Zieziekchun LALPA Pathien chun hiti hin a tii: Gamla taka Jentel te lak ah chawnmang in; gam haw achun ana thehdalh mahleng, chawmkhat sung a va umna gam u a chun amau dingin ‘Mun Thiengtho’ hi’ng ka, a ti a.

¹⁷Zieziekchun LALPA chun hiti hih a tii: Nam dang haw lak apat chun hun puikit ing ka ting, na kithehzâk nau gam u apat chun hun puikhawm kit ing ka ting, Israel gam chuh hun pie’ng ka.

¹⁸Chun, zie taka chuh a hung tieng u leh, zie taka thil buok leh thil tenum chengcheng chuh amau chun paihmang in au.

¹⁹Chun, amau chuh lungthim khat pie’ng ka ting, chun, a sung u ah lungthim thak kawih ing ka. Chun, amau apat in lungthim suong guola tâk chuh la mang ing ka ting, lungthim nem amau pie’ng ka.

²⁰Tia chuh ka dân siem haw a zuih u a, ka thutanna haw a zuih u a, a hih theih na dingun. Khutichun, amau chuh ka mite hi’n tin un; keile a Pathien uh hing ka.

²¹Himahleh, thil tenum haw leh thil buok haw a lunglut zing haw vang chuh, a gitlohnau mawh chuh a bûk-a-bel in khuk sak ing ka,” LALPA’n a tii.

²²Khutichun, Cherub te chun a thau a zak u a, a kieng u achun kangtalai keng haw chuh a um u a; chun, Israel Pathien lopina chuh a chung u ah a uma.

²³Chun, LALPA lopina chuh khawpi lailung apat chun a chieh to a, khawpi suohlam panga um tâng chung achun a ding ta a.

²⁴Chun thagau chun ei dawm kang a, kilâkna achun Pathien thagau in Kaldai gama saltângte kawm achun ei pui ta a. Ziephet chun, kilâkna ka muh chun ei nusieh ta a.

²⁵Khutichun saltângte kawm achun LALPA’n thil ei muhsak chengcheng chuh ka gen ta a.