Read Gangte EZEKIEL 12 Bible Online

EZEKIEL 12 - Gangte bible

EZEKIEL 12

¹LALPA thu chuh ka kawmah a hung tung kita,

²“Mihing chapa, helchîng inkuon, muh na ding mit nei ngâla mu diek lote, zak na ding bil nei ngâla za diek lote laka cheng na hi; helchîng inkuon himhim ahi ngâl u a.

³Zieziekchun, mihing chapa, saltâng ding guol in na thuomphuo haw siemtup inla, sun lai in a muh na ngêi u ah chiehdawk in. A muh na tak u a, na umna mun apat mun danga saltâng guol a na chieh ding ahi: helchîng inkuon himahleu le a kingaihtuoh lawh mawh dingu.

⁴Chun, na thuomphuo chuh sun lai tak in, a muhna tak u ah, saltânga chieh ding guol in ladawk in na tin; chun, nitâk lam leh a muh na tak u ah saltânga chiehte chiehdan taka na chieh ding ahi.

⁵A muhna tak u ah kulhbang chuh suvang inla, na thuomphuo haw chuh zie hawm achun pawdawk in.

⁶A muhna tak u ah na liengko in pu’n na tin, thimbut leh na chiehdawk pih ding ahi; leituol na muh theih loh na dinga na mai na tuom ding ahi; Israel inkuon te a dingin etsakna a ka hun siem ahi ngâla,” a ti a.

⁷Chun, thupiek ka hih guol chun ka hih ta a; ka thuomphuo haw chuh saltâng ding guol in sun lai in ka ladawk a, ka khut in bang chuh nitâk in ka suvang a, thimbut in ka ladawk a, a muh na tak u ah ka liengko in ka pu a.

⁸Chun, zingkal chun LALPA thu ka kawmah a hung tung a,

⁹“Mihing chapa, Israel inkuon helchîng te chun, ‘Banga na hih?’ a hun ti puou maw?

¹⁰A kawm u achun, ‘LALPA Pathien chun hiti hin a tii: Zie thu hi Jerusalem a ho tu leh, zie tak a chuh um, Israel inkuon pumpi chung thu ding ahi.

¹¹Nang u dingin etsak na ka hi, ka hih tawbang hin a chung u ah hih hi’n a; saltâng dingin puok mang hi’n au,’ ti’n.

¹²Chun, a lak u a um hotu chun thimbut in a thuomphuo haw chuh a liengko in pu’n tin, chiehdawk ina. A puok dawkna dingun bang chuh vit hawm in tin un, a mita leituol chuh a muh theih loh na dingin a mai chuh a khuh ding ahi.

¹³Amah chuh ka lên khuh ing ka ting, ka thâng ah âwk hi’n a; amah chuh Kaldai gam, Babulon achun pui ing ka ting; ahih ziekin ama’n muh chuh mu puo’n a, zie tak a chuh thi ding na hi na a.

¹⁴Amah panpih dinga a kienga um sek haw leh a sepaih haw chengcheng chuh ning tin ah thehzak ing ka ting chun, chemzâm zuk dawksa’n amau chuh delhzui ing ka.

¹⁵Namtin laka ka nawhzak a, gamtin a ka thehzak tieng chuleh LALPA chuh ka hi, tih he tan au.

¹⁶Ahihziekin chemzâm leh kiel leh hipi lak apat chun a laku a mi tawmchah hinghawih ing ka ting, ziete chun Jentel te laka a chieh na lam cheng u ah a tenum na hawu chengcheng chuh a phuon na dingun; chun, kei hi LALPA chuh ka hi tih he’n au,” a ti a.

¹⁷Chun, LALPA thu chuh ka kawmah a hung tung kita,

¹⁸“Mihing chapa, na an chuh kithing tuntun kawmin ne’n la, na tui chuh lungzîng a kithing kawmin dâwn in.

¹⁹Chun, zie gama mite kawm achun, ‘LALPA Pathien chun Jerusalem a cheng te leh Israel gam chungchâng achun hiti hin a tii: A an u chuh lau kawm takin ne’n tin un, a tui u chuh lungzîng takin dâwn intin un, a sunga cheng te kipawngbawlna ziekin a gam u chuh sukgam saka um ding ahi ngâl a.

²⁰Chun, mi chênna khawpi haw chuh sukchim in um intin a gam chuh sukgam in um intin, khutichun, LALPA chuh ka hi tih he’n au,’ ti’n gen in,” a ti a.

²¹Chun, LALPA thu chuh ka kawmah a hung tunga,

²²“Mihing chapa Israel gama zie paunak chawmcha na neih u hi bang tih na ahi? ‘Nite a liem zel u a, kilâkna taphawt a thâwn kit mai sek ui,’ na tih u hi.

²³‘Zieziekchun, LALPA Pathien chun hiti hin a tii: Zie thuching hi suhai ing ka ting, Israel gam ah paunak chawm in mang kha ta puo’n au; ni chuh a nai ta a, kilâkna tin cheng tunkim na ding ni chuh,’ ti’n a kawm u ah gen zaw’n.

²⁴Israel inkuon te lak ah kilâkna diklo leh a phalam lam kawka phunsânna himhim um ta puo’n a.

²⁵LALPA chuh ka hi ngâla, gen ing ka ting, chun ka thugen chuh sukpitin ngâl hi’n tin, sukvaigeih in um puo’n a. Aw helchîng inkawte haw, na damlai ngêi u hin thu gen ing ka ting, supiting ding ka hi ngâl a, tih hi LALPA Pathien gen ahi ngâla,” a ti a.

²⁶LALPA thu chuh ka kawmah a hung tung kita,

²⁷“Mihing chapa, ngaitie, Israel inkuon chun, ‘Kilâkna a muh chuh ni tamtak nunga ding ahi a, chun, a genlawkna haw le tunung gamla taka ding ahi,’ a tiu a.

²⁸Zieziekchun, a kawm u achun, ‘LALPA Pathien chun hiti hin a tii: Ka thu khat chale sukvaigeih hita puo’n tin, ka thugen taphawt chuh hih in um zel zaw’n a, LALPA Pathien chun a tii’, ti’n hilh in,” a ti a.