Read Gangte EZEKIEL 13 Bible Online

EZEKIEL 13 - Gangte bible

EZEKIEL 13

¹Chun, LALPA thu chuh ka kawmah a hung tung kita,

²“Mihing chapa, Israel thiemgaute thu genlawk haw kalh in thu genlawk inla, amah lungthim u apat a thu genlawk haw mai gingchate kawm achun, ‘LALPA thu chuh ngaithau in,’ ti’n gen in,” a ti a.

³LALPA Pathien chun hiti hin a tii: “Thiemgau ngawl, amau ngaihdan zuia bangmah mu sâm lo haw chuh, a chunguh agik ie.

⁴Aw Israel, na thiemgauteu chuh khawpi hawm nung si-âl tawbang phet ahi tau hi.

⁵LALPA ni a galdo a a din detna dingun bâng chipna lai tak achun na va chieh puou a, Israel insung mite dingin bâng chuh na siempha puou hi.

⁶A kilâkna muh hawu chuh adiklo ngên a hiua, a thil genlawk hawu chuh lepchieh ngên ahiu. Amau chuh LALPA’n a sawl hisâm lo in, ‘LALPA’n a tii’ a ti sek u a; a thuu chuh hung guitung dingin mite a ginchak sak u a.

⁷Kilâkna diklo mu leh genlawkna lepchieh gen na hi puou maw? ‘LALPA’n a tii’, na tiu a; ken la bangmah ka gen puoh ngâla.”

⁸Zieziekchun, LALPA Pathien chun hiti hin a tii: Thu diklo na gen u a, kilâkna lepchieh na muh ziekun, ngaitiem u, ka hun lân na hiu hi, LALPA Pathien chun a tii.

⁹Ka khut hin kilâkna diklo mu haw leh genlawkna lepchieh gen haw chuh nang intin, ka mite kikhawp khâwmna ah tel puo’n tin un, Israel inkuonte min zikna ah zikin um hiel puo’n au; khutichun LALPA Pathien chuh ka hi tih hun hen lau.

¹⁰“Muonna a um loh laia, ‘Muon a um ie’, ti a ka mite a puihmang ziekun leh mi In bang siem rawng a nuh vam zieng ziekun,

¹¹Thil nuh vamte kawm achun chim pai zieng ding ahi tih hi gen un. Guohpi hung zu’n tin, gielpi lien tak tak hung kie’n tin, chun, guohpi-huihpi kithuoh in mût chim ina.

¹²Chun, ngaitie, bâng chuh a chip tieng leh mite chun, ‘Na thil nuh vam u chuh khawia um ahi ta?’ hun ti lo ding ahiu em?”

¹³Zieziekchun LALPA Pathien chun hiti hin a tii: “Ka lungnat ziekin huihpi husie tak tak hun nun sak ing ka ting; ka lungnat ziekin a susie dingin guohpi-leh gielpi kithuoh hung zun au.

¹⁴Khutichun thil na nuh vam uh bang chuh suchim ing ka ting, leituol tawh kikim in nuoi guol ing ka ting, khutichun a suongvuih haw chuh dawk hiel ina: chun, chim intin, bâng chim achun sukmangthai in um inlau: zie tieng chuleh LALPA chuh ka hi tih hun hen lau.

¹⁵“Khutia chuh bang chung leh a nuh vamte chunga ka hachangthakna tunsak ding ka hi; chun na kawm u a, ‘Bang chuh a um ta puoh a, a nuh vamte le a um diek ta puou,

¹⁶Ziete chuh Israel thiemgaute, Jerusalem chungthu genlawk a, muonna a um loh laia le Jerusalem dinga muonna kilâkna mu haw kha ahiu ui,’ ti ding ka hi” LALPA Pathien chun a tii.

¹⁷Zie tawbangmah chun mihing chapa, na mite chanu, amau lungthim apat a genlawk zieng te lam chuh nga’n la, amau kal hin genlawk in,

¹⁸LALPA Pathien chun hiti hin a tii: “Mite lungthim a mat theihna ding u a dawithiem thil khuia a khutngawng a buta, dawithiem thil luchang khuhna siema a luchang khuh numei haw chung chuh a gik ie! Na kivakna ding u a ka mite hinna maw na mat ding uh?

¹⁹Buh tawmcha leh chângthâk thêm khat ziekin ka mipite lak achun nei suminsie a, a thi lo ding te that in, a hing lo dingte na hinghawih a, lepchieh gingcha ka mite kawma zuou na gen u a.”

²⁰Zieziekchun LALPA Pathien chun hiti hin a tii: Ngaiun, mi hinna vacha mata mat na guotnau na dawithiem thil buh hawu chuh ka nang ahi. Na khut u apat in luoi tha’ng ka ting, na mi mat dingteu hinna chuh thahdawk vek ing ka, vacha guola na mat dingteu hinna ngêi chuh!

²¹Na mai khuhna hawu chule bawtthêk ing ka ting, ka mite chuh na khut u apat thahdawk ing ka ting, na nek theih dingun na khut u ah um ta puo’n tin un; khutichun LALPA chuh ka hi tih hun hen lau.

²²“Mi diktat te lungthim chuh diklo takin na sulungkham u a, ahi’n, kei suklungkham chuh hilo ahi.Chun, a hinna humbit dinga gitlohna lampi apat a vaihkit lohna dingin migilote chuh na tîlkhoh zaw a.

²³Zieziekchun, kilâkna diklo chuh mu ta puo’n na tin un, genlawkna diklo chuh hih ta puo’n lau; ka mite chuh na khut u apat hukdawk ding ka hi ngâla, khutichun LALPA chuh ka hi tih hun hen lau ti’n gen in” a ti a.