Read Gangte EZEKIEL 14 Bible Online

EZEKIEL 14 - Gangte bible

EZEKIEL 14

¹Khutichun, Israel upa khenkhat chuh ka kawmah a hung u a, ka ma ah a chuu a.

²Chun, LALPA thu chuh ka kawmah a hung tunga,

³“Mihing chapa, ziete haw hin a lungthim u ah milim a la lut u a, a gitlohnau chuh a kisuih pukna ding un a masang u ah a kawih u a; amau chuh ka dâwn ding a gingchau-a ahim?

⁴“Zieziekchun, amau chuh hopih inla, LALPA Pathien chun hiti hin a tii: Israel inkuon a mitin, a lungthim u a milim la luta gitlohna a a pukna ding uh a masang u a kawih a, thiemgau kawma dawt nawp nei a hung taphawt chuh milim a hah ho dân dungzui zel un kei, LALPA, hin dâwng ing ka;

⁵A lungthim uh ka mat kit theihna dingin, amau chun a milim hawu ziekin ei nusieh ta ngâl u a.

⁶“Zieziekchun Israel inkuonte kawm achun, LALPA Pathien chun hiti hin a tii, Kisik unla, na milim hawu chuh nusieh unla, na tenumna chengcheng u chuh kiheimang san un!

⁷“Israel inkuon laka kuole, malzin Israel gama chêngte le, kei apat kikawihchuoma, a lungthim u a milim la luta, a masang u a gitlohna a pukna kawih zing kawma a chungthuu ei dawng dinga thiemgau kawma hung taphawt chuh kei, LALPA, keimah ngêi hin dâwng ing ka.

⁸Ziete chuh kiheimang san ing ka ting, etsakna’n mang ing ka ting, gen mang mawh dingin siem ing ka ting, ka mite lak apat in subei kei ing ka; khutichun kei hi LALPA chuh ka hi tih he’n lau.

⁹“Thiemgau chun dawha bawl zawh a uma genlawkna thu a gen chun, kei, LALPA, hin ka dawha bawl ahi a, a chungah ka khuttha’ng ka ting, ka mi Israel te lak apat in sumangthai ing ka.

¹⁰A thiemloh nau mawh chuh kipuok intin un; thiemgau gawtna chuh thuok intin; amah thudawt va neite gawtna tawh kibang ina;

¹¹Tichun, Israel inkuonte chuh kei apat a a petmang tâk loh uh a, a bawhsietna teu cheng chenga a kisukbuok tâk lohna dingun, ka mite ahih zawk tak u a, a Pathien uh ka hih theihna dingin, LALPA Pathien chun a tii, ti’n gen in,” a ti a.

¹²Chun, LALPA thu chuh ka kawmah a hung tunga,

¹³“Mihing chapa, gam in ginumlo taka um zinga, a hihkhelh chun, a chunga chuh ka khut tha ding ka hi; a an uh, a hinna bul u chuh susie’ng ka ting, a chung u ah kiel tunsak ing ka ting, a sunga mi leh sa haw chuh sumang ding ka hi.

¹⁴Zie mi thum te, Noah leh Daniel leh Job hiel hile a sunga chuh um ana hi leu, a diktatnau in amau chauh kihukdawk in au” LALPA Pathien chun a tii.

¹⁵“A gam u chuh gamsa hâng haw ka chawhleng saka, gam chuh a suksiet u a, gamsa hâng haw zieka chuh kuomah a hawh pai ding um lo khawpa gam chuh thawmhauh-um a a um chun,

¹⁶zie mi thum te hiel hi le a sunga chu um hi leu, a hing ka hih guol mah mah hin LALPA Pathien chun a tii, a chanuteu, a chapateu chuh hukbit diek puou in tin; amau chauh chuh hukdawk in um intin un, gam chuh a hawm in um tho tho ina.

¹⁷“Ahihloh leh, zie gam chunga chuh chemzâm ka leh a, ‘Chemzâm, che tie leh’ ka tih a, zie gama mi leh sa cheng chuh ka thah chun,

¹⁸Zie mi thum te hi um leu le, a hing ka hih guol mah mah hin, LALPA Pathien chun a tii,” a chanuteu leh a chapateu chule hukdawk puou intin un, amau hinna vang chuh hukbit in um in au.

¹⁹“Ahihloh leh, zie gamsung a chuh hipi ka lênsak a, ka lungnatna thisan suohna a a chunga ka butthak a, zie gama mi leh sa cheng chuh ka thah chun,

²⁰Noah leh Daniel leh Job te hiel hi um leu le, a hing ka hih takzet guol hin, LALPA Pathien chun a tii, a chanuteu leh a chapateu chuh hukdawk puou intin; a diktatnau in amau chauh kihukdawk zaw’n au.”

²¹LALPA Pathien chun hiti hin a ti ngâla, “A sunga mite leh gancha haw sumangthai dinga Jerusalem chunga ka gawtna lite, chemzâm leh kiel leh gamsa hâng haw leh hipi ka tun kim sak tieng chuleh bang tawbanga huoisie ahi ta dem?

²²Ahihziekin, ngaitie, puih dawka um ding, a suokcha sun haw chuh, chanute le chapate le, a sunga chun nutsieh in um in au; matheilo in na kawm u ah hung pawt intin un, a umdan u leh a thilhih hawu phatloh zie chuh mun na tin uh, Jerusalem chunga sietna ka tunsak chuh hethiem ta’n lau, ka na tun saksa chengcheng haw le,

²³A umdan u leh a thilhih hawu na muh tieng u leh ki-awi ta’n na tin un; a chunga ka thilhih chengcheng chuh a ziek umlo in bangmah ka hih puoi tih he’n lau,” tih hi LALPA Pathien in a gen hi, ti’n.