Read Gangte EZEKIEL 16 Bible Online

EZEKIEL 16 - Gangte bible

EZEKIEL 16

¹Chun, LALPA thu chuh ka kawmah a hung tung kita,

²“Mihing chapa, Jerusalem chuh a tenumna haw hetdawksak inla, a kawmah,

³LALPA Pathien chun Jerusalem kawma chun hiti hin a tii: “Na pienna leh na mawmna gam chuh Kanaan gam ahi a, na pa chuh Amor mi ahi a, na nu chuh Hit mi ahi.

⁴Chun, na hung pien dân thu achun ahih leh, na pienni chun na laigui âtloh ahi a, sukthien dingin tuia sil na hi diek puoi; chi le nuh na hi puoh a, tuom lum le na hi diek puoi.

⁵Na chunga ziehaw hi hih dingin lainatna mita hun en kuomah a um puo a; pampaih na hi zaw a, na pienni apat khan than ten a ten na hi ngâla.

⁶“Chun, na kienga ka hung leh na thisan laka kisek in ka hun mu a, na kawma chun, na thisan laka na kuol lai chun, ‘Hing in!’ ka hun ti a. Ahi, na thisan laka na um lai chun, ‘Hing in!’ ka hun tii.

⁷Gamlak a hampa guolin ka hun khan let saka, chun, na hung khang lien a, na hung hawih ta a; na nawi a hung bawka, na sam a hung sau a; silh lo cheng lo leh ngawnchang na hi a.

⁸“Chun na kawma ka hunga ka hun et in, deihchak kham na hung hi ta a, ka puon ka hun kikawppih a, ngawnchang a na um chuh ka hun khuh ta a. Ahi, na kawmah ka kihâksiela, thuthun ah ka hun lut pih ta a, chun, keia na hung hi ta a.” LALPA Pathien chun a tii.

⁹“Khutichun, tui in ka hun sil ta a; ahi, na thisan chuh ka hun silthien sak tinten a, thau ka hun nuh ta ahi.

¹⁰Puon zem nei in ka hun tuoma, savun pha chi kengtawbek ka hun buh saka, patngatpuon in ka hun tuoma, sil puon ka hun khuh ta a.

¹¹Kicheina’n ka hun zem a, na khut ah chaucha ka hun buh saka, na ngâwng ah sana khi ka hun awh saka,

¹²Na nak ah nakbuh, na bil ah bilbah, na luchang ah lallukhuk hawihtak haw chun ka hun chei a.

¹³Khutichun sana leh dangkaguo a chei na hi ta a, na silhlechen chuh patngatpuon leh sil puon leh puon zie nei ahi a; na nek chuh changbuong nêl tak leh khuoizu leh thau ahi. Na hung hawih mah mah a, lengnu na tuk hiel ta a.

¹⁴Na hawihna chuh namtin lak ah a kithang suok ta a, ka lopina a thuom a um in na hawihna chuh a bukim ta a” tih hi LALPA Pathien kamsuok ahi.

¹⁵“Himahleh, na hawihna chuh na kimuonpih taluo a, na minthanna chuh na hûk lawh ta a, a vakviel cheng kawmah na kiphal ta a.

¹⁶Na silhlechente’n lo-le-âi bawl mun haw na zem hawih a, zie chun na kizuok a. Zie tawbang hi a um kha nai puoh a, um le um kit ta puo’n a.

¹⁷Sana leh dangkaguo hawih tak tak ka hun piek haw kha na kilak a, pasal lim siemna’n na manga, na kipawlpih ta a.

¹⁸Na kicheina puon khuih hawih haw chuh na la a, ziehaw chuh na khuh a, ka thau leh ka gimlim haw chuh a masang u ah na lui a.

¹⁹Changbuong nêl leh thau leh khuoizu a kisiem ka hun vak sek na haw, ka an ka hun piek khale gimlim dingin a mau ah na lui a; khutichu a na hi tai,” LALPA Pathien chun a tii.

²⁰“Zielo chun le, na chanute na chapate nei hin sak haw chule kithawihna a mat zawh dingin a kawm u ah na pie a. Na hûkna hi thil namai ahi a ahim,

²¹ka chate na thah a, meia kithawihna a mat dinga amau na piek hi thil neucha mai ahim?

²²Na tenumna leh na hûkna chengcheng achun na naupan laia ngawnchang a na uma, na thisan laka na kisek sek lai nite kha na hezing ta puoh a.”

²³Zie na gitlohna haw chengcheng zawh hin le hiti hi a hung hi a, “Agik ie, na chung agik hi!” LALPA Pathien chun a tii.

²⁴Nang dingin munsang haw na kisiem a, kawtthêl tin ah thawihmuol na kisiem nalai a.

²⁵Kawtthêl lutna taphawt ah munsang haw na sa a, na melhawihna chuh tenum in na siem a, a vakviel cheng kawmah na kihawkdawk a, na hûkna thilhih haw chuh na supung a.

²⁶Aigupta mi, na inveng mihûkte chu tawh hûkna thil in na kipawl tau a; ei chawk lungna dingin na hûkna chuh na supung ta a.

²⁷Zieziekchun, ngaitie, na chungah ka khut ka tha a, na gam luoh ka suneu a, na melmate, na hûk dân hun zahchâkpih, Philistia chanute kawm achun a nawp nawp uh a hun lawh dingun ka hun pie tai.

²⁸“Asuria mite kawma le na hûk manga, na khawp theih loh ziekin ahi, a kawm u ah na kiphahkadak a, na khawp diek chuong puoh nalai a.

²⁹Zielo chun le, sumkawlveite gam, Kaldai gam chanin na hûkna chuh na supung a, na khawp diek puoh zing nalai hi.”

³⁰Na lungthim chuh a hah mantheihloh ta na lâwm lâwm e, phuong taka nawhchizuokte thilhih na hih tâk mai hi! LALPA Pathien chun a tii.

³¹Lamtuongpi lutna cheng achun milim hona in na sa a, kawtthêl tin achun thawihmuol na siem a; ahi’n, lawh na delh loh ziek hin nawhchizuok maimai le na hi puoi.

³²Zi zawlsai, a pasal sanga mi dang deih zaw nu!

³³Nawhchizuok kawmah mi’n aman a pie sek u a, ahihziekin nangin amau na pie zaw sek hi, a hun deihte chuh muntin apat na kawmah hung u a, a hun kuolpih theih na dingun nangin na zawl zaw sek hi.

³⁴Chun, na hûk zieka kuoma’n a hun zawt loh u hi mihûk dangte tawh na kibatlohna chuh ahi; nangin aman na pie zaw a, kuoma’n nang a hun piek loh hi na zatchuom na chuh ahi.

³⁵“Zieziekchun, Aw nawhchizuok nu, LALPA thu hi ngaiin!

³⁶LALPA Pathien chun hiti hin a tii: Na tenumna but thak ahih a, na mi ngaihte tawh na kuolkhawmnau a na sangawnna suklat ahih ziek leh na milim tenum haw chengcheng ziek leh a kawma na piek na chate thisan ziekin.

³⁷Ngaiin, nang hun ngaite na kinawpcheppih haw chengcheng leh na na ngaih sa haw chengcheng leh na mi hawt chengcheng chuh ning tin apat sam khawm ing ka ting, na sangawnna chengcheng a muh theihna dingun na sangawnna chuh a masang u a hun hâwkdawk ding ka hi.

³⁸Numei a pasal kichênna thutiem susie a thisan suoh te chunga vaihawm guola na chunga vaihawm ding ka hi; lungnatna leh thîkna chuh na chunga tunsak ding ka hi.

³⁹Na ngaihzawngte khut ah hun pie’ng ka ting, na munsang haw chuh supai intin un, na thawihmuol haw chuh suchim in au; na puonte hun hâwk sak intin un, na kicheina sana haw chuh kilak intin un, sangawn leh ngawnchang in hun nusieh in au.

⁴⁰Na chungah mipi punkhawm intin un, suongin hun sep untin, chemzâm in hun sat nêl dimdem un au.

⁴¹Na In haw chuh mei in hâl intin un, numei tamtak muhna ah na chungah vaihawm intin un; na nawhchizuok hi suhai ing ka ting, na kingaihpihte bangmah pie ta puo’n la.

⁴²Khutichun na chungah ka lungdam deuh ta’n tin, na chunga ka thikthusietna chuh bei ta’n tin, thip tang ka ting, lungna khata puo’ng ka.

⁴³Na khangdawng lai nite na hetzing loh a, zie thil hawa hi nei suklungnat zawk tâk ziek hin, ngaitie, na thilhih chengcheng na lu chunga hun dinthuk ding ka hi” LALPA Pathien chun a tii.

⁴⁴“Ngaitie, paunak mang ta chengin zie paunak hi na chungah mang in au, ‘Chanu’n a nu dung a sun hi’, tih hi.

⁴⁵Na nu, a pasal leh a chate tennu, chanu khah na hi a, suohpihnu lam achun, a pasal leh a chate tennu suohpihnu na hi a: na nu kha Hit mi ahi a, na pa kha Amor mi ahi.

⁴⁶Chun, na suohpihnu, na u chuh Samari, na umnau apat mâllam a a chanute tawh cheng hi ahi a: na nau, na suohpihnu chula na umnau apat simlam a cheng, Sodom leh a chanute hi ahi a.

⁴⁷Himahleh, amau haw umdan chun na um puoh a, a tenumna awu chuh na hih puoh na a, na umdan cheng chenga amau sanga na siet zawk zie ngaihtuoh in ziehaw chuh,

⁴⁸Nang leh na chanute hih guola na suohpihnu Sodom leh a chanute’n ahih loh zieu chuh hing zing ka hih hi tawbang ahi, LALPA Pathien chun a tii.

⁴⁹Ngaitie, na suohpihnu Sodom gitlohna chuh ziehaw hi ahi; chaponate, nêk vah takluotna te, amah leh a chanute nawpchenna leh chagah leh tasamte a panpih loh hi ahi.

⁵⁰Chun, mi kisathei ahiu a, ka maa thil tenum hihte ahiu a; khutichun pha ka sak dân in amau chuh ka sumang ta a.

⁵¹Samari chun la na gitlohnate kimkhat zah le hih lo; amau haw sanga thil tenum na hih tamzawk ziekin na suohpihnu chuh apha guolin na kilatsak zaw ta a.

⁵²Na suohpihnute aphazaw guola na kilatsak tâk ziekin nangmah ngêi in na muolphona chuh na puok ding ahi; amau haw sangin thil tenum nasa zaw haw chuh na hih a, na gitlohnate ziekin amau chuh nang sangin a fel zawu ahi; ahi, na suohpihnute apha guola na kilatsak ziek hin nangin muolphona chuh abawn a na chan ding ahi,” ti’n.

⁵³“Chun, a umdan uh, Sodom leh a chanu umdan, Samari leh a chanu umdan te, amau haw tawh kituok in nangmah umdan ngei lehhei ing ka:

⁵⁴Amau haw thamuon a thil tawmcha na hih chuh na zahchâkpih a, na muolphona chuh na puok theihna dingin.

⁵⁵Na suohpihnute Sodom leh a chanute a hihna masau leh Samari leh a chanute chuh ahih na masau guolin um kit intin un; nang leh na chanute le na hihnau masa guolin um kit in lau.

⁵⁶Na chapo lai nite khan na suohpihnu Sodom chuh na kam in na phapuok kha puoh a,

⁵⁷Na gitlohna muhdawk ahih makhan. Tuhin vang chuh na kimvela uma hun tente Edom chanute leh a invengte chengcheng leh Philistia chanute dingin muhsit-um na hung hi ta hi.

⁵⁸Khutichun na hûkna leh na tenumna gah chuh na puok zel ding ahi,” LALPA chun a tii.

⁵⁹Khutichun LALPA Pathien chun hiti hin a tii: “Thuthun bawhsie a thutiem na khawksakloh guola na chunga hih ding ka hi.

⁶⁰Ahihziekin na khangdawng laia thuthun ka hun neih pih chuh hezing ing ka ting, na kawmah kumkhaw thuthun siem ing ka.

⁶¹Khutichun na suohpihnute, na u leh na naute na pawm tieng leh na umdan haw hun hedawk in na tin, na zak chana: amau haw chuh na chanu dinga hun pie ding ka hi ngâla, ziehi na kawma ka thuthunna a tel hi kimahlele.

⁶²Na kawma ka thuthun chuh sudet ing ka ting, khutichun LALPA chuh ka hi tih hun he ta’n lau.

⁶³Khutichun, na thil hihsa chengcheng ngaihdamna ka hun siem sak tieng leh na hetzing a, na zahchâk zieka na kam na kât tâk lohna dingin,” LALPA Pathien chun a tii.