Read Gangte EZEKIEL 17 Bible Online

EZEKIEL 17 - Gangte bible

EZEKIEL 17

¹Chun LALPA thu chuh ka kawmah a hung tung kita,

²“Mihing chapa, Israel insung mite kawma chun thu kisel pawdawk inla, tehkal thu gen in,

³LALPA Pathien chun hiti hin a tii, ti’n: Mupi lien tak, tha lien tak nei, a thaveng sau tak mai, pawl bembum, mul bit tak nei hi Lebanon tângah a lenga, Sidar thing zik a thiek bawnga,

⁴a zikpi dâwng pên chuh a thiek a, mi vakvielna gam ah a lên pih a, sumkawlveina khawpi achun a phut ta a.

⁵Zie gam thaichi chule a la a, lei phatna mun achun a phut a, tui tamtak pang achun a phut ta a, huisum guolin a phut ta a.

⁶A hung sel a, a hung khanga, grepgui bawk phatak niem tak a hung hi ta a; a bâk haw chuh mupi lam achun ato in a leh zam u a, a zung haw chuh a nuoi achun a um u a; khutichun grepgui a hung hi a, bâk a hun nei a, nah a hun nei ta a.

⁷Mupi lien tak dang le a uma, zie chun le tha lien tak leh mul bit tak a nei a, chun, ngaitie, zie grepgui zung chuh amah lam zuon chun a zam a; a kiphuhna mun apat khan a bâk haw chuh amah lam achun a seldawk ta a, amah chun tuia a vak theihna dingin.

⁸A bâk a hung uma, grepgui phatak a hung hih theihna dinga tui tamtak panga lei pha a phuh ahi.

⁹LALPA Pathien chun hiti hin a tii: A khang in a piting na dem? A vuoi mai theih na dingin a gah haw sattha’n, a zung puma bawt dawk lo ding ahi a ahim? A nah dâwng thak chengin le vuoi lawh ina; a zung puma bawt dawk dingin thilhih theihna nasatak ahim mi tamtak ahim ngai puo’n a.

¹⁰Ahi, ngaitie, phuh ahi na a, a khang in a piting den dinga ahim? Suohlam huih in a hun nawih tieng leh vuoi zo mai lo ding ahim? A kehna mun ngeia chuh vuoi mai lo ding ahim?” a ti a.

¹¹Chun LALPA thu chuh ka kawmah a hung tunga,

¹²“Helchîng inkuonte kawma chun, ‘Zie thil umzie hi helo na hiu maw?’ ti’n dâwng in. ‘Ngaitiem u, Babulon lengpa chuh Jerusalem ah a hunga, a lengpau leh a hotuteu chuh a mana, a kawmah Babulon lam ah a pui ta a,

¹³Lengpa suon khat a mana, thuthun a neih pih a, a kihâksiel saka, gamsung a mi pawimawh haw chule a puimang veka;

¹⁴lalgam chuh tawilawk thei lo a tawhden ahih a, thuthun chuh a zuih lai chana ding thei chauh a hihna dingin.

¹⁵Himahleh, amah chuh a chungah a hel ta a, sakawl leh mi tamtak hun sawl dinga va ngên dingin Aigupta gam achun palai a sawl ta a. A lawhting na dem? Zie tawbang thil hihpa chuh a suokcha dem? Thuthun chuh bawhsie ngâl in a suokcha tho tho dem?

¹⁶“A hi’n a ka hin sung chuh,” tih hi LALPA Pathien kamsuok ahi; a muhsit kihâksielna leh a bawhsiet thuthun a neih pih pa, amah lenga siempa kawm achun, Babulon achun thi’n a.

¹⁷Mi tamtak thah theihna dinga Babulon te’n lei a seh pawng u a, kawkhuk a laih u a, a kido tieng u leh Pharao sepaih hawn leh mipi tamtak te chun le amah chuh panpih thei puo’n au.

¹⁸Aziek chuh, thuthun chuh bawhsie’n kihâksielna chuh a musit ta ngâl a; thu a tiem nunga ziehaw chengcheng hi a hih ziekin, suokcha hiel puo’n a’, ti’n a kawm u ah gen in,” a ti a.

¹⁹Zieziekchun LALPA Pathien chun hiti hin a tii: “Ka kihâksielna a muhsit a, ka thuthun a bawhsiet ziekin, hing zing ka hih bang hin, amah lu chung ngeia ditthukna tunsak ngêi ngêi ding ka hi.

²⁰Lên in khuh ing ka ting, ka thâng achun âwk intin, Babulon achun hun pui ing ka ting, kei dinga a ginum loh ziekin zie chun a chunga thutanna siem ding ka hi.

²¹Chun, a sepaihte laka a taisie chengcheng chuh chemzâm in thiu intin, a suokcha sunsun te chuh muntina thehzak in um in au; chun, kei, LALPA hin ka na gen ahi tai tih hun hedawk in lau,” ti’n.

²²LALPA Pathien chun hiti hin a tii: “Sidar sang tak zikpi nah dâwng chuh kei ngêi hin lang ka ting, phut ing ka; A zikpi pên zik dâwng chuh thiek ing ka ting, Tang sang kichawi tak ah phut ing ka.

²³Israel tâng sangpen achun phut ing ka ting, A bâk hung um intin, hung gah intin, Sidar lopi tak hung hi’n a: Chun, a nuoi achun vacha chitin chengun tin; A bâk lim haw achun chung leng vacha tin chengin bu sieh un au.

²⁴Chun, gamlaka thing tin chengte chun Kei LALPA hin thing sang haw chuh ka suniem a, Thing niem haw chuh ka susang a, Thing hing haw chuh ka sugaw a, Thing gaw haw chuh ka kiduohsak ahi, tih he’n au; Kei LALPA hin ka gen ta a, hih le hih buting ding ka hi,” a ti a.