Read Gangte EZEKIEL 18 Bible Online

EZEKIEL 18 - Gangte bible

EZEKIEL 18

¹Chun, LALPA thu chuh ka kawmah a hung tung kita,

²“Israel gam chungchanga zie paunak hi na mat tieng u leh bang na tihnau ahi: ‘Pate chun grep thûk a neu a, a chateu ha a zau hi,’ tih hi?

³“A hin a ka hin sung chuh, Israel ah zie paunak hi mat hita puo’n a”. LALPA Pathien chun a tii.

⁴Ngaitiem u, hinna chengcheng hi keia ahi, pa hinna keia ahih guol mah in chapa hinna le keia ahi: chun, gitlohna hih taphawt chuh thi’n au.

⁵“Ahihziekin, mi chuh a diktata, dân tawh kituok leh adik chauh a hih a,

⁶lo-le-âi bawl muna a nek loh a, Israel inkuonte milim lam a ngat loh a, a invengte zi a sukbuok loh a, numei nîkbuok nei a naih loh a,

⁷kuomah a pawngbawl loh a, bat neite thil kawih a piek kit zawk a, kuomah buluh lo a, gilkielte kawma nek ding a pieka, sangawn a umte puon a silh saka,

⁸Apung delha a palâksak loh a, a pung le a lak loh a, thil phalo hihna apat a khut a tim a, mi leh mi kikala diktaka thu a tan a;

⁹Ka dân siem haw a zuih a, ka thutanna haw ginum taka a zuih chun, amah chuh mi diktat ahi a, hing tei ding ahi” tih hi LALPA Pathien kamsuok ahi.

¹⁰Himahleh, chapa suomhat ahim thisan suohhat ahim a neih a, zie thil haw hi akhawi hile a hih a,

¹¹A hih ding haw chuh a hih loh a, lo-le-âi bawl muna a nek zawk a, a invengte zi a sukbuok a,

¹²Gimthei leh tasamte a pawngbawl a, mi a buluh a, bat neite thil kawih a piek kit loh a, milim haw lam a ngat a, a ho a,

¹³A pung delha a palâk saka, a pung a lak chun, a hing na dem? Hing hiel puo’n a! Zie thil tenum haw a khawi hile a hih chun a thih ngêi ngêi ding ahi. Amah thisan mawh chuh a puok ding ahi.

¹⁴Himahleh, zie chapa hin chapa nei hen la, gitlohna a pa’n a hih chengcheng kha a muh a, a lauh a, ziehaw chuh a hih loh a,

¹⁵lo-le-âi bawl muna a nek loh a, Israel inkuonte milim lam a ngat loh a, a invengte zi a sukbuok loh a,

¹⁶kuomah a pawngbawl loh a, bat neite thil kawih a hen den loh a, kuomah buluh lo a, gilkielte nek ding a pieka sangawn a umte puon a silh sak zawk a,

¹⁷Mi gimtheite chunga a khut a tim a, a pung leh a lawk a lak loh a, ka thupiek haw a zuih a, ka dân siem haw a hawh chun, a pa gitlohna ziekin amah chuh thi puo’n tin, a hin ngêi ding ahi.

¹⁸A pa chu vang, nunsie taka mi a pawngbawl a, thagum a a suohpih pa a suom a, a mite laka thil gilo chuh a hih ziekin, ngaitie, a gitlohna zieka chuh thi ding ahi.

¹⁹“Himahleh, ‘Bang zieka e chapa chun a pa gitlohna chuh a thawk loh ding?’, na ti sek ui. Chapa chun dân chuh zuia thil dik a hih a, ka dân siem chengcheng chuh a mata, hih le a hih chun, hing ding ahi.

²⁰Gitlohna hih taphawt chuh thi ding ahiu: chapa chun a pa gitlohna chuh thuok puo’n tin, pa chun le a chapa gitlohna chuh thuok puo’n a: mipha chun a phat man muntin, migilo chun a gitloh ziekin thuok ina.

²¹“Ahihziekin, migilo chun a thil gilo hih chengcheng a kiheisan a, ka dân siemte a mata, dân chuh zuia thilpha a hih chun hing in tin, thilo ding ahi.

²²Bawhsietna ana hihsa chengcheng kha a chunga hetzing hita puo’n tin: a thilpha hih ziek chun hing ina.

²³Migilo thihna ahin kipahna ka nei a ahim? A umdan te a kiheimangsan a, a hin leh nuomsa hizaw lo ka him?” LALPA Pathien in a tii.

²⁴“Himahleh, mipha chun a phatna a kiheimangsan a, thil gilo a hih a, migilote hih guola thil tenum a hih chun a hing dinga ahim? A thilpha hih chengcheng kha hetzing hita puo’n tin, ginum lohna zieka a thiemlohna leh gitlohna a hih ziek chun, ziehaw ziek chun thi ding ahi.

²⁵“Ahi’n nangun, ‘LALPA thilhih dân hi a kilawm puoi’, na ti sek u a. Aw Israel insung mite haw, ngaitiem u, ka hih dân akibang zing paw maw? Nang haw hih dân chuh a kilawm lo zaw hilo ahim?

²⁶Mipha chun a phatna a kiheimangsan a, thil phalo a hih chun zie zieka chuh a thih ding ahi; thil phalo a hih zieka chuh thi ding ahi.

²⁷Ahihziekin, migilo chun gitlohna a hih sek chuh a haihsan a, dân chuh a zuih a, thilpha a hih chun a hinna humbit ina.

²⁸A kingaihtuoh a, bawhsietna ana hihsa chengcheng chuh a kiheimangsan ziek chun hing in tin; thilo ding ahi.

²⁹Ahihziekin, Israel insung mite chun, ‘LALPA hih dân hi a kilawm puoh ie’, a tiu a. Aw Israel insung mite haw, kei hih dân hi kilawm zinga, nang haw hih dân chuh kilawm zing lo zaw hilo ahim?

³⁰“Zieziekchun, Aw Israel insung mite haw, mitin a umdan bang zela na chung u a vaihawm ding ka hi, LALPA Pathien chun a tii. Lunghei unla, na bawhsietna teu chengcheng chuh haihsan un; phatlohna chuh na siet lawh lohna dingun.

³¹Bawhsietna na na hihsa chengcheng u chuh paihmang vek unla, lunggil thak leh ngaihtuohna thak nei un: Bang zieka e na thih ding uh, Aw Israel insung mite haw?

³²Mithi te thihna ahin kipahna ka nei puoh ngâla, LALPA Pathien chun a tii: zieziekchun, kihei unla, hing un!”.