Read Gangte EZEKIEL 19 Bible Online

EZEKIEL 19 - Gangte bible

EZEKIEL 19

¹Zielo chun le, Israel lengte dingin sûnna la phuok inla,

²Na nu chuh kuo ahi? Sakeibaknei ahi ie; Sakeibaknei chal lak ah a bawk; a note vak, sakeibaknei chal tuoi lak ah.

³Amah chun a note laka khat a vak lien a, sakeibaknei chal tuoi a hung hi a; sapeh dân a sinsak a, mihiem le a pet ta a.

⁴Namte chun a chanchin a hun he tau a; kawkhuka nawhlut in a man u a, hâtkawl a buhsak u a, Aigupta gam ah a pui tau hi.

⁵Tichun, a nu chun chingthei takin a ngak, a kinepna a mansak ta a; A chate laka khat a la kit a; sakeibaknei chal tuoi bangin a vak lien hi.

⁶Sakeibakneite lak achun a vakviel a, Siel bang hung lien in, sakeibaknei chal tuoi a hung hi a; sa peh dân a kizil a, mihingte chuh an nêk in a ne a.

⁷Chun, a kulhpi haw chuh a lawm a um ahi tih a he a; a khawpiteu chuh a suhawm zo ta a.

⁸Namtin hung pungkhawm in amah a do u a, lên a zak u a; kawkhuk ah a nawhlut u a.

⁹Thik kawl a buhsak u a bawm ah a khum u a, Babulon lengpa a pieu. Kulhpi sung a hun tun tau hi, A thawm sukdaih na dingin Israel tâng lien chung ah.

¹⁰Na nu chuh grep huon a grep tuia kivâk a bang, Siktui thieng a kivâk, bawk lieiluoi in a gah chut chut hi.

¹¹A bâk khauh pên chun lal tiengin vai a hawma, Thingbawk lak ah a sangpen a, A bawk a pha a, a sangpen a, a dawk viehvuoh hi

¹²Mahleh thangtawm in a thiek bawng ui, Tuol ah a sep thau a, suohlam huih in a mût gaw a, a gah haw chuh a thawngthau a, a kung khauh tak chuh a vuoi a, mei in a katum hi.

¹³Tichun, gamgaw tui beihna achun a phut chawn u a, gamgaw leh dangchâk gam a chun.

¹⁴A bâk lak apat mei a hung pawt a, A bâkte leh a gah cheng chuh a katum zo a, tichun, a kungpi khauh tak chule a sit puoh a; lal tienga vaihawm ding le a sit puoi. Ziehi sûnna la ahi ie, sûnna a mat ding ahi.