Read Gangte EZEKIEL 2 Bible Online

EZEKIEL 2 - Gangte bible

EZEKIEL 2

¹Chun, ka kawmah “Mihing chapa, na keng in ding ah, na kawma thu gen ding ka hi” a ti a.

²Chun, ka kawma thu a gen phet chun Thagau chuh keimah ah a hung luta, ka keng in ei din saka, chun, ka kawma a thugen chuh ka ngaitha ta a.

³Chun, ka kawmah, “Mihing chapa, kiphin hât Israel chate, ka chunga hel sekte kawm achun ka hun sawl na hi: amau leh a pileputeu in le tuni chan gei hin ka chungah a bawhsie sek u ahi.

⁴Mi luhlul leh lochal ahiu a, a kawm u a ka hun sawl na hi; a kawm u achun, ‘LALPA Pathien chun hiti hin a tii,’ na tih ding ahi.

⁵Amau chun ngaitha leu ngaitha kileu (kiphin chîng nam ahi ngâl u a), a lak u ah thiemgau a um hi tih hun hen au.

⁶Chun, nang mihing chapa, amau chuh lau ki’n la, a thuu le lau diek ki’n, na kimvel achun hamlingnei leh ling um in, aikawm laka cheng himahleh chin le: helchîng mi himahleu le a thuu chu lau ki’n la, a kilat dân u ah lungthuoi diek ki’n.

⁷Chun, ka thu chuh, ngaitha leu, ngaitha kileu, a kawm u a na gen ding ahi: helchîng tak ahi ngâl u a.

⁸Ahihziekin, nang, mihing chapa, na kawma ka gen hi ngaitha’n; helchîngte guolin nang vang hel ki’n: na kam ka’n la, ka hun piek hi ne’n” a ti a.

⁹Chun, ka vak et leh, ngaitie, a khut in ei hun bana, chun, ngaitie, a khut achun lehkhabuziel a um a;

¹⁰Zie chuh ka ma ah a hun zak a, a sunglam leh a pawlama kizik ahi a; kahnate, lusûnnate leh chunggikna thute a kizik a.