Read Gangte EZEKIEL 20 Bible Online

EZEKIEL 20 - Gangte bible

EZEKIEL 20

¹Chun, hiti hi a hung hi a, a kum sagihna, tha ngana, zie tha ni sawm ni chun, Israel upa haw khenkhat chuh LALPA dawt nawp nei in a hung u a, ka ma ah a chuu a.

²Chun, LALPA thu chuh ka kawmah a hung tunga,

³“Mihing chapa, Israel upa haw chuh va hopih inla, a kawm u ah, ‘LALPA Pathien chun hiti hin a tii: Thu ei dawng dinga hung na hiu hi? A hing zing takzet ka hih guol hin, nang haw thu kidawtsak lo takzet ding ka hi’, LALPA Pathien chun a tii,” ti’n.

⁴Amau chuh na selpho die, mihing chapa, amau chuh na selpho die? A pileputeu tenumna haw chuh gen khum inla,

⁵Chun, a kawm u ah, “LALPA Pathien chun hiti hin a tii: Israel te ka tel ni a, Jakob inkuonte suonte kawma kihâksielna a ka khut ka zaka, Aigupta gama a kawm u a ka kihetsak lai khan, ‘Kei hi LALPA na Pathien u chuh ka hi’, ti’n a kawm u ah kihâksielna a ka khut zak hielin ka na gena.

⁶Zie ni khan amau chuh Aigupta gam apat a puidawk a, amau dinga ka gam huol, nawitui leh khuoizu a luong gam, gam chengcheng laka gam hawihpen a chuh puilut dingin a kawm u ah kihâksielna’n ka khut ka zaka.

⁷A kawm u ah, mitin in na mit u a na muh uh thil tenum haw chuh paihmang unla, Aigupta milim haw chun kisubuok kiu in, Kei hi LALPA na Pathien u chuh ka hi,” ti’n ka na gena.

⁸“Ahih ziekin ka chungah a hel u a ei limsak puou a. Mitin in thil tenum a etlah hawu chuh a paihmang puou a, Aigupta milim haw chuh a kiheimangsan diek puou hi. ‘A chung u a ka lungnatna butthaka, Aigupta gamsung ngeia chuh ka lungnat dân taka sawisak ding ahi tam’, ka na ti hiela.

⁹Ahih ziekin ka min vangkhuopna’n a lak u a a chênna teu, Jentel te’n ka min chuh a ngaihho lohna dingun, amau mitmuh ngêi achun Israel te kawmah, Aigupta gam apat puidawk in, keimah ngêi ka na kihetsak a.”

¹⁰“Zieziekchun Aigupta gam pawtsan dingin in ka kisa a, thalek ah ka puilut ta a.

¹¹Chun, Ka dân siem haw chuh amau ka pie a, ka thutanna haw chuh ka etsak a, min a zuih a a hinlawh ding hawu chuh.

¹²Zielo chun le, kei leh amau kikala melchikna dingin ka chawlhni haw chuh amau ka pie a, kei hi amau haw suthiengtho LALPA chuh ka hi tih a het theihna dingun.

¹³Himahleh, Israel insung mite chuh thalek a khan ka chungah a hel u a, ka dân siem haw chuh a zui puou a, ka thutanna haw, min a zuih a a hinlawh ding hawu chuh a musit u a, Sabbath haw le nasa takin a bawhsieu a; khutichun, thalek achun amau hih mangthai dingin ka lungnatna chuh a chung u ah ka sungtha mai die aw, ka ti a.

¹⁴Himahleh, ka puihdawk pet hete nam ngêi mit muh ah hihsiet a a um lohna dingun ka min ziekin ka tawi zaw ta a.

¹⁵Thalek akhan le amau haw ka piek gam, bâwngnawi leh khuoizu a luong gam, gam chengcheng laka gam hawihpen, achun puilut puo’ng ka ti’n a kawm u a kihâksielna’n ka khut ka na zak ta a;

¹⁶ka thutanna haw a muhsit u a, ka dân siem haw a zuih loh u a, ka Sabbath haw a bawhsiet zawk ziekun; a lungthim un a milim pathien hawu a lunggulh ngâl u a.

¹⁷“Ahih ziekin amau haw sumangthai lo dingin lungsietna’n ka en zaw ta a, thalek akhan ka na sichai talo zaw ahi.

¹⁸Chun, thalek akhan a chateu kawmah, ‘Na pateu dân siem haw chuh zui kiu inla, a thutanna hawu chule zui diek kiu inla, a milim hawu chun le kisubuok diek kiu in;

¹⁹kei hi LALPA na Pathien u chuh ka hi a: Ka dân siem haw chuh hawh unla, ka thutanna haw zui unla, hih un;

²⁰Himahleh, ka Sabbath haw chuh chang unla, kei leh nang haw kikala melchikna hi’nau, LALPA na Pathien u chuh ka hi tih na het theihna dingun’, ka ti a.

²¹Ahih ziekin a chateu chuh ka chungah a hel u a. ka dân siem haw chuh a hawh puou a, ka thutanna haw, mi’n a zuih a a hinlawh ding hawu chuh zui dingin a vawp diek puou a; ka chawlhni haw chuh a bawhsie zaw tau a; khutichun ‘a chung u ah ka lungnatna chuh buntha’ng ka ting, thalek ahin a chung u a ka lungnat dân takin sawisa di’ng ka’, ka na ti hiel a.

²²Himahleh, ka khut ka na tim a, amau haw ka puih dawk lai mute, Jentel te’n ka min a ngaihho lohna dinguh vangkhuopna’n ka na tawi zaw ta a.

²³Jentel te lak ah thehzak ing ka ting, gamtin ah nawhzak ing ka, khut zak hiela kihâksiel in thalek a khan a kawm u ah ka na ti a,

²⁴Ka thutanna haw a zuih loh u a, ka dân siem haw a muhsit u a, ka sabbath haw a bawhsiet u a, a pileputeu milim haw a mitkat zawk ziek un.

²⁵“Zieziekchun amau chuh dân siem, pha sam lo haw leh thutanna, a hinlawh theih dinguh hi sam lo, haw kawma chun ka pie dawk ta a;

²⁶Kithawihna a cha lutîl mei laka paih luta amau leh amau kisubuok in ka um sak ta a, lauhna a a hung dim u a, a tâwp leh LALPA chuh ka hi tih a hun het theihna dingun.

²⁷“Zieziekchun, mihing chapa, Israel inkuon kawm achun thu gen inla, a kawm u ah, ‘LALPA Pathien chun hiti hin a tii: Na pileputeu chun ka chunga bawhsietna thil a hih hawu hin le ei na gensieu ahi.

²⁸Khut zak hiela amau ka tiem gama hi ka puih lut phetin, tâng sang leh thingbawk pha a muhna taphawt u ah kithawihna a siem u a, a thilpiekteu lungnat-um tak haw chuh a pieu a. A gimlim thilpiek hawu chuh a pieu a, a dâwn ding thilpiek hawu chuh a sungtha ngâl u a’, ti’n.”

²⁹Khutichun, ken a kawm u ah, “Kithawihna munsanga na chieh matchetnau hi bang na tihnau ahi?” ka ti a; khutichun a min chuh tuni chan hin, “Bamah” tih ahi tai.

³⁰Khutichun Israel inkawte kawm achun gen inla, LALPA Pathien chun hiti hin a tii: Na pileputeu guola nangmau kisubuok in a tenumna lampi hawu a chuh petmang na hi tau maw?

³¹Thilpiekte na piek u a na chateu meia na paih lut tieng u leh tuni chan hin na milim hawu achu nangmau leh nangmau kisubuok na hi ngâl u a. Nang haw’n thudawt a neih dinguh ka hi a ahim, Aw Israel insung mite haw? A hin a ka hin sung chuh nang haw dawt in um puo’ng ka, LALPA Pathien chun a tii.

³²Na lungthim u a, Jentel te leh gam danga mite guolin thing leh suong ho leuhing, na tih u hi, tung ngei puo’n a.

³³“A hin a ka hin sung chuh, khut hât tak leh bân zak kawm leh lungna kawmin na chung u ah vaihawm ing ka, LALPA Pathien chun a tii.

³⁴Namte lak apat chun hun puidawk ing ka ting, nawhzak a na umna gam u apat chun khut hât tak leh bân zak leh lungna kawmin hun puikhawm ding ka hi.

³⁵Namte thalek achun hun puilut ing ka ting, zie chun kimaichangtuoh in na chung u ah thutanna siem ing ka.

³⁶Aigupta gam thaleka na pileputeu chunga thutanna ka na siem guol khan nang u chunga le thutanna siem ding ka hi, LALPA Pathien chun a tii.

³⁷“Tiengkhut nuoi ah hun lut sak ing ka ting, thuthun gâk detna nuoia hun puilut ding ka hi;

³⁸Chun, na lak u apat a helte leh ka chunga bawhsiete chuh thit thieng ing ka ting, a umna gam u apat in puidawk ing ka ting, ahihziekin Israel gam achun lut hiel puo’n au: khutichun, LALPA chuh ka hi tih hun he ta’n lau.”

³⁹Nang u chuh na hih u leh, Aw Israel insung mite haw, LALPA Pathien chun hiti hin a tii: “Chieh unla, na milim hawu na chuh sem chiet mai tau u! Ahihziekin, tunung leh ka thu hun ngaitha ta’n na tin un, ka min thiengtho chuh na thilpiek hawu leh na milim hawu chun subuok ta puo’n lau.

⁴⁰Ka tâng thiengtho chung achun, Israel tâng sang achun, zie tak a chun Israel insung mite cheng-cheng chun a bawn un, zie gam achun ka na sem tan au; zie chun amau chuh pawm ta’ng ka ting, zie chun na thillat teu, na thilpha piekteu leh na thilzek chengcheng teu chuh deih ta’ng ka.

⁴¹Namte lak apat a ka hun puih dawka, thehzak na hihnau gam tin apat a ka hun puih khawm tieng chuleh gimlim guolin hun na pawm ta’ng ka ting, Jentel te mitmuh achun nangmau haw ahin ka thientho zie kilang ta’n a.

⁴²Israel gam, khut zak zet a na pileputeu piek ka na tiem gama chuh ka hun puih tieng chuleh LALPA chuh ka hi tih heta’n lau.

⁴³Zie tak a chun na umdan teu leh na thilhih dân hawu, na kisukbuokna chengcheng teu chuh he ta’n na tin un; khutichun thil phalo na hihteu chengcheng ziek khan nangmau mitmuh ngêi in kiten ta’n lau.

⁴⁴Na umdan phalo hawu leh na thilhih tenum hawu dungzui hilo a, ka min zieka ka hun kipapvaipih tieng leh, Aw Israel inkawte haw, LALPA chuh ka hi tih he ta’n lau,” LALPA Pathien chun a tii.

⁴⁵Chun, LALPA thu chuh ka kawmah a hung tung kita,

⁴⁶“Mihing chapa, simlam chuh nga’n la, simlam chuh asie lam in thu gen khum inla, simlam a gammâng gam chuh asie lam in thu genlawk khum in;

⁴⁷Simlam a gammâng kawm achun, ‘LALPA thu hi ngaitha’n! LALPA Pathien chun hiti hin a tii: Ngaitie, na sung ah mei chawhkuong ing ka ting, na sunga thing hing chengcheng leh thing gaw chengcheng chuh katum vek ina: meikuong puotpuot chuh mit puo’n tin, sim apat a mâl chanin ana do guo chengcheng chuh katum ina.

⁴⁸Tichun, mi chengcheng in kei, LALPA hin ka chawhkuong ahi tih muu intin un, mei chuh mit hiel puo’n a, a tii’, ti’n,” a ti a.

⁴⁹Ziephet chun kei chun, “Khaih, LALPA Pathien! ‘Tehkal thu gen gen zieng pa khah hilo ahi?’ ei ti ei veu,” ka ti a.