Read Gangte EZEKIEL 21 Bible Online

EZEKIEL 21 - Gangte bible

EZEKIEL 21

¹Chun, LALPA thu chuh ka kawmah a hung tung kita,

²“Mihing chapa, Jerusalem lam nga’n la, asie lam in a mun zek haw thu gen khum inla, Israel gam chungthu asie lam in genlawk in;

³Israel gam kawm achun, LALPA chun hiti hin a tii: Ngaitie, ka hun do na hi ka chemzâm chuh a pai apat in satdawk ing ka ting, na lak u a miphate leh miphalote chuh gawt ding ka hih ziek chun.

⁴Ka chemzâm chuh a pai apat in pawt intin, simlam apat mâllam chanin mihing chengcheng chuh gawt ina.

⁵Chun, mi chengcheng in kei LALPA hin ka chemzâm chuh a pai apat in ka satdawk tai tih a hetna dingun; kikhum kit khata puo’n a.

⁶Zieziekchun, mihing chapa, mau vungvung inla, thasie takin a muh nau achun mau vungvung in

⁷‘Bang zieka khuti mau na hi?’ a hun tih tieng u leh, ‘Chanchin ziekin; zie chuh a hung tun tieng leh lunggil chengcheng chuh lauhna’n dim ta’n tin, khut chengcheng chuh zawitha ta’n tin, ngaihtuohna chengcheng chuh chauzo ta’n tin, khûp chengcheng chuh tui bang mai in zawi zo ta’n a; ngaitie, a hung hi, hung tung ding ahi, LALPA Pathien chun a tii’, ti’n,” a ti a.

⁸Chun, LALPA thu chuh ka kawmah a hung tung kita,

⁹“Mihing chapa, genlawk inla, LALPA chun hiti hin a tii: Chemzâm, tâthiem ahi a, chemzâm chuh nawtval ahi tai!

¹⁰Mi satna dinga tâthiem ahi tai, Nawtval ahi tai, kawlphe bangmai in! Nawpna I bawl zing ding um? Ka mite’n vaulawkna leh gawtna chengcheng, A limsak puoh ngâl u a.

¹¹Nawtval ahi, a ga a tuka vai dingin; Chemzâm chuh tâthiem ahi a, nawtval ahi ta ie, Mithat khuta piek dingin.

¹²Mihing chapa, kiko inla, pengzâk in; Ka mite chunga mat ding ahi ngâla, Israel hotute chunga le. Ka mite chunga tung ding, lauhna leh chemzâm, Zieziekchun, na malpi bêng mai in.

¹³Ka mite ka patep, A kisik loh u chun, a chung u ah tung ina, ziehaw hi,” LALPA Pathien chun a tii.

¹⁴“Zieziekchun nang, mihing chapa, genlawk ah khut bêng hielin. Chemzâm chun sat hen, nihvei, ahi, thumvei hiel. Chemzâm mithat chuh ahi, mi thupi te that a, A insungpiu a le valut chuh.

¹⁵Lunggil a tuia, tamtak a pukna dingun, A kelkawt u ah chemzâm mûk zum ka pan sak hi. Katei! kawlphe guolin a val, mi thahna dinga pat ahi.

¹⁶Kipei viel in la, hah pan in, vak ban sat tie changlam pang, Kipei viel inla, veilampang le ban sat zel ah, Na ngatna lam lam chuh.

¹⁷Ken le ka khut ana bêng ing ka ting, Ka lungnatna hung pha tan a; Kei, LALPA chun ziehi ka gen tai, a tii, tih,” a ti a.

¹⁸Chun, LALPA thu chuh ka kawmah a hung tung kita,

¹⁹“Mihing chapa, Babulon lengpa chemzâm in a hawh ding lampi nih ana guonggalh in; zie lampi te nih chu gam khat apat a a hung kipat dinguh ahi: lampi te nih kisuktuohna achun a zawtna lam un kawkmuhna siem in.

²⁰Ammon mite khuo Rabbah a chemzâm chiehna ding lampi khat guot inla, Judai gama kulh a ki-um Jerusalem a chiehna ding le.

²¹Phunsân dingin Babulon lengpa chuh lamkathuom tak achun a dinga, lampi te nih kisuktuohna tak achun; thalchang haw chun phun a sana, a milim haw a dawng a, sathin chuh a en a.

²²Thalchang ‘Jerusalem’ ti a a tiemteh pên chuh a khut changlam ah a hung chu a: kulh tahsietna siem ding leh, kido a kiko zuoh zuoh ding leh, kulh kawt tahsietna ding siem ding leh, khawpi huolna ding lei sung vum ding leh kulh banga kalna ding siem dingin.

²³Jerusalem a mite chun zie chuh taksang puo’n au, kichamna thutiem a siem hawu ziek chun. Ahihziekin amah chun a gitlohnau hetdawksak intin, amau chuh salin man ina.

²⁴Zieziekchun, LALPA Pathien chun hiti hin a tii: Kichien leh taklat a um, na bawhsietna teu leh, na thilhih chengcheng u a kilang, na gitlohnateu chun na diklohnau hezing dingin ei siem a, het dawk na hung hih tâk ziek u hin, khuta mat in um in lau.

²⁵“Aw, nang, Israel hotu, thanghuoi leh mantheihlo pa, na ni a hung tung tai, na gawtna tawpkhawk hun a hung tung tai;

²⁶LALPA Pathien chun hiti hin a tii: Hotu dielkawp chuh lâkdawk sak unla, lallukhuk chuh paih sak un, thil chuh angei ngêi in um ta puo’n a: mi nuoinungte chuh chawisâng unla, mi thupi te chuh suniem un.

²⁷Sietna, sietna! (zie tawbang chuh ana tung kha nailo) Ahi, khawpi chuh susie ding ka hi! A neipa diktak a hung masangsieh tundin kit hita puo’n a; zie tieng chuleh amah chuh pie’ng ka,” ti’n.

²⁸“Nang, mihing chapa, thu genlawk inla, hiti hin ti’n: ‘LALPA Pathien chun Ammonte leh Israel a suohsalhnau chungchâng achun hiti hin a tii: Chemzâm, chemzâm sah dawk ahi tai, mi thahna dingin, mi sukmangna dingin nawtval ahi tai, kawlphe bang hiela vak zawt zawt dingin!

²⁹Chemzâm chuh migilo thih ngam a liem haw, a gawtna niu tawpkhawk hung tungte, ngâwng a ngak ding ahi ti’n nang dingin kilâkna diklo muu henla, lepchieh chieh in phun san mahleu.

³⁰“ ‘Chemzâm chuh a pai ah khum kit tau in. Na pienna mun leh na mawmna gam ngeia chuh na thu tan ding ka hi.

³¹Na chungah ka hachangthakna sungtha’ng ka ting, ka lungnatna meia hun mût ding ka hi; mi huham, mi sukmangthai thiem haw kawma chuh hun pie dawk ding ka hi.

³²Mei ah hun tik intin un; gamsung achun na thisan kibuon tin, hetzing hita puo’n a, kei, LALPA hin ka gen ta ngâla, a tii’, ti’n,” a ti a.