Read Gangte EZEKIEL 22 Bible Online

EZEKIEL 22 - Gangte bible

EZEKIEL 22

¹Chun, LALPA thu chuh ka kawmah a hung tung kita,

²“Nang, mihing chapa, zie thisan suohna a dim khawpi chung thu hi na tan die? Na tan die? Ahi, a tenumna haw chengcheng chuh amah hetsak in!

³Chun, a kawmah hiti hin ti’n: LALPA Pathien chun hiti hin a tii: Aw, a sietna ni tunna dinga a sunga thisan suoh a, milim siem a, kisubuok khawpi!

⁴Na thisan suohna a khan mawhna puoh a, milim na siemna a khan na kisubuok ahi; na nite na sunai a, na kumte tawpna chuh na tung tai; zieziekchun namte gensiet ding leh gam chengcheng te nuihsan dingin ka hun siem ta ahi.

⁵Na kawma umte leh gamla taka umte chun hun nuihsan in au, nang minsie leh buoina a dim khawpi!

⁶Entie, Israel hotute mitin in a thilhih theihnau bang zela na sunga thisan suoh dingin a um ui.

⁷Na sunga chun nu leh pate a musit u a, na sunga chun malzin a zawhthawh bawl u a, na sunga chun nauchagahte leh meithaite chuh a bawlsieu hi.

⁸Ka thil zek haw na musita, ka sabbath haw na bawhsie ahi”.

⁹“Na sunga chun thisan suoh dinga mi hêk hatte a um a, na sunga chun thawihmuol a kithawihna sa va ne te a um u a; na sunga chun mite chun hûkna thil a hih sek ui.

¹⁰Na sunga chun a pateu zi kuolpih a um u a, na sunga chun numei nîkbuok nei lai kuolpih a um ui.

¹¹Na sunga chun mi’n a invengte zi zawl a saihpih a, mi dangin a mo a kuolpih a, na sunga chun mi dangin a suohpihnu, nu chuom tawh a pa chanu, a kuolpih hi.

¹²Na sunga chun thisan suoh dingin gawlhgukna a lau a, a lawk leh a pung na la a, na invengte thil na pawng lak sak a, diklo takin na kisulawk a, kei nei hengilh ta ahi,” LALPA Pathien chun a tii.

¹³“Zieziekchun, ngaiin, diklo taka na lawkna leh na sunga thisan kisuoh chuh ka khut ka bet khum hi.

¹⁴Ka hun sawisak ni chuleh na hansan na’n a thuok zo in na khut a hat na dem? Kei, LALPA hin ka gen ta a, hih ding ka hi.

¹⁵Namte lak a chun hun thehzak ing ka ting, gam tin ah hun nawhzak ding ka hi; chun, na buokna chengcheng chuh nanga pat in subei vek ing ka.

¹⁶Khutichun namte chun hun musit intin un, chun, LALPA chuh ka hi tih hun he ta’n la, a tii, tih,” a ti a.

¹⁷Chun, LALPA thu chuh ka kawmah a hung tunga,

¹⁸“Mihing chapa, Israel insung mite chuh kei dingin thik-ek tawbang phet ahi tau hi; a bawn un sumeng, langva, kahpathik leh suon hâltuina thuk a um tawbang ahi tau hi; tangkaguo êksie tawbang chauh ahi tau hi.

¹⁹Zieziekchun, LALPA Pathien chun hiti hin a tii: Thik-ek tawbang chauh na hih tâk ziek u hin, ngaitiem u, Jerusalem a hun puikhawm ding ka hi.

²⁰Tangkaguo, sumeng, langva, kahpathik leh suon hâltuina thuk a a kawihkhâwm u a, hâltui dinga a chunga mei a tih guol un, lungna leh hachangthak in hun puikhawm ing ka ting, zie chun hun kawih ing ka ting, hun hâltui ding ka hi.

²¹Ahi, hun kawihkhâwm ing ka ting, na chung u ah ka lungnat na mei tik ing ka ting, zie lak achun hâltui in um in;

²²Hâltuina thuk a tangkaguo a tui guolin nang u le zie tak achun hung tui in lau, kei, LALPA hin na chung u a ka hachangthakna ka sunthak ahi tih hun he ta’n lau,” a ti a.

²³Chun, LALPA thu chuh ka kawmah a hung tung kita,

²⁴“Mihing chapa, gam kawm achun gen inla, Gam sukthien loh, lungnatna ni a guohtui chang lo chuh na hi a.

²⁵Sakeibaknei in hâm kawma a sapeh a lawih tel guolin na sung ah na thiemgaute phielgukna a um ahi; mihing hinna a ne zo u a; go leh thil mantam haw a kilak u a; na sung achun meithai tamtak a siem ui.

²⁶A thiempute chun le nasatak in ka dân a bawhsieu a, ka thil zek haw a subuok u a, thil zek leh thil maimai a khenchuom him puou a, thil buok leh thil thieng kikhiekna le kuomah a sinsak puou; ka Chawlhni te chuh a ngaidau u a, khutichun a lak u ah sukminsiet in ka um ahi.

²⁷A sunga a hotute chuh, Ngei gawlsan a sapeh bawttel zieng tawbanga thisan suoh leh lawkna diklo muhna dinga mi hinna sumangthai zieng tawbang ahiu.

²⁸A thiemgaute chun mi’n bang a nuh vam guol un zie gitlohna haw chuh a selguu a, kilâkna diklote mu a, phunsân a lepchieh chieh kawksak in, LALPA’n bangmah a gen loh pipi le, ‘LALPA Pathien chun hiti hin a tii’, a ti sek ui.

²⁹Gamsung a mite chun mi thil pawng lak sak a chîng u a, mi a suom u a, ahi, mi gimthei leh tasamte chuh a bawlsieu a, malzinte chuh diklo takin a pawngbawl sek ui.

³⁰Chun, gam chuh ka suksiet lohna dinga bâng chuh sapha ding leh a chipna muna gam thathenga ka masanga ding ding amau haw lak achun ka hawla; himahleh, khatchale ka mu puoh a.

³¹Zieziekchun, ka lungnatna chuh a chung u ah ka buntha ta a; ka thangtawmna mei chun amau chuh ka hâltum ta a; a umdan chiet uh a lu chung u a ka hun tunsak ahi, LALPA Pathien chun a tii, ti’n,” a ti a.