Read Gangte EZEKIEL 23 Bible Online

EZEKIEL 23 - Gangte bible

EZEKIEL 23

¹Chun, LALPA thu chuh ka kawmah a hung tunga,

²“Mihing chapa, numei nih, nu khat chanu, a um u a;

³Aigupta gam ah nawhchi a zuok u a; ngaklak ahih lai u a zuok ahi tau a; nungak thiengtho ahih nau a mansak u a, nawhchi a zuok tau hi.

⁴A upazaw nu min chuh Oholah ahi a, a naunu min chuh Oholibah ahi a; keia a hung hi tau a, chapate leh chanute a nei u a. Chun, a min u chuh ahihleh, Oholah chuh Samari ahi a, Oholibah chuh Jerusalem ahi.

⁵“Chun, Oholah chuh keia ahih nung in a kizuok a, a deihchak, a inveng, Asuria chuh a utcha zinga;

⁶Amau chuh vaihawmte, sepaih hotute, tangval etlah um taktak ngên, sakawl chung chuong mi, puon sandup a kivan ngên ahiu a.

⁷Zie Asuria tangval pha taktak haw lak ahin a kiphahkadak a, chun, a mi utchakte milim pathien haw chun a kisubuok kit nalai seta.

⁸Aigupta gama, ngaklak tûng cha ahih apat a a nawi a khawihsak sek uh, a kuolpih sek u leh a hûknau a butthak khum sek uh ana hih ziekin a kizawk chuh a haihsan diek puoh a.

⁹Zieziekchun, a deihchakte, a utchak tuntun te, Asuria mite khut achun ka piedawk ta a.

¹⁰Amau chun a sangawnna chuh a hâwkdawk sak u a, a chapate leh a chanute chuh a man u a, amah chuh chemzâm in a that tau a, numeite lak ah lauh-um a gen pên in a nei tau ahi, a chunga thutanna a neih tâk ziekun.

¹¹“Chun, a suohpihnu Oholibah chun zie chuh mu mahleh a unu sang chun a mi deihchakna achun a huoisie zaw a, a hûkna chule a unu hûkna sang chun a khawk zaw a.

¹²Asuria mite, lengte, sepaih hotute, tangval deihum tak ngencha, sakawl chung chuong mi, thupi taka kichei haw chuh a utcha a.

¹³Sukthanhuoi in a um hi tih chuh ka mu ta a; a nih un lampi kibang a hawh u a.

¹⁴Chun, a naunu hûkna chuh a huoisie deuh deuh ta a; pasal lim banga kizik, Kaldai mite lim asan-pâla kichei,

¹⁵Kawnggak gâk, dielkawp hawihtak kawp, Kaldai mite Babulon sakawl chung chuong sepaih hotute bangtak haw chuh a mu ta a.

¹⁶Chun, amau haw chuh a muh phet chun a utcha ta mah mah a, Kaldai gama a kawm u ah mi a sawl a.

¹⁷Chun, Babulon mite chuh a kawmah, kingaihna zâlkhun achun a hung u a, a hûknau chun amahnu chuh a subuok zo tau a.A sukbuok zawh phet u chun amau chuh a khawp zawk zawk a, a kiheimangsan ta a.

¹⁸Khutichun phuong taka a kizawk a, a sangawnna a hâwkdawk phet chun ningkitel a a unu ka kiheimangsan guol khan amah chuh ka kihei-mangsan ta a.

¹⁹Ngaklak ahih laia. Aigupta gama a kizawk lai nite kha hedawk kitin a hûk zaw deuh deuh nalai a.

²⁰Amah zawlsaihpihte, achal a hihnau chuh sabiltung a bang zieng, a thil pawt u chuh sakawl thil pawt bang zieng haw chuh a utcha mah mah a.”

²¹Khutichun ngaklak na hih laia na hûkna, Aigupta gama na nawi a hun mêk sak diek u a, na ngaklak nawi a khawih a khawih lai u kha na hedawk kita, na ngai mah mah ahi.

²²Zieziekchun, Aw Oholibah, LALPA Pathien chun hiti hin a tii: Ngaiin, a hun kingaihpih, khawp kisa a na kiheimangsan zieng haw khan nang hun kilanpih dingin châwk tho ing ka ting, muntin apat hun puikhawm ding ka hi.

²³Babulon mite leh Kaldai mite chengcheng, Pekod mite, Shoa mite, Koa mite leh Asuria mite chengcheng tawh; tangval deihum tak takte, gamawpte, vaihawmte, sepaih hotute leh mi minthangte a bawn un sakawl chunga chuong in hung in au.

²⁴Chun, gâlvan haw, kidona kangtalai haw, kangtalai haw keng in mipi tamtak kipunkhawm in mâllam apat hun do in au; phaw lien leh phaw neu leh lukhuk haw tawh na kimvel chengah hun huol in au; chun, thutanna amau piesawn ka ting, amau dân dungzui in na chungah thu tan in au.

²⁵Na chung u ah ka thikthusietna umsak ka ting, lungna takin hun sawisa’n au; na nak hawu na bil hawu hun ât thak sak intin un, na lak u a a hingdawksunte chuh chemzâm in thiu intin, na chanuteu leh na chapateu chuh hun lâksak intin un, a hingdawksunte chuh mei in kanglum ina.

²⁶Na nîk-le-puon haw chuh hun sut sak intin un, na sana kicheina hawih taktak haw chuh kilak in au.

²⁷Aigupta gama na na pat na hûkna leh na nawhchizawkna chuh haihsak ing ka ting, milim haw mitkat kit ta puo’n na tin, Aigupta te hezing ngei ta puon la.

²⁸LALPA Pathien chun hiti hin a ti ngâla: Ngaitie, na mi hawtte, na lungthima na chim mah mah te khuta chuh hun matsak ding ka hi.

²⁹Hawt takzet in hun hawn tin un, na sepgim gah, chengcheng hun lâksak intin un, sangawn leh ngawnchang in hun nusieh intin un; na nawhchizawk sangawnna, na hûkna leh na nawhchizawkna ngêi chuh suklatin um ina.

³⁰Nam dangte delha na hûk a a milim hawu a na kisukbuok ziekin zie thil haw hi na chungah hung tung ina.

³¹Na suohpihnu lampi ah na chieh a, zieziekchun amah gawtna khawn chuh na khuta hun pie ding ka hi.

³²LALPA Pathien chun hiti hin a tii: Na suohpihnu gawtna khawntunglien leh thuk chuh dâwn in na tin, Nuihsan leh muhsit in um inla, a dawl tam ngâla!

³³Zukhamna leh lungkhamna’n hun sudim intin, Lauhna leh sietna khawn, na suohpihnu Samari khawn chun.

³⁴Dâwn in na tin, thit kang kêi in na tin; sep gawp in na tin, a them chun na nawi ât kêk inla; ka gen ta ngâla, LALPA Pathien chun a tii.

³⁵Zieziekchun, LALPA Pathien chun hitihin a tii: Nei hetngilh a nei nutsieh tâk ziekin, na hûkna leh na nawhchizawkna mawh chuh na puok ding ahi, ti’n.

³⁶LALPA chun ka kawmah hiti hin le a ti a: “Mihing chapa, Oholah leh Oholibah chungah thu na tan die? A tenumna hawu chuh a kawm u ah puong dawk ah.

³⁷A zawlsai u a, a khut u ah thisan a bek ngâla, a milim hawu kawma chun zawl a sai ta ngâl u a; kei dinga a neih uh a chapateu ngêi chule mei kâktum dingin kithawihna’n a pieu ahi.

³⁸Ka kawmah ziehi le a hih ui: Amau mah in ka mun thiengtho chuh a subuok u a, ka chawlhni haw le a bawhsieu ahi.

³⁹A milim hawu dinga a chate a thah niu mah mah chun ka mun thiengtho subuok dingin a lut sek ngâl u a; ahi, khutichun ka in sung ngêi ah a hih sek u ahi.

⁴⁰Zielo chun le, gamla taka um mi haw hung dingin a thuthak u a, a kawm u ah mi a sawl u a, a hung tun tieng u leh amau haw ding chun a kisil ngim gunsêt u a, a mit uh a chei u a, sana kicheina’n a kichei u a.

⁴¹Zalkhun hawihtak chungah a chuu a, zie masang achun dawhkân a guonggalh u a, ka gimlim leh ka olive thau haw chuh zie chun a luidawk sek ui.

⁴²A kawm u ah mipi nawpbawl thawm het ahi a, Sabian te leh mi vantâng haw thalek gam apat chun a hung u a, suohpihchan te nih chuh chaucha a buhsak u a, lukhuk hawih tak tak haw a khuksak u a.

⁴³Chun, kei chun, zawlsaih zieka teksie suok hiel nu hi a kuolpih nuom un, amah le a peih na die aw? Ka ti a.

⁴⁴Chun, kizuokte kawma mi a chieh guol un a kawm achun a lut tho u a; khutichun, numei hûk Oholah leh Oholibah kawm achun a lut tau ahi.

⁴⁵Himahleh, mi diktat te chun numei zawlsai a thisan suoh te gawtna tawbang chun amau chuh gawt in au, zawl a saih u a, a khut u a thisan a beh ziekin.

⁴⁶LALPA Pathien chun hiti hin a ti ngâla: A chung u ah mipi punkhawm unla, sawisa diek unla, suom un.

⁴⁷Chun, mipi kipunkhawm te chun suongin sep intin un, a chemzâm un satlum intin un, a chanu teu that intin un, a in hawu hâl sak in au.

⁴⁸Zie tawbang hin hûkna chuh gam apat chun subei ing ka ting, numei chengcheng in na hûknau hi chîn loh hiel ding ahi tih a hetna dingun.

⁴⁹Chun, na hûknau chuh na chung u ah hun ditthuk intin un, milim ho a na gitlohna ziek u chun thuok inlau; zie tieng chuleh, kei hi LALPA Pathien chuh ka hi tih hun he ta’n lau,” a ti a.