Read Gangte EZEKIEL 24 Bible Online

EZEKIEL 24 - Gangte bible

EZEKIEL 24

¹Chun, kum kuona, tha sawmna, zie tha ni sawm ni chun LALPA thu chuh ka kawmah a hung tung kita,

²“Mihing chapa, ni mit, tuni ni mit ngêi hi zikin; tuni ngeia hi Babulon lengpa chun Jerusalem a sim pat ziekin.

³Chun, helchîng inkuon kawm achun tehkal thu gen inla, a kawm u ah, LALPA Pathien chun hiti hin a tii: Bel suong inla, suong zing inla, a sung achun tui sung inla,

⁴sa tang haw a sung achun thâk inla, sa tang pha pha, a mal haw, a dâk haw, a guh bawk pha cha cha chun sudim in.

⁵Belam hawn laka a pha pha lân la, a nuoi ah thingkhuoh gawlh inla, huon so inla, a guh haw chule huon khawm in.”

⁶Zieziekchun, LALPA Pathien chun hiti hin a tii: Thisan suoh chîng khawpi, bel a sung a kanggep, a kanggep in a nutsieh khâk loh chuh a chung agik ie! Zen thawh lo in sa tang haw chuh khat khatin thûk dawk un.

⁷A thisan suoh chuh amah sung ah a um ngâla, leivui in a khuh theihna dinga leituol a sunthak sangin suongpi gaw chungah a sungtha zaw a.

⁸Phuba la dinga lungnat na chawhthawh ahih theihna dingin a thisan suoh chuh suongpi gaw chunga ka sunthak ahi, khuhmang ahih lohna dingin.

⁹Zieziekchun, LALPA Pathien chun hiti hin a tii: “Thisan suoh chîng khawpi chuh a chung agik ie! keimah ngêi in vum velvul in thing chuh tieng ing ka.

¹⁰Thing chuh sie vum unla, mei chawhkuong unla sa chuh min takin huon unla, thâk theih theih thâk unla, saguh haw chuh katum hiel hen.

¹¹Khutichun, bel chuh a ngawnin mei-âm chunga chuh suon zing hi hen la, hung san tin, a thik chuh hung âm intin, a thienlohna haw chuh hung tui intin, a tui-êk kikhawl khawm haw chuh hung bei ina.

¹²Theihtawp suoh le phachuom lo in, a gep kikhawl khawm chuh a thieng diek puoh a, mei nasan in le a kâng thieng diek puoi.

¹³Na thienlohna chuh hûkna hi ahi a, hun sukthien ka guo a, na thien diek loh ziekin na chunga ka lungnatna ka sunthak vek masangsieh bangmah tik na thienlohna apat chun sukthien hita puon la.

¹⁴‘Kei, LALPA hin ka gen ta a, hung tung ngêi ina, ken hih ding ka hi ngâla, kinungzuk puo’ng ka ting, hun diem puo’ng ka ting, kisik puo’ng ka ting; na umdan haw leh na thilhih haw dungzui zelin na chunga thu tan hi’n a, LALPA Pathien chun a tii,’ ti’n,” a ti a.

¹⁵Chun, LALPA thu chuh ka kawmah a hung tung kita,

¹⁶“Mihing chapa, ngaitie, thakhat in na mit taina pên chuh hun lâksak ing ka ting, na sun ding ahi puoh a, na kah ding le ahi diek puoh a, na mitthitui le a pawt ding ahi puoi.

¹⁷Agukcha’n mau inla, mithi sûnna himhim chuh nei ki’n; na diel kawp inla, na kengtawbek but inla, na mûk tuom ki’n la, lusûnte an le ne ki’n,” a ti a.

¹⁸Khutichun, zingkal chun mipite kawmah thu ka gena; nitâk chun ka zi a thi ta a; zingkal kit chun thu pieka ka um guol chun ka hih ta a.

¹⁹Chun, mite chun ka kawmah, “Hiti a na um hi kei u dingin bang ahih nei hilh puoh die?” a tiu a.

²⁰Khutichun, kei chun a kawm u ah, “LALPA thu ka kawmah a hung tunga,

²¹Israel insung mite kawm achun gen inla, LALPA Pathien chun hitihin a tii: ‘Ngaiun, ka mun thiengtho, na kisuonpih pên uh mun det, na et chim loh uh, na lungthim kipahna pên u chuh subuok ding ka hi; na chanu na chapateu na nutsieh hawu chuh chemzâm in puk in au.

²²Ka hih tawbang hin hih inlau; na mûk uh tuom puo’n na tin un, ahun lusûnpih te an le ne hiel puo’n lau.

²³Na diel uh kawp in na tin un, na kengtawbek hawu but inlau: sûn puo’n na tin un, kah hiel puo’n lau; na gitlohna ziek u chun gawptha’n na tin un, kikahhuon zaw’n lau.

²⁴Hitihin Ezekiel chuh nang haw dingin etsakna hi’n tin, amah hih dân dân hin hun hih inlau: ziehi a hung tun tieng leh LALPA Pathien chuh ka hi tih hun hen lau’, a tii,” ka ti a.

²⁵“Nang, mihing chapa, a kawm u apat a mun det uh, a kipahnau leh a lopinau, a et chim loh u leh a lungthim kipahna pên u leh a chanuteu leh a chapateu ka lak mang sak ni chuleh,

²⁶Zie chuh ka hih ni ngêi chun a suokcha mi khat na kawmah hung intin chanchin chuh hung hilh ina.

²⁷Zie ni ngêi chun hung pau thei ta’n na tin, a suokcha te kawm achun thu gen in na tin, pautheilo in um ta puo’n la; khutichun, amau dingin melchikna hi’n na tin; chun LALPA chuh ka hi tih hun he tan au,” a ti a.