Read Gangte EZEKIEL 25 Bible Online

EZEKIEL 25 - Gangte bible

EZEKIEL 25

¹Chun LALPA thu chuh ka kawmah a hung tung kita,

²“Mihing chapa, Amon chate chuh angngat inla, a chungthuu genlawk in.

³Amon chate kawm achun, ‘LALPA Pathien thu hi ngaithau in, LALPA Pathien chun hiti hin a tii; ka mun thiengtho chuh sukbuok a a uma, Israel gam sukhawm a a uma, Israel inkuonte chuh sala puih a a um lai u khan, Hina! na na tih ziek khan,

⁴Ngaiin, Suohlam a mite kawmah a chan dingun hun pie ding ka hi; na lak u ah giehbuk sa’n tin un, cheng in au; na theigah haw neu intin, na bâwngnawi tui dâwn un au.

⁵Rabbah khuo chuh sangawngsau in dingin siem ing ka ting, Amon chate gam pumpi chuh belam hawn chinna mun in siem ing ka’; khutichun, LALPA chuh ka hi tih hun hen lau.

⁶“LALPA Pathien chun hiti hin a tii: Israel gam chunga na khut na beta, na kichawp a, na lungthim chengcheng a sietna chunga na kipah ziekin,

⁷Ngaiin, na chungah ka khut ka tha a, namte’n a suom ding u a hun pie ding ka hi; mite lak achun hun gawt chuom ing ka ting, gam haw apat chun hun sumangthai kei ding ka hi a, hun susie ding ka hi, khutichun, LALPA chuh ka hi tih he’n lau,” ti’n.

⁸“LALPA Pathien chun hiti hin a tii: Moab leh Seir chun, ‘Ngaiin, Juda inkawte chuh nam dang haw tawbang tho ahiu hi’, a tih ziekun,

⁹Moab te gamgi zul a khawpi, a gam lopina, Beth-Jeshimoth, Baal-Meon leh Kujathaim haw chuh melmate lak zieng theih in hawng ing ka ting,

¹⁰Suohlam mite chan dingin Amon chate haw chuh tawh pie khawm ing ka, Amon chate chuh namte laka hetzing a hih tâk lohna dingun.

¹¹Moab gam chunga thutanna chuh guitun sak ing ka ting, khutichun, LALPA chuh ka hi tih he’n au,” ti’n.

¹²“LALPA Pathien chun hiti hin a ti a: ‘Edom chun Juda inkawte chunga phuba la’n nasa takin thil a hihkhiel ahi, amah thu thu a a chung u a phuba a lak ziekin.

¹³Zieziekchun, LALPA Pathien chun hiti hin a tii: Edom chungah ka khuttha’ng ka ting, a mite leh a ganchateu that vek ing ka; sugam ing ka ting, Teman apat Dedan chanin chemzâm in thi’n au.

¹⁴Ka mite Israel te khut in ka phuba lâkna chuh tunsak ing ka ting, Edom chung achun ka lungnatna leh ka hachangthakna dungzui in hih intin un, ka phuba lâkna chuh he’n au’, LALPA Pathien chun a tii.

¹⁵“LALPA Pathien chun hiti hin a tii: Philistia mite’n phuba la a, kumkhaw kimelmakna zieka Juda sukmangthai nawpna lungthim sie pu a phuba a lak ziekun,

¹⁶LALPA Pathien chun hiti hin a tii: Ngaiin, Philistia mite chung achun ka khuttha’ng ka ting, Kereth khaw mite chuh gawt vek in, tuipi panga ana umsun haw chule sumangthai vek ing ka.

¹⁷Lungna taka hilh gaih in a chung u ah phuba lang ka ting, khutia a chungu a ka phubalakna ka tunsak tieng chuleh LALPA chuh ka hi tih he tan au,” a ti a.