Read Gangte EZEKIEL 26 Bible Online

EZEKIEL 26 - Gangte bible

EZEKIEL 26

¹Chun, ka saltannau kum sawm leh kum khatna tha ni masapen chun LALPA thu chuh ka kawmah a hung tunga,

²“Mihing chapa, Tura chun Jerusalem chungthu a, ‘Ehe! Namte kawtkhak chuh a sie ta a, kei lam ah a kihawng a, a siet gawp vek tâk ziekin kei chuh hung khawsathei ta’ng ka’, a tih ziekin,

³“LALPA Pathien chun hiti hin a tii: Ngaiin, Aw Tura, ka hun do ahi; tuisuohgiet a kinawk toh zung zung bang hielin na chunga hung dingin nam tamtak te chuh hun sawl ding ka hi.

⁴Chun, Tura kulh haw chuh suchim intin un, kulh insang haw chuh suchim in au; a lei chuh git thieng ing ka ting, suongpi chai velvul guolin siem ing ka.

⁵Tuipi lilai a lên pho hulna mun hung hi’n a, keima’n ka gen ta ngâla, LALPA Pathien chun a tii: khutichun namte chun suom in au.

⁶Chun, gam lailung a khaw neu a cheng haw chuh chemzâma suklup hiu intin, khutichun LALPA chuh ka hi tih he’n au.”

⁷LALPA Pathien chun hiti hin a ti ngâla: Ngaitie, Tura do dingin mâllam apat in Babulon lengpa, Nebuknezar, lengte leng chuh sakawl haw tawh, kidona kangtalai haw tawh, sakawl sepaih haw tawh, sepaih tamtak tawh hun pui ding ka hi.

⁸Gam lailung a na chanute haw chuh chemzâm in that in au; Lei sungvum in au, nang hun dona dingin, Na kulh bâng susie dinga kalna siem un tin, Nang hun dona dingin a phawteu dawm sang in au.

⁹Kulh tahsietna a siem hi, na kulh bâng phel na dingin, Na kulh bûk sang chuh heicha’n suchim in au.

¹⁰A sakawl tamtakin a pal khut chun hun khuh ina, leivui in, Kulhbang chima mi a lut guola, Na kelkawtpia sakawl sepaihte, kangtalai haw, kidona kangtalai haw a lut tieng, Na kulhpi kithing ina.

¹¹Na kawtthêl cheng sakawl keng in tawh sie’n tin, chemzâm in na mite that zo intin; Leituol ah na khuom det haw puk ina.

¹²Na gothil cheng chawm zo in au, Na thuomphuo cheng kilak in au, Na kulh bâng suchim intin un, Na in nuom tak hawu susie zo in au, Na thing, na suong, na lei pha haw chuh tuipi ah paih lut in au.

¹³Na lasak git haw suthip ing ka ting, Na kingkang git le het hita puo’n a.

¹⁴Suongpi gaw velvul guolin hun siem ka ting, Len pho gawtna hung hi ta’n la, Tundin kit hita puo’n la, Kei, LALPA hin ka gen ta ngâla, LALPA Pathien chun a tii.

¹⁵LALPA Pathien chun Tura khaw kawmah hiti hin a gena, “Na sunga kithahna a uma, a liemte a mau tieng u leh na puk git chun tuipi panga gam haw chuh kithing lo ding ahiu em?

¹⁶Tuipi chunga hotu namtinte chuh a lalchutphah u apat kum intin un, a puon thupi teu kawih dawka, a puon cheihawihteu hâwktha a, kithinna a kithuom in leituol ah puk intin un, na chunga thil tung chuh maksa’n kithing kithing zieng in au.

¹⁷Chun, nang hun sûnna la phuok intin un, na kawmah: ‘Khawpi minthang, tuipi chunga hât, Tui laka khawsa mite chênna! Nang leh na sunga chêngte chengcheng, Na kimvela te’n a hun lauh maizen u tawh, Na hah siet na lâwm lâwm e.

¹⁸Na puk ni chun, Tuipi panga gam chengcheng a kithing u a; Ahi, tuikuol gam chengcheng, A beidawng ui na manthaina ah,’ ti’n au,” ti’n.

¹⁹LALPA Pathien chun hiti hin a ti ngâla, “Khawpi hawmngawn, kuomah luoh loh khawpi guola ka hun siem a, tui thuk taka na tum manga, tui nasatak in a hun chup tieng leh,

²⁰Tuonthangmang a mite, Sheol a chiehsate kawmah hun sawl tha suk ing ka ting, lei mun nuoinung pên a, tuona tânga ana gam ta, Sheol a chiehsate kawmah hun chensak ing ka ting, kuoma’n a hun luoh lohna ding leh hing nalaite laka lopi, na muh takloh hiel na dingin.

²¹Tizat-um takin hun sutawp ka ting, chun, um ta puo’n la; hawl in um mahleh chin le muh kit hita puo’n la,” LALPA Pathien chun a tii.