Read Gangte EZEKIEL 27 Bible Online

EZEKIEL 27 - Gangte bible

EZEKIEL 27

¹LALPA thu chuh ka kawmah a hung tunga,

²“Nang, mihing chapa, Tura khuo sûnna la phuok inla,

³Tura khaw kawm achun, Aw nang, tuipi kaihmun a cheng sek, Tuipi panga gam tamtak te kawma sumkawlvei, LALPA Pathien chun hiti hin a tii: “Aw nang, Tura, ‘Ka hawih bukim hi’, na ti maw!

⁴Na gam in tuipi lai chuh a sun ie, A hun siemte’n a hun siem hawih diek nau e;

⁵Na thing matchâk Senir a châk thing in a siem ui, Lebanon a sidar thing a lau, na lawng khuom dingin.

⁶Bashan a gangpi thing in a siem ui na lawngzapna, Na lawng tuong châk thing, saiha kithun lut, Tuipi pang Kupra-a kila.

⁷Na lawng puonzak Aigupta puon nem zêphawih, Nang melchikna’n a pang hi, Na limbuk puonzak chuh a dum leh a sandup, Elishah tuipi pang gam apat chuh.

⁸Na lawngtawlte Sidon te leh Arvad te ahiu, Na lawngtawlte cheng chuh, Aw Tura, Na miching te ahiu.

⁹Gebal khutthiem khawkhengte, Na lawng lemtuokte ahiu, Tuipi lawng cheng leh a mite’n, Na van chaw dingin a hun zuon ui.

¹⁰“Persia, Ludia leh Put mite na sepaih in a pang ui, A phawu leh a lukhuk uh na bangah a khâi ui, Nang hun zem hawihte ahiu hi.

¹¹Na sepaih a pang Arvad mite’n na kulh bâng cheng a veng ui, Gammad mite’n na kulh insang a veng ui, A phawu a tâk ui, na kulhpi bang kimvel ah, Na lopina a subukim ui.

¹²“Na hauhsak ziekin thuomphuo, go thil tin cheng, Tarshis in a hung chaw, na thuomphuo haw man in, Tangkaguo, thik, langva leh suon a hun piei.

¹³Javan, Tubal leh Meshek nang hun dawlte hin, sal leh dâk, ûmlebel in a hun dawl u a, na thil a neih na dingun.

¹⁴Beth Togarmah mite chun na thuomphuo man in, Nasem chi sakawl, kidona sakawl leh sabiltung a hun pieu.

¹⁵Dedan mite a hun kidawlpihte ahiu a, Tuipi panga gam tamtak na sumkawlveina mun ahiu, A man in saiha leh ebony a hun pieu.”

¹⁶Thuomphuo na hauh ziekin, Edom chun a hun kidawlpih a, emerald suong, puon sandup, puon zem nei, pat ngat puon, puon cheihawih, khival leh mei suongin a hun kidawlpih ui.

¹⁷Juda leh Israel te le a hun kidawlpihte ahiu a, Minnith apat gehu olive leh theipi gah nasa, khuoizu leh thau, Thingnai in a hun kidawlpih ui.

¹⁸Na hauh ziekin thuomphuo, go thil tin cheng, Damaska a hun kidawlpih a hung hi a, Helbon greptui leh belam mul vam in a hun kidawlpih hi.

¹⁹Uzal apat Dan te leh Grikte chun a chawu hi na thuomphuo, Thikval, thingguithak leh kawl chûnna thuomphuo a theng ui.

²⁰Dedan chun Sakawl chung puonphah in a hun kidawlpih ui.

²¹Arabia leh Kedar lengte cheng, A hun kidawlpih ahi vek ui; Belamno, belamchal leh kelcha’n a hun kidawlpih ui.

²²Seba leh Raamah sumkawlveite’n a hun kidawlpih ui; Gimlim phapen chi leh suongmantam chitin leh sana’n a hun kidawlpih ui.

²³Haran, Kanneh leh Eden, Seba, Asuria leh Kilmad sumkawlveite chun a hun kidawlpih ui.

²⁴Ziete chuh ahiu, a hun kidawlpihte, Silhlechen pha chi, puon dum leh puonchei hawih, tuongphah pawl thiithiei, khau to taka kibil haw chun a hun kidawlpih ui.

²⁵Tarshis lawng haw chun na zawkthil puo nguoi nguoi, “Na hung khangto a, tuipi chungah na hung lopi tai.

²⁶Na lawngtawlte’n tuipi lai ah a hun tawl lut u a, Tuipi lilai ah khawsak huih in na lawngtawlte nuoigawp hi.

²⁷Na sumlepai, na neihlelam leh na zawkthil, Na lawng mite, na lawngtawlte, lawng siem thiemte, Na zawkthil a kiveite leh na sepaihte, na sunga um, Na lak u a um chengcheng te tawh, Tum mang in lau, tuipi li lai ah, na sietna ni chun.

²⁸Na lawngtawlte kiko thawm in, Na kimvela mite a kithing ui.

²⁹“Lawng tawlna mawlhtute chengcheng, lawng mite leh Lawng tawl hotute chengcheng chun lawng nusieh in, A ding ui, lui pang ah.

³⁰Na chungthu ah a awu het kham in suoh in au, Thasie takin kap intin un, A luchang u a leivui kithehkhum in, Kipek in au leivui lak ah.

³¹Nang zieka kimet kawlh in, kawlladip puon cheng un au, Thasie kuong kuong a kap in, nasatak in hun sûn in au.

³²Nang hun sûn in sam in au, a kah lau: ‘Kuo a Tura tawbang um, Tuipi laia daigiel bang changta hi?

³³Na zawkthilte tuipi chunga chieh dawkin, Mi tamtak te na taisak sek; Leia lengte na suhausai, Na neihlelam, na zawkthil nieng tak chun.

³⁴Tuipi haw chun a hun suksiet tieng leh, Na zawkthil, na mi chengcheng, Tum mang ta’n lau, nang pum in, tui thuk achun.’

³⁵“Lui pang a chêngte chengcheng in mak hun sa’n au, A lengteu chuh lau untin, nasa takin dângtha zo un au.

³⁶Mite laka sumkawlveite chun hun chekkhum in au; Mite dingin tizat-um hung hi ta’n la, Kilang kit ngei ta puon la, ti’n gen ah,” a ti a.