Read Gangte EZEKIEL 28 Bible Online

EZEKIEL 28 - Gangte bible

EZEKIEL 28

¹LALPA thu chuh ka kawmah a hung tung kita,

²“Mihing chapa, Tura lengte kawm achun gen in, LALPA Pathien chun hiti hin a tii: Na lunggil a chapo a, Pathien ka hi a, tuipi laia pathiente chutna achun ka chûi, na ti a, ahihziekin mihing na hi zawa, Pathien na hi puoi, Pathien lungthim tawbang pu’n kingai mahleh chin le:

³Daniel sangin na pil zaw a, na kawmah thuguk himhim a um thei puoh a,

⁴Sumdawnna a na chitna leh na lemhetna’n na na kisuhausa a, na gobawm ah tangka leh sana na khuma,

⁵na chitna nasatak leh na sumkawlveina’n na hauhsakna na supung a, na hauhsak bêk ziekin na lunggil a hung chapo ta a;

⁶Zieziekchun, LALPA Pathien chun hiti hin a tii: Pathien lungthim bang pua na kingaih ziekin.

⁷Ngaiin, gamdang mi, namte laka tizat-um pên na kawma hun sawl ding ka hi; na chitna gah hawih chungah a chemzâm uh lek intin un, na lopina chuh hihlelo in au.

⁸Khukthuk ah hun paih lut untin uh, tuipi laia a thahteu thih in thi’n la.

⁹A hun thatpa ma achun, ‘Pathien ka hi’, na ti nalai dem? A hun thatpa khut achun Pathien na hi puoh a, mihing na hi zawi.

¹⁰Nam dang mite khut achun zektan loh thih in thi’n la; ka pau ta ngâla,” LALPA Pathien chun a tii.

¹¹Zielo chun le, LALPA thu chuh ka kawmah a hung tunga,

¹²“Mihing chapa, Tura lengpa sûnna la phuok inla, a kawmah, LALPA Pathien chun hiti hin a tii: Nang, phatna tin cheng gawm, chitna a dim, hawihna a bukim!

¹³Pathien huon Eden ah na cheng a; Suongmantam chitin chengin na kikhuh a, sardius, topaz leh diamond, Beril, onix, jasper, sapphire, emerald leh karbangkal, A kiphuhna leh a kituohna haw sana a kisiemte, siem na hih ni a guot zawhsa ahiu.

¹⁴Thau nuh a um, vengtu cherub na hi a; Tia chuh ka namdet na hi. Pathien tâng thiengtho ah na um a; Suong vak thiithiei lak ah na leng hi.

¹⁵Na phabukim na umdan cheng ah, Siem na hih ni apat khan, Nangmah a gitlohna muh ahih ma cheng.

¹⁶Na sumkawlveina pung tultul chun, kipawngbawlna ah a hun puilut a, Gitlohna na hun hih tai. Zieziekchun ka hun paih dawk, Pathien tâng apat, Thil tenum guolin; Ka hun susiei, Aw vengtu cherub, Suong vak thiithiei lak apat chun.

¹⁷Na hawihna zieka na lunggil hung chapo in, Na vak thieithuoina’n na chitna suchavai in, Leituol ah ka hun paih hi, Lengte hun etnawp dingin a masang u ah ka hun tâk dawk a.

¹⁸Na gitlohna nasa tak leh na sumkawlveina diktat lohna chun, Na mun thiengtho haw na subuok a; Zieziekchun na sung apat mei ka pawtsak a, Ahun mu sekte cheng muh dingin leichung ah vut ka hun suoh saka, a hun katum hi.

¹⁹Mite laka a hun he cheng maksak dingin, Gimneih-um na hung suok tai, Bangmahtik um ngei himhim ta puon la,” ti’n.

²⁰Chun, LALPA thu chuh ka kawmah a hungtung a,

²¹“Mihing chapa, Sidon lam nga’n la, a chungthu genlawk in.

²²LALPA Pathien chun hiti hin a tii: Ngaiin, ka hun do ahi, Aw Sidon; Limbawl in hung um ing ka, na sung ah; LALPA chuh ka hih zie hun he’n au, a chunga gawtna ka tunsak a, a sunga thiengtho a ka kitaklat tieng.

²³A chunga hipi sawl a, a kawtthêl hawa thisan luon sak ding ka hi ngâla; a sung ah aliem haw puk in au, ning tin apat a chunga tung, chemzâm in; khutichun, LALPA chuh ka hi tih he’n au.”

²⁴Khutichun, Israel inkuon dingin a sun ding hamlingnei um ta puo’n tin, a kimvel u a amau musitte lak ah a suna ding ling um ta puo’n tin; khutichun, LALPA Pathien chuh ka hi tih he’n au.

²⁵“LALPA Pathien chun hiti hin a tii: Israel inkuon chuh thehzak a a umnau mite lak apat ka puihkhawma, Jentel te mitmuha a lak u a ka thienthona ka taklat tieng leh Ka suok Jakob kawma ka piek, amau gam ngêi achun cheng ta’n au.

²⁶Khutichun, zie chun muong takin cheng ta’n au; ahi, inte sau in tin, grep huonte bawl untin, a kimvel u a amau musitte chengcheng chunga gawtna ka tunsak tieng leh muong takin cheng ta’n au. Zie tieng chuleh, LALPA a Pathien u ka hi tih he tan au,” ti’n.